HSC Exam Mass Copying Case: जैतापूर सामूहिक कॉपी प्रकरण शिक्षकांना चांगलंच भोवणार, राज्य सरकारकडून गंभीर दखल, मोठी कारवाई होणार

HSC Exam Mass Copying Case: छत्रपती संभाजीनगर जिल्ह्यातील जैतापूर (ता. कन्नड) येथील बारावीच्या परीक्षा केंद्रावर घडलेल्या सामूहिक कॉपी प्रकरणामुळे राज्यभरात खळबळ उडाली आहे.

HSC Exam Mass Copying Case

Source : ABP Majha

HSC Exam Mass Copying Case: छत्रपती संभाजीनगर (Chhatrapati Sambhajinagar) जिल्ह्यातील जैतापूर (ता. कन्नड) येथील बारावीच्या परीक्षा केंद्रावर घडलेल्या सामूहिक कॉपी प्रकरणामुळे राज्यभर खळबळ उडाली असून, या प्रकरणात मोठी व कठोर कारवाई होण्याची शक्यता व्यक्त केली जात आहे. विशेष म्हणजे सीसीटीव्ही कॅमेऱ्यांच्या देखरेखीखालीच विद्यार्थ्यांना सामूहिकरित्या कॉपी पुरवली जात असल्याचे दृश्य समोर आल्याने शिक्षण व्यवस्थेवर गंभीर प्रश्नचिन्ह निर्माण झाले आहे.

या घटनेची राज्य सरकारने (Maharashtra Government) तातडीने आणि गंभीर दखल घेतली आहे. राज्याचे शालेय शिक्षण राज्यमंत्री पंकज भोयर यांनी संबंधित शिक्षण संस्था चालक, केंद्रप्रमुख आणि शिक्षकांवर कठोरात कठोर कारवाईचे निर्देश दिले आहेत. दरम्यान, या संपूर्ण प्रकरणाचा सविस्तर अहवाल राज्य शिक्षण मंडळाकडे सादर करण्यात आला असून, परीक्षेनंतर विभागीय स्तरावर समितीमार्फत सखोल चौकशी होणार आहे.

HSC Exam Mass Copying Case: दोषी आढळल्यास परीक्षा केंद्रच रद्द होणार

चौकशीत दोष सिद्ध झाल्यास संबंधित परीक्षा केंद्राची मान्यता रद्द करणे, भविष्यात त्या केंद्राला परीक्षा घेण्यास कायमस्वरूपी अपात्र ठरवणे, तसेच संबंधित अधिकारी व शिक्षकांवर शिस्तभंग व कायदेशीर कारवाई केली जाण्याची शक्यता आहे. या प्रकरणात विद्यार्थ्यांच्या भवितव्याशी खेळ करणाऱ्यांना कोणतीही सवलत दिली जाणार नाही, असा स्पष्ट संदेश सरकारकडून देण्यात आला आहे.

HSC Exam Mass Copying Case: ‘कॉपीमुक्त’ अभियानाचा पहिल्याच दिवशी फज्जा

राज्यात 10 फेब्रुवारीपासून बारावीच्या बोर्ड परीक्षांना सुरुवात झाली असली, तरी पहिल्याच दिवशी ‘कॉपीमुक्त परीक्षा’ या शासनाच्या अभियानाला मोठा धक्का बसला आहे. काही परीक्षा केंद्रांवर खुद्द अधिकारी आणि पर्यवेक्षकच विद्यार्थ्यांना कॉपी पुरवत असल्याचे सीसीटीव्ही फुटेजमध्ये स्पष्टपणे दिसून आले आहे. त्यामुळे पालकांमध्ये तीव्र संताप व्यक्त होत आहे. या पार्श्वभूमीवर शालेय शिक्षणमंत्री दादा भुसे यांनी आक्रमक भूमिका घेतली आहे. ज्या केंद्रांवर असे गैरप्रकार घडले आहेत, त्यांची मान्यता तात्काळ रद्द केली जाईल आणि भविष्यात त्यांना पुन्हा परीक्षा केंद्र म्हणून परवानगी दिली जाणार नाही, असा इशारा त्यांनी दिला आहे. तसेच केवळ विद्यार्थीच नव्हे, तर केंद्रप्रमुख, पर्यवेक्षक आणि गरज भासल्यास पालकांवरही कायदेशीर कारवाई केली जाईल, असेही त्यांनी स्पष्ट केले.

HSC Exam Mass Copying Case: 19 जण निलंबित; आणखी कारवाईची शक्यता

जैतापूर येथील राष्ट्रीय माध्यमिक व उच्च माध्यमिक विद्यालयात बारावीच्या इंग्रजी विषयाच्या पेपरमध्ये सामूहिक कॉपी केल्याप्रकरणी शिक्षण विभागाने 19 जणांना निलंबित केले आहे. यात झेडपीचे 3 शिक्षक, 2 केंद्रसंचालक, 17 पर्यवेक्षक आणि बैठ्या पथकातील सदस्यांचा समावेश आहे. काही खासगी शिक्षण संस्थांचे कर्मचारीही या कारवाईच्या कक्षेत आले आहेत. या केंद्रावर 14 वर्गांमध्ये सुमारे 370 विद्यार्थी परीक्षा देत होते.

आणखी वाचा