Amravati Election 2026 Result: पराभव जिव्हारी लागला अन्...; अमरावतीतील शिवसेनेच्या बंडखोर उमेदवारानं थेट काढली शिक्षकांची लायकी, म्हणाले ‘जशी लायकी तसा प्रतिनिधी, पैठणी अन् पैशांवर...'

Nagpur Politics : मुख्यमंत्र्यांच्या मतदारसंघातच भाजपमध्ये गटबाजी? नागपूर पदवीधर निवडणुकीतील पराभवानंतर भाजप नेत्याचं स्फोटक विश्लेषण; पराभवामागचं राज'कारण' सांगितलं

रजत वशिष्ठ, एबीपी माझा — Sat, 31 Oct 2026 09:14:01 +0530

Nagpur MLC Election 2026: नागपूर पदवीधर मतदार संघाच्या निवडणुकीत (Nagpur Graduate Constituency Election Results 2026) मुख्यमंत्र्यांच्या (Devendra Fadnavis) नागपूर दक्षिण-पश्चिम नागपूर विधानसभा मतदारसंघात भाजपच्या छोट्या कार्यकर्त्यांच्या(BJP)मनात तीव्र नाराजी होती. कारण मतदारसंघातील काही वरिष्ठ नेत्यांनी आपल्या स्वार्थासाठी कनिष्ठ भाजप कार्यकर्त्यांना पदवीधर निवडणुकीसाठी मतदारांची नोंदणी करण्यात अनेक अडचणी निर्माण केल्या. अनेक ठिकाणी नोंदणी करूच दिली नाही. त्यामुळे मुख्यमंत्र्यांच्या दक्षिण-पश्चिम नागपूर विधानसभा मतदारसंघात किमान 50 हजार पदवीधरांच्या नोंदणीची शक्यता असताना भाजप फक्त 24000 पदवीधर मतदारांची नोंदणी करू शकले. परिणामी त्याचाच फटका निवडणुकीतून बसल्याचे स्फोटक विश्लेषण दक्षिण पश्चिम नागपूर विधानसभा मतदारसंघात (Nagpur MLC Election 2026) मुख्यमंत्र्यांचे खास विश्वासू ओमप्रकाश यादव (Omprakash Yadav) यांनी केले आहे.

Omprakash Yadav: मी नाही तर कोणीच नाही, भाजप कार्यकर्त्यांनाही नोंदणीचे काम करू दिले नाही

दरम्यान, दक्षिण पश्चिम नागपूर विधानसभा मतदारसंघातील काही भाजप नेत्यांनी "मी नाही तर कोणीच नाही" आपल्या या जिद्दीपायी स्वतःही मतदार नोंदणीचे काम केले नाही, आणि इतर भाजप कार्यकर्त्यांनाही नोंदणीचे काम करू दिले नाही. या नेत्याने दक्षिण पश्चिम नागपूर विधानसभा क्षेत्रात गटबाजी केल्यामुळे आम्ही पदवीधर निवडणुकीत अपेक्षित मतदान घेऊ शकलो नसल्याचा आरोप करत प्रकाश यादवने त्या नेत्याच्या हकालपट्टीची मागणी केली आहे.

Omprakash Yadav: थेट मुख्यमंत्र्यांच्या मतदारसंघात गटबाजीचं राजकारण करणारा 'तो' नेता कोण?

दरम्यान, थेट मुख्यमंत्र्यांच्या मतदारसंघात गटबाजीचा राजकारण करत पक्षाचं नुकसान करणारा तो नेता कोण? हा प्रश्न विचारल्यानंतर मात्र ओमप्रकाश यादव मीडियासमोर त्या नेत्याचं नाव घेण्यास तयार नाही. पक्षातील योग्य फोरमवर त्या संदर्भात आवश्यक माहिती दिल्याचा दावा मात्र त्यांनी केला. एवढेच नाही तर मतदारसंघातील त्या नेत्याच्या दबावामुळे पक्षातील अनेक नाराज कार्यकर्ते आपल्या मनातील व्यथा (नाराजी) वरिष्ठांपर्यंत (मुख्यमंत्र्यांपर्यंत) पोहोचवू शकत नाही, असे ही ओमप्रकाश यादव म्हणाले.

Omprakash Yadav: नेहमीच नाराज राहून पक्षातील इतरांना काम न करू देणाऱ्याविरोधात कारवाई करावी

दक्षिण पश्चिम नागपूर मतदारसंघात पदवीधर निवडणुकीसंदर्भात काम होत नाही. संघटनेचे काही स्थानिक नेते इतरांना काम करू देत नाही. ही सर्व परिस्थिती मुख्यमंत्र्यांच्या लक्षात आणून दिली होती, असा दावा ही त्यांनी केला. दरम्यान, काहीही झालं तरी त्या नेत्याचे नाव प्रसार माध्यमांसमोर घेणार नाही. पक्षाने मात्र नेहमीच नाराज राहून पक्षातील इतरांना काम न करू देणाऱ्या त्या नेत्याविरोधात कारवाई करावी, अशी अपेक्षा त्यांनी व्यक्त केलीय. शिवाय सुधाकर कोहळे यांच्या नावासमोर '2' लिहून 9000 मतदारांनी आपले मत अवैध करून घेतले, यामागे मोठे कटकारस्थान असून हे कोणी घडवून आणले याचा शोधही पक्ष श्रेष्ठींनी घ्यावा, अशी मागणी ओमप्रकाश यादव यांनी केली.

काय म्हणालेत ओमप्रकाश यादव? (Omprakash Yadav on Nagpur MLC Election 2026)

नागपूर पदवीधर मतदार संघाच्या अंतर्गत येणाऱ्या मुख्यमंत्र्यांच्या दक्षिण पश्चिम नागपूर विधानसभा मतदारसंघात एका स्थानिक भाजप नेत्याने कार्यकर्त्यांना निवडणुकीचे काम करू दिले नाही. एकट्या मुख्यमंत्र्यांच्या दक्षिण पश्चिम नागपूर मतदारसंघात चार लाख मतदार असून त्यापैकी किमान 50 टक्के मतदार पदवीधर होते. मात्र, भाजप या मतदारसंघात फक्त 24000 पदवीधर मतदारांची नोंदणी करू शकले. त्या कारणामुळेच भाजप पदवीधरांची निवडणूक हरली. मुख्यमंत्र्यांनी दक्षिण पश्चिम नागपूरात पदवीधरांच्या नोंदणीचे निर्देश दिले होते. मात्र त्यांच्याकडे कमी वेळ असल्यामुळे ते स्वतः नोंदणीच्या कामावर प्रत्यक्ष लक्ष ठेवू शकले नाही. काही नेत्यांच्या भरवशावर त्यांनी नोंदणीचे काम सोडले आणि नेमकं तिथेच गफलत झाली. मी कोणाचेही नाव घेत नाही. मात्र, मुख्यमंत्र्यांच्या या मतदारसंघात अनेक स्थानिक नेते असे आहे, ज्यांना वाटते मला मिळाले नाही, तर ते कोणालाही मिळू नये. त्यामुळे तुम्ही समजून घ्या मी कोणाबद्दल बोलत आहे.

Omprakash Yadav : कोणाचाही नाव घेणार नाही. मात्र, पक्षश्रेष्ठींनी याबद्दल चिंतन केले पाहिजे

अशा स्वार्थी ऐन निवडणुकीच्या काळात पक्षात गटबाजी करणाऱ्या त्या नेत्यावर पक्षाने कारवाई करावी. नागपुर पदवीधर मतदारसंघात 9000 मतदारांनी एकसारख्या पद्धतीने सुधाकर कोहळे यांच्या नावासमोर 2 अंक लिहून मत अवैध केले. त्यांना हे कोणी करायला लावले.. याबद्दल पक्षाने चिंतन करायला हवं.9000 मतं एकसारख्या पद्धतीने अवैध होण्यामागे काही ना काही कटकारस्थान निश्चितच आहे. मी छोटा कार्यकर्ता असल्याने हे कोणी करवले याबद्दल कोणाचाही नाव घेणार नाही. मात्र, पक्षश्रेष्ठींनी याबद्दल चिंतन केले पाहिजे.

Navnath Ban and Nilesh Rane: तुझी लायकी किती तू बोलतो किती! निलेश राणेंच्या 'त्या' ट्विटला नवनाथ बन यांचं प्रत्युत्तर, नारायण राणेंसोबतचा फोटो अन् एका ओळीचं कॅप्शन

Mahayuti Crisis: पुणे पदवीधरमध्ये शिवसेनेवर खापर; पण खरी गेम केली राष्ट्रवादीने? पुणे पदवीधरमध्ये भाजपला 'राष्ट्रवादी'ची नाराजी कशी भारी पडली?

