Shirdi Crime: शिर्डीत साई मंदिराच्या प्रवेशद्वारासमोर काकडी विक्रेत्या महिलेवर महिलांकडूनच जीवघेणा हल्ला, भयंकर घटनेमुळे खळबळ
Shirdi Crime: साई मंदिराच्या चार नंबर प्रवेशद्वारासमोर भरगर्दीच्या ठिकाणी काकडी-कैरी विकणाऱ्या एका 30 वर्षीय महिलेवर प्राणघातक हल्ला करण्यात आल्याने शिर्डीत एकच खळबळ उडाली आहे.
Shirdi Crime: साईबाबांच्या (Sai Baba) शिर्डी (Shirdi) शहरात एक अत्यंत धक्कादायक प्रकार समोर आला आहे. साई मंदिराच्या (Sai Temple) चार नंबर प्रवेशद्वारासमोर (Gate Number 4) भरगर्दीच्या ठिकाणी काकडी-कैरी विकणाऱ्या एका 30 वर्षीय महिलेवर धारदार शस्त्राने प्राणघातक हल्ला करण्यात आला आहे. या घटनेमुळे मंदिर परिसरात आणि स्थानिक व्यापाऱ्यांमध्ये एकच खळबळ उडाली आहे.
जयश्री साईनाथ क्षीरसागर (वय 30) असे या हल्ल्यात गंभीर जखमी झालेल्या महिलेचे नाव आहे. हल्ल्यानंतर त्यांना तातडीने साई संस्थानच्या (Sai Sansthan) सुपर स्पेशालिटी रुग्णालयात (Super Specialty Hospital) उपचारासाठी दाखल करण्यात आले असून, त्यांची प्रकृती चिंताजनक असल्याचे समजते.
Shirdi Crime: नेमकी घटना काय?
याबाबत मिळालेल्या प्राथमिक माहितीनुसार, जयश्री क्षीरसागर या साई मंदिराच्या गेट समोर गेल्या अनेक दिवसांपासून काकडी आणि कैरी विकण्याचा व्यवसाय करतात. रविवारी नेहमीप्रमाणे गर्दी असताना अचानक 3 ते 4 अज्ञात महिलांनी त्यांच्यावर धारदार शस्त्राने अचानक वार केले. हा हल्ला इतका भीषण होता की, क्षीरसागर या जागेवरच रक्ताच्या थारोळ्यात कोसळल्या. घटनेची माहिती मिळताच शिर्डी पोलिसांनी (Shirdi Police) घटनास्थळी धाव घेत पंचनामा केला असून, गुन्हा दाखल करण्याची प्रक्रिया उशिरापर्यंत सुरू होती.
Shirdi Crime: हल्ल्याचे कारण अस्पष्ट; पोलिसांकडून तपास सुरू
अतिशय वर्दळीच्या आणि सुरक्षेच्या दृष्टीने संवेदनशील असलेल्या साई मंदिर परिसरात हा प्रकार घडल्याने सुरक्षा व्यवस्थेवर मोठे प्रश्नचिन्ह उपस्थित झाले आहे. दरम्यान, या हल्ल्याचे नेमके कारण काय होते, हे अद्याप स्पष्ट झालेले नाही. पोलीस या प्रकरणाचा पुढील तपास करत आहेत.
Shirdi Crime: आपली शिर्डी सुरक्षित आहे का? जखमी महिलेच्या पतीचा संतप्त सवाल
या घटनेनंतर जखमी जयश्री क्षीरसागर यांच्या पतीने माध्यमांशी बोलताना आपले दुःख आणि रोष व्यक्त केला. "माझी पत्नी साई मंदिर परिसरात काकडी-कैरी विकण्याचा बऱ्याच दिवसांपासून व्यवसाय करते. माझ्या पत्नीवर हल्ला झाल्याने माझी पत्नीची तब्बेत अत्यंत गंभीर आहे. साई मंदिर परिसरात महिला चाकू घेऊन फिरायला लागल्या आहेत. आपली शिर्डी सुरक्षित आहे का? तीन-चार मुलींनी माझ्या पत्नीला चाकू मारल्याची माहिती मला मिळाली. माझ्या पत्नीचे कुणासोबत काहीच वाद नाही. नेमके या घटनेचे कारण काय? याबाबत मला काहीच माहिती नाही," अशी प्रतिक्रिया जखमी महिलेच्या पतीने दिली आहे.
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा
महत्त्वाच्या बातम्या
