Kolhapur Uttar Vidhan Sabha : राज्यामध्ये जाहीर केलेले दोन उमेदवार मागे घेण्याची नामुष्की काँग्रेसवर आल्यानंतर आता कोल्हापूर उत्तरमध्ये सुद्धा तीच गत होणार का? अशी स्थिती निर्माण झाली आहे. कोल्हापूरमधून सतेज पाटील यांच्याकडून राजेश लाटकर यांच्या नावाला हिरवा कंदील मिळाल्यानंतर आता कोल्हापूरमध्ये माजी नगरसेवक आणि निष्ठावंतांमध्ये नाराजी पसरली आहे. त्यामुळे कोल्हापूर उत्तर मतदारसंघांमध्ये उमेदवार बदलाची चर्चा रंगली आहे. चर्चेअंती आता मधुरिमाराजे छत्रपती यांचे नाव निश्चित होणार का? याकडे सुद्धा राजकीय वर्तुळाचे लक्ष लागून राहिलं आहे.
राजेश लाटकरांना विरोध, माजी नगरसेवकांचा लेटरबाॅम्ब
कोल्हापूरमध्ये आज सकाळपासून कोल्हापूर उत्तरचा उमेदवार बदलणार अशी चर्चा सुरू आहे. दरम्यान राजेश लाटकर यांना उमेदवारी जाहीर झाल्यानंतर काँग्रेसमध्ये संतापाची लाट पसरली होती. पहिल्यांदा काँग्रेस कार्यालयावर हल्ला करण्यात आल्यानंतर तब्बल 26 नगरसेवकांनी सतेज पाटील यांना पत्र लिहीत हा लादलेला उमेदवार असल्याचा आरोप करत उमेदवार बदलण्याची मागणी केली होती. त्याचबरोबर पक्षाचे सदस्य नसतानाही त्यांना उमेदवारी देण्यात आली आणि निष्ठावंतांना डावलण्यात आले, असा सुद्धा आरोप केला होता. त्यामुळे कोल्हापूरमध्ये उमेदवार बदलाची चर्चा रंगली आहे.
नवीन राजवाड्यावर बैठक सुरु
दरम्यान, काँग्रेसकडून सुद्धा तातडीने उमेदवार बदलण्याचा हालचाली सुरू झाल्याचे बोलले जात आहे. त्यामुळे आता उमेदवार निश्चित करण्यासंदर्भात खासदार शाहू महाराज छत्रपती काँग्रेस जिल्हाध्यक्ष आमदार सतेज पाटील यांच्यासह इतर नेत्यांची नव्या राजवाड्यात बैठक सुरू झाली आहे. त्यामुळे आता राजेश लाटकर यांचे नाव बदलून त्या ठिकाणी मधुरिमाराजे छत्रपती यांच्या नावावर शिक्कामोर्तब केलं जाणार का? याकडे लक्ष आहे.
मधुरिमाराजेंचा निवडणूक लढण्यासाठी नकार, आता रिंगणात उतरणार?
काही दिवसांपूर्वीच मधुरिमाराजे छत्रपती आणि माजी आमदार मालोजीराजे यांनी निवडणूक रिंगणातून माघार घेतली होती. त्याचबरोबर खासदार छत्रपती शाहू महाराज यांनी आणखी एक उमेदवार राजघराण्यातून नको अशी भूमिका घेतली होती. त्यामुळे काँग्रेसकडून सर्वसामान्य कार्यकर्त्याला संधी मिळेल असे संकेत सतेश पाटील यांच्याकडून देण्यात आले होते. मात्र आता राजेश लाटकर यांच्या नावावर शिक्कामोर्तब करूनही माजी नगरसेवकांकडून होत असलेला विरोध पाहता आता मधुरिमाराजे यांना रिंगणात उतरवलं जातं का? याकडे लक्ष असेल.
इतर महत्वाच्या बातम्या