Satara ZP Election Result 2026 सातारा: सातारा जिल्हा परिषदेच्या 65 जागांसाठी मतमोजणी सुरु आहे. पाटण तालुक्यातून एक धक्कादायक अपडेट समोर आली आहे. पाटण तालुक्यातील मंद्रुळकोळे जिल्हा परिषद गटात माथाडी कामगार नेते नरेंद्र पाटील यांच्या पत्नी प्राची पाटील भाजपच्या चिन्हावर निवडणूक लढवत होत्या. प्राची पाटील यांना पराभवाचा धक्का बसला आहे. या ठिकाणी शिवसेनेच्या मृणाल पाटील विजयी झाल्या आहेत. साताऱ्यातील पाटण तालुक्यात शंभूराज देसाई यांनी गड राखला आहे.
भाजपला पाटणमध्ये मोठा धक्का
माथाडी कामगार नेते नरेंद्र पाटील यांच्या पत्नी मृणाल पाटील यांचा पराभव झाला आहे. शिवसेनेचा 22 वर्षाच्या उमेदवार मृणाल महेश पाटील यांनी प्राची पाटील यांचा पराभव केला आहे. सातारा जिल्ह्यातील सर्वात कमी वयाच्या लहान जिल्हा परिषद सदस्य मृणाल महेश पाटील विजयी झाल्या आहेत. प्राची नरेंद्र पाटील यांचा पराभव हा भाजपासाठी मोठा धक्का मानला जात आहे. मंत्री शंभूराज देसाई यांना आपला गड राखण्यात यश आल्याचं बोललं जातंय.
शंभूराज देसाईंनी बालेकिल्ला राखला
भाजपचे मंत्री जयकुमार गोरे यांनी शंभूराज देसाई यांच्या विरोधात पाटण तालुक्यात आक्रमक प्रचार केला होता. जिल्हा परिषद निवडणूक महायुती म्हणून लढावी अशी बैठक पालकमंत्र्यांनी घ्यावी अशी भूमिका भाजप नेत्यांनी मांडली होती. मात्र, शंभूराज देसाईंनी बोलावलेल्या बैठकीकडे भाजपच्या प्रमुख नेत्यांनी पाठ फिरवली होती. पाटण तालुका पंचायत समितीतमध्ये शंभूराज देसाई यांनी सत्ता आणली आहे. पाटण तालुक्यातील जिल्हा परिषद गटात देखील शंभूराज देसाई यांनी चांगलं यश मिळवलं आहे.
साताऱ्यात धक्कादायक निकाल
सातारा जिल्हा परिषद निवडणुकीत राजकीय नेत्यांचे कुटुंबीय उभे होते. साताऱ्यातील भाजपचे मंत्री जयकुमार गोरे यांचा चुलत भाऊ अरुण गोरे कुकुडवाड गटातून पराभूत झाले. तर, औंध जिल्हा परिषद गटातून भारती गोरे पराभूत झाल्या आहेत.
सातारा जिल्हा बँकेचे संचालक ज्ञानदेव रांजणे यांच्या पत्नी अर्चना रांजणे यांचा कुसुंबी जिल्हा परिषद गटातून पराभव झाला.
खेड जिल्हा परिषद गटातून भाजपचे उमेदवार संदीप शिंदे यांचा राष्ट्रवादी काँग्रेसच्या कामेश कांबळे यांनी पराभव केला.
सातारा जिल्हा परिषद पक्षीय बलाबल (5 वाजेपर्यंतच्या आकडेवारीनुसार)
सातारा जिल्हा परिषद 2026 एकुण जागा : 65
सातारा जिल्हा परिषद त्रिशंकू स्थिती
भाजप - 23राष्ट्रवादी - 22शिवसेना - 13 ठाकरे गट- 0काँग्रेस : 1 इतर- 2
दरम्यान, सातारा जिल्हा परिषदेत त्रिशंकू स्थिती निर्माण झाली आहे. भाजप 23 जागा जिंकून सर्वात मोठा पक्ष ठरला आहे.