मुंबई : राज्यसभेच्या सहाव्या जागेसाठी कोल्हापूरचे जिल्हाप्रमुख संजय पवार (Sanjay Pawar) यांच्या नावाची अधिकृत घोषणा आज करण्यात आली. शिवसेना नेते संजय राऊत (Sanjay Raut) यांनी संजय पवार यांच्या नावाची अधिकृत घोषणा केल्याचं जाहीर केलं. संजय राऊत आणि संजय पवार यांचे राज्यसभेच्या निवडणुकीसाठी अर्ज उद्या दाखल करण्यात येणार असून त्यावेळी मुख्यमंत्री आणि महाविकास आघाडीतील प्रमुखे नेते उपस्थित असणार आहेत.
शिवसेना नेते संजय राऊत आज माध्यमांशी संवाद साधताना म्हणाले की, कोल्हापूरच्या संजय पवारांचे नाव अधिकृतरित्या जाहीर करण्यात आलं आहे. उद्या दुपारी एक वाजता आपण आणि संजय पवार, दोघांचेही अर्ज भरण्यात येणार असून त्यासाठी स्वत: मुख्यमंत्री उद्धव ठाकरे आणि महाविकास आघाडीतील प्रमुख नेते उपस्थित राहणार आहेत.
कोण आहेत संजय पवार?
शिवसनेचे कोल्हापूरचे जिल्हाप्रमुख असलेले संजय पवार हे गेल्या 30 वर्षांपासून शिवसेनेत सक्रिय आहेत. गेल्या 9 वर्षांपासून ते कोल्हापूर जिल्हाप्रमुख म्हणून सक्रिय आहेत. स्थानिक राजकारणावर त्यांची मजबूत पकड आहे. कोल्हापुरात पक्षबांधणीचं जोमानं काम केलं. आण्णासाहेब पाटील महामंडळाचे ते उपाध्यक्ष आहेत. एवढंच नाहीतर, तीन वेळा कोल्हापूर महापालिकेत शिवसेनेचे नगरसेवक निवडून आले होते. शिवसैनिक ते नगरसेवक आणि त्यानंतर जिल्हाप्रमुख असा सेनेतील त्यांचा प्रवास. उच्चशिक्षित आणि संघटन कौशल्य असल्यानं पश्चिम महाराष्ट्रातील शिवसैनिकांमध्ये संजय पवार यांच्या नेतृत्त्वाची छाप आहे. तसेच, एक कडवट शिवसैनिक म्हणून त्यांची पंचक्रोशीत ओळख आहे. यासोबतच, सिमा प्रश्नी आंदोलनताही तब्बल 30 वर्षे संजय पवार सहभागी आहेत.
संभाजीराजेंनी प्रस्ताव नाकारल्यास कोल्हापूरचे शिवसेनेचे जिल्हाप्रमुख संजय पवार यांना राज्यसभेसाठी उमेदवारी दिली जाईल अशी चर्चा सुरु होती. यावर बोलताना संधी मिळाली तर आनंदच आहे, अशी प्रतिक्रिया त्यांनी एबीपी माझाशी बोलताना दिली होती. संजय पवार यांनी एबीपी माझाशी बोलताना सांगितलं होतं की, "मला पक्षाकडून अद्याप उमेदवारीबाबत सांगण्यात आलेलं नाही. पण माझ्या नावाची चर्चा असल्याचं मी ऐकतोय. मला संधी मिळाली तर आनंदच आहे. सध्या या चर्चेमधेच मी आनंद मानतोय. संभाजीराजे छत्रपती आणि त्यांच्या घराण्याचा आम्ही आदरच करतो. संभाजीराजे छत्रपती यांनी काय करावं? याबाबत मी त्यांना सूचना करणार नाही. माझ्या नावाची चर्चा ही संभाजीराजेंवर दबाव टाकण्यासाठी नाही."