मंदार गोंजारी, एबीपी माझा, पुणे — Fri, 30 Oct 2026 11:59:55 +0530

पुणे : पुणे पदवीधरची जागा गमवावी लागल्याने भाजपचे नेते एकनाथ शिंदेंच्या शिवसेनेला दोष (Mahayuti Crisis) देत असल्याचं दिसून येत आहे. मात्र महायुतीतील तिसरा घटक पक्ष असलेल्या राष्ट्रवादी काँग्रेसने (NCP) शांतपणे पदवीधरची जागा गमावल्याचा वचपा काढल्याची चर्चा निकालानंतर आता राजकीय वर्तुळात सुरू आहे. गेल्या वेळी ही जागा राष्ट्रवादीच्या अरुण लाड यांनी जिंकली होती, त्यामुळे ही जागा राष्ट्रवादी काँग्रेसला (NCP) लढवायची होती. कार्यकर्त्यांनी पक्षाच्या नेतृत्वाला त्यासाठी गळ देखील घातली. पण पक्षाचं नेतृत्व त्यासाठी भाजपसमोर उभं राहू शकलं नाही. राष्ट्रवादीची ही नाराजी भाजपच्या लक्षात आल्यावर चंद्रकांत पाटील आणि भाजप नेते ही नाराजी दूर करण्यासाठी राष्ट्रवादीच्या (NCP) पुण्यातील कार्यालयात बैठकीसाठी पोहोचले. मात्र नाराजी दूर झाली नाही.

महायुतीमधल्या भाजप आणि शिवसेना या दोन घटक पक्षांमधल्या भांडणांची आपसातल्या कुरघोडींची चर्चा होते आणि कालपासून दोन्ही बाजूंचे नेते एकमेकांवरती तुटून पडलेत, मात्र या महायुती मधला तिसरा घटक पक्ष असलेला राष्ट्रवादी काँग्रेस, या राष्ट्रवादी काँग्रेसच्या नाराजीची चर्चा आता सुरू आहे, मात्र शिवसेनेपेक्षा देखील सर्वाधिक परिणाम पुणे पदवीधरच्या संदर्भात
खास करून झाला तो या राष्ट्रवादी काँग्रेसच्या नाराजीचा, शांतपणे राष्ट्रवादी काँग्रेसने त्यांच्या नाराजीची परतफेड केली असल्याची चर्चा सुरू आहे, कारण ही जागा राष्ट्रवादी काँग्रेसला लढवायची होती, मागील वेळी अरुण लाड यांच्या माध्यमातून राष्ट्रवादी काँग्रेनेच पुणे पदवीधरची ही जागा जिंकली सुरुवातीला या पक्षाच्या कार्यकर्त्यांनी जागा मागितली, आपण ही लढवायला हवी असं सांगितलं, मात्र राष्ट्रवादी काँग्रेसच नवखं नेतृत्व भारतीय जनता पक्षाच्या समोर उभं राहू शकलं नाही, ही जागा स्वतःकडे घेऊ शकलं नाही, त्यानंतर पडद्यामागच्या हालचालींना सुरुवात झाली, आणि ज्या हर्षदा देशमुख आणि त्यांचे वडील प्रभाकर देशमुख अगदी निवडणुकांच्या आधीपर्यंत राष्ट्रवादी काँग्रेस अजित पवार पक्षामध्ये म्हणजे ज्या पक्षाचे नेतृत्व सुनेत्रा पवार करतायत, त्या पक्षामध्ये सक्रिय होते ते अचानक शरद पवारांच्या राष्ट्रवादी काँग्रेसचे उमेदवार बनल्याचं दिसून आलं.

हर्षदा देशमुख सुनेत्रा पवारांच्या राष्ट्रवादी काँग्रेसच्या कार्यक्रमांना दिसत होत्या, सहभागी होत होत्या. मात्र त्यांनी शरद पवारांच्या राष्ट्रवादी काँग्रेसची उमेदवारी घेतली आणि याला अर्थातच दोन्ही राष्ट्रवादी मधल अंडरस्टँडिंग कारणीभूत ठरल्याचं बोललं जातंय, राष्ट्रवादी काँग्रेस सुनेत्रा पवारांच्या नेतृत्वातील पक्ष अडचणीत आला आणि त्यांनी मदतीसाठी पुन्हा मागे वळून पाहिलं ते शरद पवारांकडे आणि या दोन्ही राष्ट्रवादीच्या अंडरस्टँडिंग मधून या हर्षदा देशमुख या पुणे पदवीधरसाठीचे उमेदवार असतील हे त्यांच्यामध्ये ठरलं आणि त्यानंतर या निवडणुकीला सुरुवात झाली. भारतीय जनता पक्षाच्या ही गोष्ट लक्षात आल्यानंतर सुनेत्रा पवारांची किंवा राष्ट्रवादी काँग्रेसची नाराजी दूर करण्याचा प्रयत्न झाला, ज्या भाजपच्या उमेदवार स्मिता जाधव होत्या त्यांनी या सगळ्या प्रचारादरम्यान किमान एकदा तरी सुनेत्रा पवारांना भेटता यावं यासाठी शर्थीचे प्रयत्न केले, सुनेत्रा पवारांना भेटण्यासाठी अगदी दिल्लीमध्ये देखील त्यांनी प्रयत्न केले, मात्र ही भेट होऊ शकली नाही आणि त्यातून जो संदेश जायचा होता तो राष्ट्रवादी काँग्रेसच्या कार्यकर्त्यांमध्ये नेत्यांमध्ये तो गेला स्वतः चंद्रकांत पाटील यांनी पुण्यातील भाजपच्या नेत्यांना सोबत घेऊन पुण्यातील राष्ट्रवादी काँग्रेसच पक्ष कार्यालय गाठलं, तिथे त्यांनी बैठक घेतली आणि ही नाराजी दूर करण्याचा प्रयत्न केला, मात्र त्याचाही उपयोग झाला नाही. राष्ट्रवादी काँग्रेस पक्ष या निवडणुकीमध्ये सक्रिय होता असं कुठेही दिसलं नाही, मात्र पडद्या आडून काय घडलं हे निवडणुकीच्या निकालाच्या माध्यमातून सगळ्यांनी पाहिलं आणि या हर्षदा देशमुख या महाविकास आघाडीकडून उभारलेल्या उमेदवार तुतारी या चिन्हावरती म्हणजे शरद पवार यांच्या पक्षाकडून निवडून आल्या.

Solapur News: सोलापूर जिल्हा मध्यवर्ती बँकेच्या निवडणुकीची रणधुमाळी, महायुतीत पुन्हा घमासान? भाजप अन् शिवसेना एकमेकांविरोधात उभे राहण्याची शक्यता, आज चित्र स्पष्ट होणार

आफताब शेख, एबीपी माझा — Fri, 30 Oct 2026 10:38:54 +0530

Solapur DCC Bank Election : शिक्षक-पदवीधर विधानपरिषद निवडणुकीनंतर सोलापूर जिल्हा मध्यवर्ती बँकेच्या निवडणुकीत (Solapur DCC Bank Election) ही भाजप आणि शिंदे सेना (BJP-Shivsena) एकमेकांच्या समोर उभे राहण्याची शक्यता आहे. सोलापूर जिल्हा मध्यवर्ती बँकेच्या निवडणुकीसाठी भाजपचे आमदार सचिन कल्याणशेट्टी, आमदार सुभाष देशमुख, भाजप शहराध्यक्ष रोहणी तडवळकर, बाळराजे पाटील, मनीष देशमुख, रणवीर राऊत या नेत्यांनी आपले उमेदवारी अर्ज दाखल केलेत. तर शिवसेना शिंदे गटाचे माजी राज्यमंत्री सिद्धाराम म्हेत्रे आणि जिल्हाप्रमुख अमोल शिंदे यांनी देखील सोलापूर जिल्हा मध्यवर्ती बँकेच्या निवडणुकीत आपले अर्ज दाखल केलेत. त्यामुळे पदवीधर आणि शिक्षक मतदार संघाच्या निकडणुकीत एकमकेंच्या समोर उभे राहिलेले भाजप-शिवसेना पुन्हा एकदा समोर उभं राहणार काय? हे पाहावं लागेल. (Solapur Political Marathi News)

सोलापूर जिल्हा मध्यवर्ती बँकेच्या निवडणूकसाठी अर्ज भरण्यासाठी आज शेवटचा दिवस असल्याने मोठ्या संख्येने अर्ज दाखल होण्याची शक्यता आहे. एकीकडे दुष्काळाच्या पार्श्वभूमीवर ही निवडणूक बिनविरोध करण्यासाठी प्रयत्न सुरु आहेत. मात्र दुसरीकडे सर्वपक्षीय नेत्यांकडून मध्यवर्ती बँकेच्या संचालक पदासाठी अर्ज दाखल केले जातायत. त्यामुळे आज किती अर्ज दाखल होतात आणि निवडणुकीचे चित्र कसे राहणार हे अर्ज छाननी आणि माघार घेण्याच्या प्रक्रियेनंतरच स्पष्ट होणार आहे.

Solapur DCC Bank Election: सत्ताधारी आणि विरोधी पक्षाकडून बैठकींचा धडाका

दरम्यान, सोलापूर जिल्हा मध्यवर्ती बँकेच्या निवडणुकीच्या अनुषंगाने सत्ताधारी आणि विरोधी पक्षाकडून बैठकींचा धडाका सुरु आहे. सोलापुरात भाजप आणि महायुतीची डीसीसी संदर्भात बैठक संपन्न झाली आहे. सोलापुरात पालकमंत्री जयकुमार गोरे यांच्या उपस्थितीत जिल्हा बॅंकेसाठी भाजप आणि महायुतीची बैठक संपन्न झाली. यात भाजपच्या बैठकीमध्ये सचिन कल्याणशेट्टी, राजन पाटील, दीपक साळुंखे-पाटील, राजेंद्र राऊत, दिलीप माने, बाबासाहेब देशमुख, दिग्विजय बागल, रणजितसिंह शिंदे, बबनराव आवताडे उपस्थित होते.तर दुसरीकडे महाविकास आघाडीकडून अकलूजमध्ये खासदार धैर्यशील मोहिते यांनी घेतली शिवरत्न बंगल्यावर बैठक झालीय. या बैठकांच्या माध्यमातून सत्ताधारी आणि विरोधक दोघांकडून मोर्चेबांधणी केली जातेय. त्यामुळे सोलापूर जिल्हा मध्यवर्ती बँकेच्या निवडणुकीतही चुरशीची लढत होण्याची शक्यता आहे.

