मुंबई : बॉलिवूड अभिनेता अजय देवगण आता दिग्दर्शन करणार आहे. विशेष म्हणजे अजय देवगण दिग्दर्शित या सिनेमात काम करणार आहेत बिग बी अमिताभ बच्चन. 'मेडे' असं या चित्रपटाचं नाव असून यासाठी अजय देवगण संपूर्णपणे तयार असल्याची माहिती आहे. या सिनेमात अमिताभ बच्चन यांच्यासह स्वत: अजय देवगण देखील दिसणार आहे. याआधी बिग बी बच्चन आणि अजय देवगण यांनी 'मेजर साहब', 'खाकी', 'सत्याग्रह', आणि 'हिंदुस्तान की कसम' मध्ये एकत्र काम केलं होतं. दोघं आता सात वर्षांनंतर एकत्रित पडद्यावर दिसणार आहेत. 2013 मध्ये 'सत्याग्रह' सिनेमात दोघे एकत्र दिसले होते.
'मेडे' हा सिनेमा अजय देवगण दिग्दर्शित करणार आहे. सूत्रांनी सांगितलं की, अजय 'भुज : द प्राइड ऑफ इंडिया' मधील आपलं काम पूर्ण झाल्यानंतर या प्रोजेक्टला सुरु करणार आहे. हैदराबादमध्ये या नव्या सिनेमाचं शूटिंग होणार आहे. सध्या अमिताभ बच्चन हे केबीसीच्या शूटिंगमध्ये व्यस्त आहेत.
आपला नवा सिनेमा 'मेडे'साठी अजय देवगण खूप उत्साहित आहे. तो हैदराबादमध्ये लवकरच सिनेमाचं शूटिंग सुरु करणार आहे. या सिनेमात बच्चन यांची साथ असणं मोठी गोष्ट मानली जात आहे. बच्चन देखील या सिनेमासाठी उत्साहीत असल्याचं बोललं जात आहे. भुज द प्राइड ऑफ इंडियाची शूटिंग संपल्यानंतर अजय देवगण आपल्या या नवीन प्रोजेक्टवर काम करणार आहे. तो अमिताभ यांच्यासोबत काम करणार असल्यामुळं आनंदी आहे. या चित्रपटाविषयी अद्याप काही डिटेल्स समोर आलेल्या नाहीत. मात्र या दोघांना एकत्रित पाहण्यासाठी आणि अजय देवगणचं दिग्दर्शन पाहण्यासाठी चाहते देखील उत्सुक आहेत.