Kerala Government Formation: केरळमध्ये मुख्यमंत्रीपदाबाबत अनिश्चितता अजूनही कायम; काँग्रेसने दावेदारांचे पोस्टर हटवले, आमदारांच्या मनात कोणाला पसंती?

काँग्रेसचे सरचिटणीस के.सी. वेणुगोपाल, मागील विधानसभेतील विरोधी पक्षनेते व्ही.डी. सतीशन आणि सहा वेळा आमदार राहिलेले रमेश चेन्नीथला हे मुख्यमंत्रीपदाच्या शर्यतीत आघाडीवर आहेत.

Kerala Government Formation

Source : ABP Majha

Kerala Government Formation: 4 मे रोजी पाच राज्यांमधील निवडणुकीच्या निकालानंतर, बंगाल आणि तामिळनाडूमध्ये नवीन मुख्यमंत्र्यांनी शपथ घेतली. पुदुचेरी आणि आसाममधील मुख्यमंत्र्यांची नावे आणि शपथविधीच्या तारखा निश्चित झाल्या आहेत, परंतु सहा दिवस उलटूनही, केरळमध्ये पूर्ण बहुमत मिळवलेल्या काँग्रेसच्या नेतृत्वाखालील आघाडीने आपल्या मुख्यमंत्र्यांची घोषणा केलेली नाही. काँग्रेसचे सरचिटणीस के.सी. वेणुगोपाल, मागील विधानसभेतील विरोधी पक्षनेते व्ही.डी. सतीशन आणि सहा वेळा आमदार राहिलेले रमेश चेन्नीथला हे मुख्यमंत्रीपदाच्या शर्यतीत आघाडीवर आहेत.

केसी वेणुगोपाल यांच्या नावाला पाठिंबा?

6 मे रोजी काँग्रेसने मुकुल वासनिक आणि अजय माकन यांना निरीक्षक म्हणून केरळमध्ये पाठवले. बैठकीनंतर त्यांनी सांगितले की, त्यांनी सर्व आमदारांशी चर्चा केली आहे. असा दावा केला जात आहे की, हायकमांडला सादर केलेल्या अहवालात आमदारांनी के.सी. वेणुगोपाल यांच्या नावाला पाठिंबा दिला आहे. अहवालानुसार, 63 काँग्रेस आमदारांपैकी 75-80 टक्के आमदारांनी वेणुगोपाल यांना पाठिंबा दिला. वेणुगोपाल मुख्यमंत्री झाल्यावर इरिकूर ​​जागा जिंकलेले सनी जोसेफ आपल्या जागेचा राजीनामा देऊ शकतात. यामुळे वेणुगोपाल मुख्यमंत्री झाल्यावर त्यांना या जागेवरून आमदारकीची निवडणूक लढवता येईल.

अहवालानुसार, बैठकीत व्ही.डी. सतीशन यांना केवळ सहा आमदारांचा पाठिंबा मिळाला. मात्र, बैठकीनंतर तीन माजी प्रदेशाध्यक्षांनी सतीशन यांच्या नावाला पाठिंबा दिला. इतकेच नाही, तर यूडीएफमधील मित्रपक्ष आययूएमएल आणि केरळम काँग्रेस (जोसेफ) यांनीही सतीशन यांना उघडपणे पाठिंबा दिला आहे.

केरळमध्ये चर्चेतील नावे

1. व्ही. डी. सतीशन (V. D. Satheesan)

• प्रबळ बाजू: सध्याचे विरोधी पक्षनेते म्हणून त्यांनी विधानसभेत सरकारला सळो की पळो करून सोडले आहे. त्यांची प्रतिमा अभ्यासू, आक्रमक आणि स्वच्छ आहे. तरुणांमध्ये ते लोकप्रिय आहेत.
• कच्चे दुवे: पक्षात त्यांचे 'ग्रुप' राजकारण कमी असले तरी, जुन्या फळीतील नेत्यांचा त्यांना पूर्ण पाठिंबा मिळेलच असे नाही.

2. के. सी. वेणूगोपाल (K. C. Venugopal)

• प्रबळ बाजू: राहुल गांधींचे अत्यंत विश्वासू आणि पक्षाचे राष्ट्रीय संघटन सरचिटणीस असल्याने हायकमांडचे पारडे त्यांच्या बाजूने झुकू शकते. दिल्लीतील वजनाचा त्यांना फायदा होतो.
• कच्चे दुवे: गेल्या अनेक वर्षांपासून ते राष्ट्रीय राजकारणात सक्रिय असल्याने केरळच्या स्थानिक कार्यकर्त्यांशी त्यांचा संपर्क काहीसा कमी झाला आहे. त्यांना 'पॅराशूट मुख्यमंत्री' मानले जाण्याची भीती आहे.

3. रमेश चेन्नीथला (Ramesh Chennithala)

• प्रबळ बाजू: दांडगा प्रशासकीय अनुभव आणि माजी गृहमंत्री म्हणून त्यांची पकड मजबूत आहे. पक्षातील जुन्या कार्यकर्त्यांचे मोठे जाळे त्यांच्याकडे आहे.
• कच्चे दुवे: मागील विधानसभा निवडणुकीत त्यांच्या नेतृत्वाखाली पक्षाला अपयश आल्याने हायकमांड नवीन चेहऱ्याला संधी देण्याच्या विचारात असू शकते.

इतर महत्वाच्या बातम्या