Ranjitsinh Mohite Patil: बँक सुरक्षित रहावी यासाठी पुन्हा एकदा सर्वांनी एकत्र येण्याचे आवाहन

इकडे दुसऱ्या बाजूला जिल्ह्याचे ज्येष्ठ नेते माजी उपमुख्यमंत्री विजयसिंह मोहिते पाटील यांच्या नेतृत्वाखाली झालेल्या या बैठकीस रणजितसिंह मोहिते-पाटील खासदार धैर्यशील मोहिते पाटील यांच्यासह जिल्ह्यातील अनेक नेते उपस्थित होते. यावेळी अनेक दिवसानंतर रणजीत सिंह मोहिते पाटील हे सक्रिय झाल्याचे समोर आले. आजवर सोलापूर जिल्ह्यातील कोणत्याही सहकार्य क्षेत्राच्या निवडणुकीत पक्षाची बंधने पाळण्यात आली नव्हती. ज्येष्ठांनी घालून दिलेली तीच परंपरा याही वेळी कायम राहावी आणि जिल्ह्यातील अर्थवाहिनी असलेली बँक सुरक्षित रहावी यासाठी पुन्हा एकदा सर्वांनी एकत्र येण्याचे आवाहन रणजितसिंह मोहिते पाटील यांनी केले.

Tanaji Sawant : दुभत्या जनावरांसाठी सरकारी चारा पुरणार नाही, त्यात वाढ करावी; तानाजी सावंतांची मागणी, शेतकऱ्यांना शब्द देत म्हणाले, चारा वाढ केली नाही तर...

Kisan Sangh on BJP : भाजपच्या पराभवाला धान उत्पादक शेतकऱ्यांची नाराजी कारणीभूत; संघ प्रणित भारतीय किसान संघाचा दावा, म्हणाले, सत्ताधाऱ्यांना पुढेही सत्तेत राहायचे असेल तर...

रजत वशिष्ठ, एबीपी माझा — Fri, 30 Oct 2026 08:17:34 +0530

Bharatiya Kisan Sangh Reaction on BJP Defeat : विधान परिषदेच्या ज्या नागपूर विभाग पदवीधर मतदारसंघात (Nagpur Graduate Constituency Election Result 2026) भाजपचा (Kisan Sangh On Nagpur MLC Election) पराभव झाला, त्या मतदारसंघातील सहा जिल्ह्यांपैकी पाच जिल्हे धान उत्पादक (Paddy Growing Farmers) असून विधान परिषद निवडणुकीच्या धक्कादायक निकालामागे धान उत्पादक शेतकरी आणि त्यांच्या शिक्षित मुलांची सरकार संदर्भातील नाराजी एक प्रमुख कारण आहे, असं विश्लेषण संघ प्रणित भारतीय किसान संघाने केला आहे. सत्तेत असलेल्या पक्षांनी लक्षात ठेवावं की त्यांचा जनाधार हळूहळू कमी होत आहे. विद्यमान सत्ताधाऱ्यांना पुढेही सत्तेत राहायचे असेल तर त्यांनी वेळीच सावध व्हावे. कारण शेतकऱ्यांच्या अनेक समस्या असताना ही गेल्या काही वर्षात शेतकऱ्यांसाठी फारसं काही झालेलं नसल्याची भावना धान उत्पादक शेतकऱ्यांची आणि त्यांच्या शिक्षित मुलांची झाली आहे. त्यामुळेच भाजप विरोधातील नाराजी परिषदेच्या मतदानातून परिलक्षित झाल्याची सूचक प्रतिक्रिया भारती किसान संघाचे अखिल भारतीय जैविक प्रमुख नाना आखरे यांनी दिली आहे.

Bharatiya Kisan Sangh: धान उत्पादक शेतकऱ्यांची सरकारकडून हेळसांड; नाराजी मतदानातून परिलक्षित

दरम्यान, धान उत्पादक पट्ट्यातील शेतकऱ्यांनी धानाच्या बोनससाठी अनेक वेळेला राज्य सरकारकडे मागणी केली, निवेदन दिले, आंदोलन केले, मोर्चे काढले. मात्र तरीही विद्यमान राज्य सरकारने धानाच्या बोनस बद्दल शब्द ही काढलेला नाही. आज पूर्व विदर्भातील धान उत्पादक पट्ट्यात प्रत्येक शेतकऱ्याच्या घरी ग्रॅज्युएट मुलं असून सरकार आपला विचार करत नाही, अशी त्यांची भावना झाली आहे. या शिक्षित तरुणांना शेती करणाऱ्या आपल्या आई-वडिलांची अडचण लक्षात येते. त्यामुळेच तरुणांची नाराजी निवडणुकीच्या निकालातून दिसून आल्याचे मत नाना आखरे यांनी व्यक्त केले.

Bharatiya Kisan Sangh: सत्ताधाऱ्यांना पुढेही सत्तेत राहायचे असेल तर त्यांनी वेळीच सावध व्हावे

दरम्यान, या शिक्षित तरुणांच्या शेतकरी वडिलांनी ज्या पक्षाला मत दिले, त्याच पक्षाला मुलगा ही मतदान करेल, असे आवश्यक नाही. शेतकरी सरकारच्या प्राधान्यक्रमावर नाही. सध्या विचित्र कारभार सुरू आहे आणि त्यामुळेच धान उत्पादक पट्ट्यातील शेतकरी कुटुंबातील हजारो शिक्षित तरुण सरकारबद्दल नाराज आहेत. विद्यमान सत्ताधाऱ्यांना पुढेही सत्तेत राहायचे असेल तर त्यांनी वेळीच सावध व्हावे असा सूचक इशाराही नाना आखरे यांनी दिला आहे.

बॅलेटवर निवडणूक तरीही काँग्रेस पराभूत, आता केळाच्या पानावर निवडणूक घ्या अशीही मागणी करतील, भाजप आमदार परिणय फुकेंचा हल्लाबोल

तुषार कोहळे — Thu, 29 Oct 2026 16:50:35 +0530

Parinay Phuke : नागपूर विभाग पदवीधर मतदारसंघाच्या (Nagpur Division Graduates Constituency election results ) अत्यंत अटीतटीच्या आणि प्रतिष्ठित ठरलेल्या निवडणुकीचा निकाल लागला आहे. यामध्ये महाविकास आघाडीकडून काँग्रेसचे उमेदवार अभिजीत वंजारी (Abhijit Vanjari) यांनी बाजी मारली आहे. त्यांनी भारतीय जनता पक्षाचे उमेदवार सुधाकर कोहळे (Sudhakar Kohale) यांचा पराभव केला आहे. चुरशीच्या झालेल्या या लढतीत अभिजीत वंजारी यांनी 3 हजार 271 मतांच्या फरकाने विजय मिळवला आहे. यानंतर भाजपचे आमदार परिणय फुके (Parinay Phuke) यांनी प्रतिक्रिया दिली आहे. नागपूर विभाग पदवीधर निवडणुकीत भारतीय जनता पक्षाला शिंदे शिवसेनेची मते मिळाली नाहीत. त्यामुळं थोडाफार फाटक सुधाकर कोहळेंना बसला आहे. पक्षश्रेष्ठींकडे याचा अहवाल पाठवला जाईल असे फुके म्हणाले.

बॅलेटवर निवडणूक झाली तरी बहुतांश ठिकाणी काँग्रेस पराभूत

ईव्हीएमला घेऊन काँग्रेस ओरडत असते, आता बॅलेटवर निवडणूक झाली तरी बहुतांश ठिकाणी काँग्रेस पराभूत झाली. आता ते बॅलेट विरोधात आंदोलन करुन केळाच्या पानावर निवडणूक घ्या अशी मागणी करेल. 1 नोव्हेंबरचे आंदोलन त्यासाठी असावे, असेही फुके म्हणाले. नागपूर विभाग पदवीधर मतदारसंघाच्या अत्यंत अटीतटीच्या आणि प्रतिष्ठित ठरलेल्या निवडणुकीचा निकाल लागला आहे. यामध्ये महाविकास आघाडीकडून काँग्रेसचे उमेदवार अभिजीत वंजारी यांनी बाजी मारली आहे. यावरुन देखील परिणय फुके यांनी शिंदेच्या शिवसेनेवर टीका केली. भारतीय जनता पक्षाला शिंदे शिवसेनेची मते मिळाली नाहीत. त्यामुळं थोडाफार फाटक सुधाकर कोहळेंना बसल्याची टीका फुके यांनी केली. दरम्यान, राज्यात पाच जागांवर झालेल्या निवडणुकीत महायुतीला 2 जागा मिळाल्या आहेत. यामध्ये पुणे शिक्षक मतदारसंघ आणि अमरावती शिक्षक मतदारसंघाच्या जागांवर विजय मिळाला आहे. तर महाविकास आघाडीचा 3 जागांवर विजय मिळाला आहे.

नागपूरचा गड पुन्हा काबीज करण्यासाठी भाजपने प्रतिष्ठा पणाला लावली होती; मात्र मतांचे बदलते गणित, पक्षांतर्गत नाराजी आणि अपक्ष नितेश कराळे गुरुजी यांच्या दुसऱ्या पसंतीच्या मतांची वंजारी यांना मिळालेली साथ यामुळे भाजपची रणनीती फसल्याचे दिसले. यामध्ये सुधाकर कोहळेंचा पराभव झाला आहे.

Maharashtra Vidhan Parishad Result 2026: कोणत्या पक्षाने कोणती निवडणूक लढवली?

भाजप लढली 3 जिंकली 1.
शिंदे लढले 2 जिंकले 1.
काँग्रेस लढली 2 जिंकली 1.
राष्ट्रवादी शरद पवार लढली 2 जिंकली 2.

एकूण जागा राज्यात 5.
महायुती 2
विरोधी पक्ष 3.

विधान परिषदेच्या पदवीधर आणि शिक्षक मतदारसंघांच्या निवडणुकांचे निकाल समोर आले असून, यामध्ये महाविकास आघाडी आणि महायुती यांच्यात जोरदार रस्सीखेच पाहायला मिळाली आहे.

Sunetra Pawar: पदवीधर, शिक्षक निकालानंतर सुनेत्रा पवारांची पहिली प्रतिक्रिया; म्हणाल्या, 'आम्ही आत्मपरीक्षण करू; सुधारण्याचा प्रयत्न करू...'

मिकी घई, एबीपी माझा — Thu, 29 Oct 2026 15:35:32 +0530

पुणे : विधान परिषदेच्या पदवीधर आणि शिक्षक मतदारसंघांच्या निवडणुकांचे निकाल काल (बुधवारी, ता. 28) समोर आले असून, यामध्ये महाविकास आघाडी आणि महायुती यांच्यात जोरदार रस्सीखेच निर्माण झाली. यामध्ये महाविकास आघाडीने पदवीधरच्या 3 पैकी 3 जागा जिंकल्या, सत्ताधारी महायुतीने शिक्षकांच्या दोन्ही जागा जिंकल्या, तर पाचपैकी फक्त दोन जागा मिळाल्याने महायुतीतील नेत्यांनी याबाबत नाराजी व्यक्त करत पराभवाचं खापर शिवसेनेवर फोडलं आहे, त्याचबरोबर मित्रपक्षाची साथ सुटल्यामुळे महायुतीला फटका बसल्याचा ठपका भाजपने शिवसेनेवर ठेवला आहे. शिवसेनेच्या भूमिकेने महायुतीच्या गणिताला सुरुंग लावल्याचा भाजपचा मित्रपक्षावर आरोप आहे. शिक्षक आणि पदवीधर मतदारसंघांच्या निवडणुकीत पुणे आणि नागपूरमध्ये मित्रपक्ष असलेल्या शिवसेनेने अपेक्षित सहकार्य केले नाही. पुण्यात ऐनवेळी सचिन सानप यांना पाठिंबा देऊन शिवसेनेने महायुतीच्या एकजुटीलाच धक्का दिला. त्यांना मिळालेली मतं पदवीधर निवडणुकीत भाजपला मिळाली नाहीत. तर छत्रपती संभाजीनगरमध्ये अब्दुल सत्तार यांनी तर थेट राष्ट्रवादी काँग्रेसच्या विरोधात प्रचार केला. त्याचाही फटका बसला, असं भाजपचे प्रवक्ते नवनाथ बन (Navnath Ban) यांनी म्हटलं त्यावरती आता राष्ट्रवादी काँग्रेसच्या अध्यक्षा आणि उपमुख्यमंत्री सुनेत्रा पवार यांनी याबाबत प्रतिक्रिया दिली आहे.(Sunetra Pawar)

पुण्यात पत्रकारांशी बोलताना सुनेत्रा पवार म्हणाल्या, कुठल्याही निवडणुकीत जय पराजय असतो. निकाल लागला तरी आत्मपरीक्षण करावं लागतं, आम्ही आत्मपरीक्षण करू. आम्ही सुधारण्याचा प्रयत्न करू. या निकालाने खरोखरच आम्हाला आत्मपरीक्षण करण्याची गरज आहे असे वाटते, अशी प्रतिक्रिया त्यांनी दिली आहे.

Navnath Ban: नवनाथ बन यांचा शिवसेनेवर हल्लाबोल

पदवीधरच्या 3 पैकी 3 जागा गेल्यानंतर नवनाथ बन यांनी शिवसेनेवर टीका केली. सोशल मिडीयावर पोस्ट करत बन म्हणाले, शिक्षक आणि पदवीधर मतदारसंघांच्या निवडणुकीत पुणे आणि नागपूरमध्ये मित्रपक्ष असलेल्या शिवसेनेने अपेक्षित सहकार्य केले नाही. पुण्यात ऐनवेळी सचिन सानप यांना पाठिंबा देऊन शिवसेनेने महायुतीच्या एकजुटीलाच धक्का दिला. त्यांना मिळालेली मतं पदवीधर निवडणुकीत भाजपला मिळाली नाहीत. तर छत्रपती संभाजीनगरमध्ये अब्दुल सत्तार यांनी तर थेट राष्ट्रवादी काँग्रेसलाच्या विरोधात प्रचार केला. त्याचाही फटका बसला. शिवसेनेने महायुतीचा धर्म पाळून भाजप आणि राष्ट्रवादी काँग्रेसला सहकार्य केले असते, तर पाचही जागांवर महायुतीचा विजय झाला असता. मात्र, पुण्यातील एका जागेच्या हव्यासापोटी शिवसेनेने मित्रपक्षांना अडचणीत आणले आणि तीन जागांवरील विजयाची संधी गमावली. एका जागेसाठी मित्रपक्षांचे नुकसान करण्याची भूमिका महायुतीच्या हिताची नाही.

Praful Patel: निकालानंतर काही वेळातच प्रफुल पटेलांची पोस्ट

निकालानंतर काही वेळातच प्रफुल पटेलांनी पोस्ट करत म्हटलं की, आजचे विधान परिषदेचे निकाल हा एक स्पष्ट आणि महत्त्वाचा इशारा आहेत. लोकांचा विश्वास पुन्हा संपादन करण्यासाठी, पक्षाचे प्राधान्यक्रम नव्याने ठरवण्यासाठी आणि संघटनेत सुधारणा करण्यासाठी तातडीने आणि कठोर आत्मपरीक्षण करावे लागेल.

Abdul Sattar : छत्रपती संभाजीनगरमध्ये राष्ट्रवादीच्या उमेदवाराला का पाडलं? अब्दुल सत्तारांनी थेटचं सांगितलं, नवनाथ बन यांच्या आरोपावर म्हणाले, 'माझ्याविरोधात...'

अंकिता खाणे — Thu, 29 Oct 2026 13:41:56 +0530

पुणे : विधान परिषदेच्या पदवीधर आणि शिक्षक मतदारसंघांच्या निवडणुकांचे निकाल काल (बुधवारी, ता. 28) समोर आले असून, यामध्ये महाविकास आघाडी आणि महायुती यांच्यात जोरदार रस्सीखेच निर्माण झाली. यामध्ये महाविकास आघाडीने पदवीधरच्या 3 पैकी 3 जागा जिंकल्या, सत्ताधारी महायुतीने शिक्षकांच्या दोन्ही जागा जिंकल्या, तर पाचपैकी फक्त दोन जागा मिळाल्याने महायुतीतील नेत्यांनी याबाबत नाराजी व्यक्त करत पराभवाचं खापर शिवसेनेवर फोडलं आहे, त्याचबरोबर मित्रपक्षाची साथ सुटल्यामुळे महायुतीला फटका बसल्याचा ठपका भाजपने शिवसेनेवर ठेवला आहे. शिवसेनेच्या भूमिकेने महायुतीच्या गणिताला सुरुंग लावल्याचा भाजपचा मित्रपक्षावर आरोप आहे. शिक्षक आणि पदवीधर मतदारसंघांच्या निवडणुकीत पुणे आणि नागपूरमध्ये मित्रपक्ष असलेल्या शिवसेनेने अपेक्षित सहकार्य केले नाही. पुण्यात ऐनवेळी सचिन सानप यांना पाठिंबा देऊन शिवसेनेने महायुतीच्या एकजुटीलाच धक्का दिला. त्यांना मिळालेली मतं पदवीधर निवडणुकीत भाजपला मिळाली नाहीत. तर छत्रपती संभाजीनगरमध्ये अब्दुल सत्तार यांनी तर थेट राष्ट्रवादी काँग्रेसच्या विरोधात प्रचार केला. त्याचाही फटका बसला, असं भाजपचे प्रवक्ते नवनाथ बन (Navnath Ban) यांनी म्हटलं त्यावरती आता शिवसेना नेते आणि आमदार अब्दुल सत्तार यांनी प्रत्युत्तर दिलं आहे.(Abdul Sattar on Election)

Abdul Sattar on Election : 18 वर्षांमध्ये बदलेलं त्यांचं रूप पाहून नाराजी निर्माण झालेली होती

अब्दुल सत्तार म्हणाले, आधीही सांगितलं आणि आजही मी तितक्यातच जबाबदारीने सांगतो की, ज्या दिवशी मतदान सुरू होतं, त्या दिवशी मी अनेक मतदान केंद्रावर भेटी दिल्या, त्यावेळी पण मला पत्रकारांनी विचारलं की, तुमची भूमिका बदलली आहे का? मी त्यांना सांगितलं की, माझी भूमिका बिल्कुल बदललेली नाही, आणि आज आपण पाहिलं, प्रतापसिंह पाटील विजयी झाले, त्यांच्या विजयामध्ये माझा खारीचा वाटा आहे. पण, बाकीच्या प्रत्येक माणसाला मी त्यावेळी जागरूक करण्याचं काम केलं, कारण सतीश चव्हाण हा प्रत्येकाला किती घातक आहे, आणि कशा पद्धतीने घातक आहे. 18 वर्षे आम्ही ज्या पद्धतीने त्यांच्यासाठी मते मागितली ती मतं मागितल्यानंतर आणि गेल्या 18 वर्षांमध्ये बदलेलं त्यांचं रूप पाहून नाराजी निर्माण झालेली होती. परंतु तरीही त्यांच्या पक्षाचा निर्णय आहे, त्यांना उमेदवारी दिली आणि आम्ही थेट त्यांच्याविरूध्द डायरेक्ट उतरलो. कुठेही लपून छपून प्रचार केला नाही. त्यांचं 18 वर्षांचं साम्राज्य संपलं आहे. आमचा प्रत्येक जो मतदार आहे त्यांनी पदवीधर मतदानामध्ये ईश्वर, अल्लाह, भगवानला साक्षी ठेवून मतदान केलं. सतीश चव्हाण यांनी 18 वर्षांमध्ये कोणतंही काम केलेलं नव्हतं, त्याचा त्यांना हा इनाम मिळाला आहे, असंही सत्तार पुढे म्हणालेत.

Abdul Sattar on Election : बन आणि बनबन काय आहेत, ते मला माहिती नाही

तर महायुतीधर्म पाळला नाही, या नवनाथ बन यांच्या आरोपांवर उत्तर देताना अब्दुल सत्तार यांनी म्हटलं की, पहिल्या पासून मी डायरेक्ट उतरलो होतो, त्यांनी कदाचित पहिल्या विधानपरिषदेला जो मी युतीचा धर्म पाळला, स्थानिक स्वराज्य संस्थेमध्ये शिरसाटांना निवडून आणण्यासाठी मला मुख्यमंत्री, उपमुख्यमंत्री बोलले, आणि मी त्यांच्या आदेशाचं तेव्हा पालन केलं, भाजपचा नेता निवडून आला, त्याची माहिती कदाचित त्यांना माहिती नसेल, बन आणि बनबन काय आहेत, ते मला माहिती नाही, मी त्यांना फार जवळून कधी पाहिलेलं नाही, मी त्यांना टीव्हीवरतीच पाहतो, माझ्याविरोधामध्ये बोलण्याचा अधिकार बन यांना नाही, ज्या पक्षाचे ते प्रवक्ते म्हणून काम करतात, त्यांच्या उमेदवाराला निवडणून आणण्याचं काम मी आधी केलं आहे. त्यामुळं त्यावेळची विधानपरिषदेची परिस्थिती 2 महिन्याआधीची आहे, काही फार वेळ झालेला नाही त्या निवडणुकीला, 2 महिन्याआधीच त्याचा उमेदवार निवडून आणला आहे, त्यावेळी मी युतीचा धर्म का पाळला, कसा पाळला, हेही त्यांना माहिती आहे. या परिस्थितीमध्ये मला असं वाटतं की, बनने मला बोलण्याच्या ऐवजी राष्ट्रवादी काँग्रेसच्या नेत्यांनी आणि प्रवक्त्यांनी याचा थोडा अभ्यास करायला पाहिजे की त्यांच्या उमेदवाराला का पाडलं, याची माहिती त्यांनी घेतली पाहिजे, ही माहिती त्यांनी घेतल्यानंतर मुख्यमंत्री, दोन्ही उपमुख्यमंत्री त्यामधील निर्णय देतील असंही पुढे सत्तार म्हणालेत.

Abdul Sattar on Election : आम्ही आमच्या नाराजीची कारणं आणि माहिती आमच्या पक्षाला देऊ

नागपूरमध्ये सर्वांना सहकार्य केलं, पंरतु पडल्यानंतर आता पराभवाची कारणं काहीतरी शोधावी लागतात, त्यामध्ये आता भाजपचा कुठेतरी गोड गैरसमज झाला, संभाजीनगरमध्ये शिवसेनेने आमचे खासदार, आमदार नेते यांनी सतीश चव्हाणांचं काम केलं, मी आणि माझे मित्र, सहपरिवार यांनी त्यांचं काम केलं नाही. पण, आम्ही आमच्या नाराजीची कारणं आणि माहिती आमच्या पक्षाला देऊ, असंही सत्तार म्हणालेत. ज्यावेळी आपण सत्ताधारी पक्षाचे आमदार असतो आणि तीन पक्षांची सत्ता असताना देखील जे लोक अधिकृतपणाने विरोध करू लागले तर त्याच्या पाठीमागची कारणं शोधणं गरजेचे आहे, आणि आत्मपरिक्षण देखील करणं गरजेचं आहे, असंही पुढे सत्तार यांनी म्हटलं आहे. तर शिकलेली मंडळी आपल्या विरोधात का गेली याचा अभ्यास करणे गरजेचे आहे, आमची नाराजी होती ती आम्ही जाहीरपणे बोलून दाखवली होती, कदाचित सतीश चव्हाण यांच्या ऐवजी राष्ट्रवादीने वेगळा उमेदवार दिला असता तर आजचा निकाल वेगळा लागला असता, असंही पुढे अब्दुल सत्तारांनी म्हटलं आहे.

Nagpur MLC Election Result 2026: नागपूरमध्ये 2 अंकाचा वापर करुन सुधाकर कोहळेंचा घातपात? जेन झी, जातीच्या फॅक्टरमुळे पदवीधरचा निकाल फिरला

रजत वशिष्ठ, एबीपी माझा — Thu, 29 Oct 2026 13:04:04 +0530

Nagpur MLC Election Result 2026: नागपूर विभाग पदवीधर मतदारसंघाच्या निवडणुकीत सलग दुसऱ्यांदा भाजपचा पराभव झाला आहे. काँग्रेस उमेदवार आणि विद्यमान आमदार अभिजीत वंजारी यांनी सुधाकर कोहळे यांचा 3271 मतांनी पराभव केला असला, तरी कोहळे यांना अवैध ठरल्यामुळे मिळू न शकलेल्या सुमारे सात हजार मतांमागे भाजप आणि कोहळे यांचा "करेक्ट कार्यक्रम" करण्याचे काही नियोजन होते का?? निवडणूक आयोगाकडून या निवडणुकीत नोटाचा पर्याय नसताना मतदारांनी स्वतःहून 2 अंकाचा वापर करून आपला मतदान एका प्रकारे नोटा करून घेतला का??? अशी चर्चा सुरू झाली आहे. (Nagpur graduate constituency Election Result 2026)

Nagpur Vidhan Parishad Election 2026: अवैध मतांचा गुंता काय???

नागपूर विभाग पदवीधर मतदार संघाच्या निवडणुकीत भाजप उमेदवार सुधाकर कोहळे यांच्या नावासमोर 1 ऐवजी 2 हे अंक लिहून सुमारे सहा ते सात हजार मतदारांनी मतदान केल्यामुळे कोहळे यांना मिळू शकणारा हजारो मतदान अवैध ठरला आहे... कोहळे यांच्या नावासमोरील डब्यात 1 अंकाऐवजी 2 दिल्यामुळे ह्या सर्व मतपत्रिका अवैध श्रेणीत गेल्या आणि त्यामुळे अवैध मतांचा आकडा ही 15106 पर्यंत वाढला... जर कोणाच्या नावासमोर 2 अंक लिहून मत अवैध करणारे मतदारांनी 1 लिहिले असते तर सुधाकर कोहळे यांना हजारो मत जास्त मिळू शकले असते.. एवढ्या मोठ्या संख्येने मतदारांनी एकसारखी चूक कशी आणि का केली?? का ठरवून केलेला "करेक्ट कार्यक्रम" आहे का??? हा नेमका अपघात आहे की कोणी ठरवून घात केला आहे??? अशीही चर्चा सध्या सुरू आहे.

याच विषयावर 'एबीपी माझा'ने संघाचे ज्येष्ठ स्वयंसेवक आणि माजी भाजप कार्यकर्ते रवी वाघमारे यांच्याशी बातचीत केली. त्यांनीही एवढ्या मोठ्या संख्येने मतदारांनी एकसारख्या पद्धतीने त्यांचा मत अवैध करवून घेणे अपघात नसून घातपात असल्याची शंका व्यक्त केली. भाजप श्रेष्ठींनी याकडे लक्ष घालावे, अशी सूचनाही त्यांनी केली. एवढेच नाही तर अपक्ष नितेश कराळे यांना भाजपला अनुकूल असलेल्या वस्त्यांमध्ये एवढ्या मोठ्या प्रमाणावर मतदान का झाले, याचा आत्मपरीक्षणही भाजप नेतृत्वाने करण्याची गरज असल्याची सूचना त्यांनी केली.

Nagpur RSS news: कुणबी समाजाचा उमेदवार, जेन झी फॅक्टर, नागपूर पदवीधर मतदारसंघाच्या निवडणुकीच्या निकालावर कशाचा परिणाम?

* यंदा मात्र सुधाकर कोहळे यांना हजारो मतदारांनी एक क्रमांकाचा मत न देता दोन क्रमांकाचा मत देऊन आपले मत अवैध करून घेतले हा अपघात नसून घातपात आहे.
* नितेश कराळे यांनाही नागपूरच्या अनेक भाजप अनुकूल वस्त्यांमध्ये मोठ्या प्रमाणावर पहिल्या आणि दुसऱ्या पसंतीचे मत मिळाले याचा विचार भाजपच्या शीर्ष नेतृत्वात करण्याची गरज आहे.
* नितेश कराळेकडे कुठलीही यंत्रणा नसताना त्या तरुणाने एवढं मतदान कसं आणि कोणाचा मिळवला हा मुद्दा विचार करण्यासारखा आहे.
* सुधाकर कोहळे यांना 2 हे अंक लिहून केलेले अवैध मतदान हे कोणीतरी ठरवून केलेले आहे.
* मतदान करताना मतपत्रिकेवर क्रमांक 1 लिहिल्याशिवाय मतदान सुरू होत नाही, तो वैध ठरत नाही, हे ज्या सुज्ञ मतदारांना माहीत होते, त्यांनीच हे जाणून बुजून केले आहे.
* या निवडणुकीमध्ये नोटा हा पर्याय नसतो, त्यामुळे अनेक सुज्ञ मतदारांनी क्रमांक एक न लिहिता क्रमांक 2 हे अंक लिहून स्वतःचा मतदान नोटा करवून घेतलं.
* नोटा याचा पर्याय या निवडणूकित नसताना भाजपच्या हजारो सुज्ञ मतदारांनी सुधाकर कोहळे यांच्या नावासमोर 2 क्रमांक लिहून आपले मत अवैध करवून घेत नोटाचा पर्याय का निर्माण करून घेतला याचा विचार भाजप श्रेष्ठींनी करायला हवा.
* "जेन झी" ला दुर्लक्षित ठेवून चालणार नाही हे नितेश कराडे यांना मिळालेल्या मतदानाने दाखवून दिले.
* पदवीधर मतदारसंघाची निवडणूक जातीवर जाणे दुर्दैवी आहे. मात्र, संदीप जोशींच्या वेळेला निवडणूक जातीवर गेली होती. त्या निवडणुकीला लक्षात घेऊन भाजप यंदा निवडणूक जातीवर जाऊ नये म्हणून कुणबी समाजाच्या सुधाकर कोहळेंना उमेदवारी दिली. मात्र, भाजप श्रेष्ठींचे हे गणित पूर्णपणे चुकल्याचे दिसून आले.

आणखी वाचा

Nagpur MLC Election Result 2026: भाजपचे 'ते' दोन अंदाज चुकले, नितेश कराळेंच्या दुसऱ्या पसंतीच्या मतांनी गणित पालटलं, काँग्रेसचं एक अ‍ॅनालिसिस खरं ठरलं, नागपूर पदवीधर मतदारसंघाच्या निवडणुकीत नक्की काय घडलं?

Navnath Ban : शिवसेनेनं केसानं गळा कापला; भाजपच्या उमेदवाराच्या विरोधात प्रचार; नवनाथ बन यांनी पराभवाचं खापर शिवसेनेवर फोडलं; पुरावे दाखवत म्हणाले, 'धंगेकरांवर कारवाई....'

सचिन गाड — Thu, 29 Oct 2026 12:28:55 +0530

पुणे : नुकत्याच पार पडलेल्या विधान परिषदेच्या पदवीधर आणि शिक्षक मतदारसंघांच्या निवडणुकांचे निकाल समोर आले असून, यामध्ये महाविकास आघाडी आणि महायुती यांच्यात जोरदार रस्सीखेच पाहायला मिळाली. यामध्ये महाविकास आघाडीने पदवीधरच्या 3 पैकी 3 जागा जिंकल्या, सत्ताधारी महायुतीने शिक्षकांच्या दोन्ही जागा जिंकल्या, तर पाचपैकी फक्त दोन जागा मिळाल्याने महायुतीतील नेत्यांनी याबाबत नाराजी व्यक्त केली आहे, त्याचबरोबर मित्रपक्षाची साथ सुटल्यामुळे महायुतीला फटका बसल्याचा ठपका भाजपने शिवसेनेवर ठेवला आहे. शिवसेनेच्या भूमिकेने महायुतीच्या गणिताला सुरुंग लावल्याचा भाजपचा मित्रपक्षावर आरोप आहे. भाजप प्रवक्त नवनाथ बन (Navnath Ban) यांनी पुण्यातील आणि संभाजीनगरमधील पदवीधरच्या जागेवरती शिवसेना पक्षाने घेतलेल्या भुमिकेवर निशाणा साधत हल्लाबोल केला आहे. आधी सोशल मिडीयावरती पोस्ट केली, त्यानंतर आता पत्रकार परिषद घेत शिवसेनेनं धंगेकरांवर कारवाई केली पाहिजे अशी मागणी देखील नवनाथ बन (Navnath Ban) यांनी केली आहे. केसांनी गळा कापण्याचा निर्णय घेतला असेल तर रवींद्र धंगेकरांवर कारवाई केली पाहिजे.(Navnath Ban)

Navnath Ban : ...तर स्मिताताई जाधव पहिल्या फेरीमध्ये विजयी झाल्या असत्या

सचिन सानप यांना मिळालेली ते १५-१६ हजार मतं जर पदवीधर मतदारसंघामध्ये भारतीय जनता पार्टीला ट्रान्सफर झाली असती, तर पुण्याची आमची जागा स्मिताताई जाधव पहिल्या फेरीमध्ये विजयी झाल्या असत्या. परंतु, दुर्दैवानं मित्रपक्षाकडनं एका जागेच्या हव्यासापोटी, ते देखील त्यांची अधिकृत जागा नव्हती, अधिकृत उमेदवार त्यांनी दिला नव्हता, अपक्ष उमेदवाराला पाठिंबा दिल्यामुळं पुण्यामध्ये महायुतीच्या दोन जागापैकी एक जागी पराभव व्हावा लागला. फक्त पुण्यामध्ये फटका बसला असं नाही, छत्रपती संभाजीनगरमध्ये सुमित्राताई पवार यांच्या नेतृत्वाखालील राष्ट्रवादी काँग्रेसनं सतीश चव्हाण यांना पुन्हा एकदा उमेदवारी दिली होती. परंतु, आपल्या सगळ्यांना कल्पना आहे की, छत्रपती संभाजीनगरमध्ये देखील सतीश चव्हाण यांच्या विरोधात जाहीरपणे अब्दुल सत्तार यांनी भूमिका घेतली आणि तिथं देखील मित्रपक्ष असलेल्या शिवसेनने विरोधात काम केलं. (Navnath Ban)

Navnath Ban :एकनाथ शिंदे यांनी रवींद्र धंगेकर यांच्यावर कारवाई केली पाहिजे

पुण्यामधले माझ्याकडे थेट पुरावे आहेत, ज्या पुराव्याच्या माध्यमातून एक गोष्ट स्पष्ट होते की, पुण्यामध्ये जी पदवीधर निवडणूक झाली, त्या पदवीधरांच्या निवडणुकीमध्ये शिवसेनेचे रवींद्र धंगेकर यांनी अधिकृतपणे मतदारांना जाहीरपणे आव्हान केलं,पदवीधरांना त्यांनी जाहीरपणे आव्हान केलं आणि पदवीधरांना काय आव्हान केलं, तर भारतीय जनता पार्टीच्या उमेदवाराला मत देऊ नका. हे कोण सांगतंय? शिवसेनेचे माजी आमदार रवींद्र धंगेकर, जे शिवसेनेचे महानगरप्रमुख पुण्यातले आहेत. हे पुण्यातले महानगरप्रमुख जाहीरपणे पदवीधर निवडणुकीमध्ये मतदारांना आव्हान करतायत की, तुम्ही भारतीय जनता पार्टीच्या स्मिताताई जाधव यांना मतदान करू नका. अशा पद्धतीनं मित्रांनी आणि रवींद्र धंगेकर यांनी केसांनी गळा कापण्याचा निर्णय घेतला असेल, तर मला वाटतं, एकनाथ शिंदे यांनी रवींद्र धंगेकर यांच्यावर कारवाई केली पाहिजे."

Navnath Ban :रवींद्र धंगेकर जिंकल्यानंतर पुन्हा पोस्ट करतात

"पुण्यामध्ये शिक्षक मतदारसंघासाठी तुम्ही पाठिंबा दिला तिथपर्यंत आम्ही समजू शकतो, परंतु जिथं पदवीधर मतदारसंघामध्ये शिवसेनेचा उमेदवार नव्हता, असं असताना रवींद्र धंगेकर जिंकल्यानंतर पुन्हा पोस्ट करतात की, "शाब्बास पदवीधरांनो!" याचा अर्थ तुम्ही भारतीय जनता पार्टीचं पदवीधर मतदारसंघामध्ये काम केलं नाही. काय म्हणतात? योगेश जाधव, तुम्ही आता तरी बोध घेणार का? याचा अर्थ काय? भारतीय जनता पार्टीच्या अधिकृत उमेदवाराच्या विरोधामध्ये जर का अशा पद्धतीचा शिवसेनेचा एक पदाधिकारी, माझा रवींद्र धंगेकरांवर आक्षेप नाही, माझा एकनाथजी शिंदे साहेबांना प्रश्न आहे की, अशा पद्धतीनं रवींद्र धंगेकर तुमचे शिवसेनेचे महानगरप्रमुख आहेत, ते जर का अधिकृतपणे पदवीधरांना आव्हान करत असतील आणि सांगत असतील की तुम्ही भारतीय जनता पार्टीला मतदान करू नका, तर हे अतिशय गंभीर आहे.

Navnath Ban :आम्ही बंडखोर उमेदवारांना ६ वर्षासाठी पक्षातून निलंबित करत असू, तर...

कारण महायुती म्हणून आम्ही अमरावतीमध्ये एकनाथजी शिंदे यांच्या शिवसेनेला पूर्ण मदत केली. अमरावतीत आमच्या काही लोकांनी बंडखोरी करण्याचा प्रयत्न केला, त्या बंडखोरांना ६ वर्षासाठी पक्षातून निलंबन करण्याचं काम प्रदेशाध्यक्ष रवींद्रजी चव्हाण यांनी केलं. जर का आम्ही अमरावतीमध्ये युतीधर्म पाळत असू आणि अमरावतीत आमच्या विरोधात बंडखोरी करणाऱ्याच्या विरोधात जर आम्ही कारवाई करत असू, त्यांना ६ वर्षासाठी पक्षातून निलंबित करत असू, तर अमरावतीमध्ये भारतीय जनता पार्टीने आणि चव्हाण यांनी जी भूमिका घेतली, तीच भूमिका रवींद्र धंगेकर यांच्याबद्दल एकनाथजी शिंदे घेणार आहेत का? असा सवालही नवनाथ बन यांनी उपस्थित केला आहे.

रवींद्र धंगेकर यांच्या अधिकृत पोस्ट आहेत, तुम्ही त्यांचे फेसबुक, इंस्टाग्राम याच्यावर अधिकृतपणे जाऊन चेक करू शकता, रवींद्र धंगेकरांच्या अधिकृत फेसबुकवर, इन्स्टाग्रामवर त्या संदर्भातल्या पोस्ट केलेल्या आहेत आणि सांगितलंय की भारतीय जनता पार्टीला मदत करू नका. पदवीधरांना रवींद्र धंगेकर जाहीरपणे जर आव्हान करत असतील आणि सांगत असतील की भारतीय जनता पार्टीच्या मतदारांना मतांना उमेदवाराला साथ देऊ नका, तर माझा एकनाथजी शिंदे यांना प्रश्न आहे की, एकनाथ शिंदे रवींद्र धंगेकर यांच्यावर नेमकी कारवाई काय करणार आहात? असंही नवनाथ बन यांनी म्हटलं आहे.

"आम्ही खापर फोडत नाही, आम्ही पुरावे देतोय. खापर फोडणं कशाला म्हणतात की, त्याला काही तथ्य नसेल आणि आम्ही हवेत गोलीबार करत असेल, तर त्याला खापर फोडणं म्हणतात. रवींद्र धंगेकर खापर फोडणे या म्हणीचा अर्थ समजून घ्या, तुमचं मराठी कच्चा आहे, कारण तुम्हाला मराठीशी काही देणंघेणं नाहीये. खापर फोडणं कशाला म्हणतात? हे खापर फोडणं नाही, हा पुरावा आहे. तुमचं फेसबुक, इन्स्टाग्राम अकाउंट चेक करा. आता डिलीट केलं तरी हरकत नाही, आमच्याकडे त्याचे स्क्रीनशॉट आहेत. तुमचं फेसबुक, इन्स्टाग्राम अकाउंट आता देखील माध्यमकर्मींनी त्यांच्या फेसबुक, इन्स्टाग्रामवर जाऊन बघावं, की कशा पद्धतीनं भारतीय जनता पार्टीच्या विरोधामध्ये भूमिका रवींद्र धंगेकर यांनी अधिकृतपणे घेतली आहे. याला खापर फोडणं म्हणत नाहीत, याला पुरावे आहेत आणि तुम्ही भारतीय जनता पार्टीच्या विरोधात पदवीधर मतदारसंघामध्ये काम केली."

"अमरावतीमध्ये आम्ही तसं केलं नाही. अमरावतीमध्ये ज्या भारतीय जनता पार्टीच्या लोकांनी बंडखोरी केली, अशा लोकांना पक्षातून एक वर्षासाठी नाही, तर ६ वर्षासाठी निलंबित केलं आणि तो निर्णय घेण्याची हिंमत माननीय प्रदेशाध्यक्ष रवींद्रजी चव्हाण साहेबांनी दाखवली. तुम्ही ती दाखवणार आहात का? रवींद्र धंगेकर यांची याबद्दल भूमिका काय आहे आणि रवींद्र धंगेकरांवर याबद्दल कारवाई होणार आहे का? कारण भारतीय जनता पार्टीच्या विरोधामध्ये उघड भूमिका घेतायत, तुम्ही पत्र काढतायत, तुमच्या फेसबुकवर टाकतायत, इन्स्टाग्रामवर टाकतायत, अशा पद्धतीची उघड भूमिका घेत असताना आणि आपल्याच मित्र पक्षाचा घात जर का अशी काही लोकं झाऱ्यातले शूकराचार्य करत असतील, तर आमचा माननीय एकनाथजी शिंदेवर पूर्ण विश्वास आहे. कारण एकनाथजी शिंदे हे हिंदुत्वासाठी आणि महाराष्ट्राच्या हितासाठी भारतीय जनता पार्टीच्या सोबत आलेले आहेत. त्यामुळं एकनाथजी शिंदे या प्रकरणाला अतिशय गांभीर्यानं घेतील आणि असे कोण झाऱ्यातले शुक्राचार्य असतील, त्यांच्यावर कारवाई करण्याचं काम एकनाथजी शिंदे यांच्या माध्यमातून होईल, ही आम्हाला अपेक्षा आहे. त्यामुळं येणाऱ्या काळामध्ये आम्ही या कारवाईची वाट बघतोय."

Navnath Ban : एकनाथ शिंदेंनी मुख्यमंत्री व्हावं; धंगेकरांच्या वक्तव्यावर बन यांचं उत्तर

"मुळामध्ये महाराष्ट्राचा मुख्यमंत्री कोण व्हावा, याचा निर्णय विधानसभेच्या निवडणुकीला महाराष्ट्राच्या जनतेने दिलाय. भारतीय जनता पार्टी देवेंद्रजींच्या नेतृत्वामध्ये निवडणूक लढली आणि भारतीय जनता पार्टीला १३७ जागांवर स्पष्टपणे बहुमत मिळालं. त्यामुळं रवींद्र धंगेकरांनी सांगून महाराष्ट्राचा मुख्यमंत्री पद बदलत नाही. महाराष्ट्रानं देवाभाऊंना आशीर्वाद दिलेत आणि देवेंद्रजी फडणवीस महाराष्ट्राचं नेतृत्व करण्यासाठी सक्षम आहेत. ते सांगतात की ही सरकारच्या विरोधामध्ये नाराज आहेत. माझा रवींद्र धंगेकरांना सवाल आहे, तुम्ही सरकारी पक्षामध्ये आहात का विरोधी पक्षामध्ये आहात? तुम्ही अद्याप काँग्रेसमध्ये आहात असं तुम्हाला वाटतं का? कारण मधल्या काळामध्ये १२ पक्ष फिरून रवींद्र धंगेकर हे एकनाथ शिंदे यांच्या सोबत आलेत. त्याआधी मनसेमध्ये होते, मध्यंतरी काँग्रेसमध्ये गेले होते आणि आता शिवसेनेत आलेत.

ज्यांचा इतिहासच १२ पक्ष फिरून वेगवेगळ्या ठिकाणी जाण्याचा आहे, त्यांनी देवेंद्रजींवर बोलू नये. महाराष्ट्रानं देवेंद्रजींचं नेतृत्व काय आहे, हे वेळोवेळी सिद्ध केलंय. विधानसभा निवडणुकीमध्ये सिद्ध झाले, महापालिकेच्या निवडणुकीमध्ये सिद्ध झालं, जिल्हा परिषदेच्या निवडणुकीमध्ये सिद्ध झालं. पुण्यामध्ये रवींद्र धंगेकर महापालिकेच्या निवडणुकीमध्ये तुमची काय अवस्था झाली होती, जरा बघा आठवा आणि मग भारतीय जनता पार्टीबद्दल बोला. परंतु, तुम्ही ज्या पद्धतीनं महायुतीच्या विरोधात भूमिका अधिकृतपणे घेतली आहे, शिक्षक मतदारसंघात मी समजू शकतो की, तुमचा उमेदवार होता, पण पदवीधरमध्ये तर तुमचा उमेदवार नव्हता. मग पदवीधरमध्ये रवींद्र धंगेकर असं आव्हान का करू शकतात आणि कोणाच्या सांगण्यावरून करतात? मला वाटतं, याचं उत्तर माननीय एकनाथजी शिंदे साहेबांनी दिलं पाहिजे, की तुम्ही रवींद्र धंगेकरांवर नेमकी कारवाई काय करणार आहात? जर का महायुती म्हणून आपण पुण्याची पदवीधरची निवडणूक लढत असताना, रवींद्र धंगेकर तुमचे महानगरप्रमुख आहेत आणि तुमचे महानगरप्रमुख अशा पद्धतीचं पत्र काढत असतील, मित्रपक्षाला डिवचत असतील तर हे अतिशय गंभीर आहे, त्यामुळं या संदर्भात योग्य ती कारवाई शिवसेनेच्या माध्यमातून झाली पाहिजे."

Navnath Ban : रवींद्र धंगेकर खापर फोडणे या म्हणीचा अर्थ समजून घ्या

याला खापर फोडणं म्हणत नाहीत, याला पुरावे आहेत आणि तुम्ही भारतीय जनता पार्टीच्या विरोधात पदवीधर मतदारसंघामध्ये काम केली. अमरावतीमध्ये आम्ही तसं केलं नाही. अमरावतीमध्ये ज्या भारतीय जनता पार्टीच्या लोकांनी बंडखोरी केली, अशा लोकांना पक्षातून एक वर्षासाठी नाही, तर ६ वर्षासाठी निलंबित केलं आणि तो निर्णय घेण्याची हिंमत प्रदेशाध्यक्ष रवींद्र चव्हाण यांनी दाखवली. तुम्ही ती दाखवणार आहात का? रवींद्र धंगेकर यांची याबद्दल भूमिका काय आहे आणि रवींद्र धंगेकरांवर याबद्दल कारवाई होणार आहे का? कारण भारतीय जनता पार्टीच्या विरोधामध्ये उघड भूमिका घेतायत, तुम्ही पत्र काढतायत, तुमच्या फेसबुकवर टाकतायत, इन्स्टाग्रामवर टाकतायत, अशा पद्धतीची उघड भूमिका घेत असताना आणि आपल्याच मित्र पक्षाचा घात जर का अशी काही लोकं झाऱ्यातले शूकराचार्य करत असतील, तर आमचा एकनाथजी शिंदेवर पूर्ण विश्वास आहे.

कारण एकनाथ शिंदे हे हिंदुत्वासाठी आणि महाराष्ट्राच्या हितासाठी भारतीय जनता पार्टीच्या सोबत आलेले आहेत. त्यामुळं एकनाथजी शिंदे या प्रकरणाला अतिशय गांभीर्यानं घेतील आणि असे कोण झाऱ्यातले शुक्राचार्य असतील, त्यांच्यावर कारवाई करण्याचं काम एकनाथजी शिंदे यांच्या माध्यमातून होईल, ही आम्हाला अपेक्षा आहे. त्यामुळं येणाऱ्या काळामध्ये आम्ही या कारवाईची वाट बघतोय."

"पुण्यामध्ये धंगेकरांनी विरोधात भूमिका घेतली, छत्रपती संभाजीनगरमध्ये आमचा मित्र पक्ष राष्ट्रवादी काँग्रेस होता, तिथं अब्दुल सत्तार यांनी उघडपणे भूमिका घेतली. मला आपल्याकडूनच माहिती मिळाली की, संजय शिरसाट यांनी देखील या संदर्भात काहीतरी असंच विधान केलं होतं. त्यामुळं आपल्या मित्रांना विजयासाठी सहकार्य करायचं का दोघांचं भांडण करून तिसऱ्याचा लाभ मिळून द्यायचा, याचं आत्मपरीक्षण करण्याची गरज आहे. ५ पैकी ५ जागा महायुती सहज जिंकू शकली असती, पेपरवर सगळी आकडेवारी तशी दिसते, परंतु आपल्या मित्र पक्षातील समन्वयाच्या अभावामुळं आणि काही अशा धंगेकरांसारख्या झारीतल्या शुक्राचार्यामुळे जर का आपला पराभव होत असेल, तर याचं आत्मपरीक्षण महायुती म्हणून सगळ्यांनी करण्याची गरज आहे."

Amravati Election 2026 Result: पराभव जिव्हारी लागला अन्...; अमरावतीतील शिवसेनेच्या बंडखोर उमेदवारानं थेट काढली शिक्षकांची लायकी, म्हणाले ‘जशी लायकी तसा प्रतिनिधी, पैठणी अन् पैशांवर...'

प्रणय निर्बाण, एबीपी माझा — Thu, 29 Oct 2026 11:16:23 +0530

अमरावती : अमरावती शिक्षक मतदारसंघाच्या निवडणुकीत शिवसेनेचे बंडखोर उमेदवार आणि माजी आमदार श्रीकांत देशपांडे यांना पराभवाचा सामना करावा लागला. माजी आमदार श्रीकांत देशपांडे हे 7 हजार मत घेत पराभूत झालेत. शिक्षकांची कीव करावीशी वाटते. पैठणी आणि पैशावर शिक्षकांनी (Maharashtra Vidhan Parishad Result 2026) मतदान केल्याचा आरोप देशपांडे यांनी केला आहे. जशी लायकी तसा त्यांना प्रतिनिधी मिळतो अशी टीका देखील त्यांनी केली आहे. शिक्षक आणि निवडून आलेल्या उमेदवाराला त्यांनी शुभेच्छा दिल्या आहेत. श्रीकांत देशपांडे यांना 7 हजार 17 मतांवर समाधान मानावे लागले. या निकालानंतर त्यांनी शिक्षक मतदारांवरच (Maharashtra Vidhan Parishad Result 2026) निशाणा साधल्याने राजकीय वर्तुळात चर्चेला उधाण आले आहे. विजयासाठी मतदारांचा कौल महत्त्वाचा असतो; मात्र पराभवानंतर मतदारांच्या निर्णयावरच प्रश्नचिन्ह उपस्थित केले आहेत.(Maharashtra Vidhan Parishad Result 2026)

अमरावती शिक्षक मतदार संघ निवडणुकीत शिवसेना शिंदे सेनेचे बंडखोर उमेदवार माजी आमदार श्रीकांत देशपांडे यांना 7 हजार 17 मतं मिळाली, देशपांडे यांचा मोठा पराभव झाला. पराभव झाल्यावर देशपांडे यांनी संताप व्यक्त केला आहे. शिक्षकांची कीव करावीशी वाटते, पैठणी अन् पैशांवर शिक्षकांनी मतदान केलं, अशा शब्दात पराभूत उमेदवार श्रीकांत देशपांडे यांनी गंभीर आरोप केला आहे.तर जशी लायकी तसा त्यांना प्रतिनिधी मिळतो, असं म्हणत देशपांडे यांनी काढली थेट मतदारांची लायकी काढली. शिक्षक आणि निवडून आलेल्या उमेदवाराला शुभेच्छा देखील देशपांडे यांनी दिल्या आहेत.7 हजार लोक प्रामाणिक राहिले बाकी लोकांचं काय, बाकी सगळ्यांनी त्यांची मतं विकली याचं वाईट वाटतं अशी खंत देखील श्रीकांत देशपांडे यांच्याकडून व्यक्त करण्यात आली आहे.(Maharashtra Vidhan Parishad Result 2026)

श्रीकांत देशपांडे पराभवानंतर म्हणाले, "महायुतीच्या उमेदवाराचं अभिनंदन. कारण युद्ध कोणत्या पद्धतीने जिंकलं जातं हे पाहिलं जात नाही. परंतु शिक्षकांची खरोखर कीव करावीशी वाटते की पैठणी आणि पैसे यावर शिक्षकांनी मतदान केलं. जनतेची जी लायकी असते तसा प्रतिनिधी त्यांना मिळतो. तसा त्यांना तो मिळाला आहे. त्यामुळे त्यांना ही शुभेच्छा आणि उमेदवार निवडून आलेल्या उमेदवाराला ही शुभेच्छा तुमच्या माध्यमातून देतो. पराभव स्वीकारावाच लागेल. शेवटी पराभव तो पराभवच असतो. ७ हजार लोक प्रामाणिक राहिले. बाकी लोकांचं काय? बाकी सर्वांनी त्यांची मतं विकली, ज्याचं प्रचंड वाईट वाटतं."

Maharashtra Vidhan Parishad Result 2026: अमरावतीत पोहेरेचा पराभव, शिंदेसेनेचे सरनाईकच नायक

अमरावती विभाग शिक्षक मतदारसंघात महायुतीमध्ये शिंदेसेनेचे किरण सरनाईक दुसऱ्या पसंतीक्रमाच्या अखेरच्या बाद फेरीत विजयासाठी आवश्यक 16,134 मतांचा कोटा पार करीत विजयी झाले. त्यांनी महाविकास आघाडीच्या प्रा. अदिती पोहेरे यांचा पराभव केला व मतदारसंघ पुन्हा राखला. पहिल्या पसंतीच्या फेरीपासून सरनाईक यांनी आघाडी घेतली होती. मात्र, विजय साकार करण्यास त्यांना 24 व्या बाद फेरीपर्यंत संघर्ष करावा लागला. तब्बल 32 तास सुरू असलेल्या या मतमोजणीमध्ये त्यांनी 16,663 मते मिळवित विजय मिळवला.

Maharashtra Vidhan Parishad Result 2026: कोणत्या पक्षाने कोणती निवडणूक लढवली?

एकूण जागा राज्यात 5.
महायुती 2
विरोधी पक्ष 3.