Pune Nagpur Dj : नियमांचे उल्लंघन, कायद्याचा वचक; पुण्यात 10 दहीहंडी मंडळांवर गुन्हे. तर 116 मंडळांवर न्यायालयीन खटले, नागपुरातही ध्वनिप्रदूषणप्रकरणी तीन गुन्हे दाखल
Pune Nagpur Dj : पुणे शहरातील काही दहीहंडी मंडळांनी नियमांचं उल्लंघन केल्या प्रकरणी आता कारवाईचा बडगा उगारला आहे. दुसरीकडे नागपुरात शोभायात्रेत ध्वनिप्रदूषण झाल्यानं गुन्हा दाखल करण्यात आला आहे.
Pune Nagpur Dj : गणेशोत्सव आणि आगामी सण-उत्सवात सार्वजनिक ठिकाणी वाजणाऱ्या डीजेला आणि रहदारीला विरोध करत पुण्यातील सजग नागरिक असलेल्या विद्यानंद बापट (Vidyanand Bapat) यांनी ठाम भूमिका घेतली. अशातच त्यांच्या या भूमिकेचं समार्थन आणि विरोधाचा सूर सध्या राज्यात ऐकू येतो आहे. असे असताना सण उत्सवातील डीजे आणि डॉल्बी बंदी बाबत प्रशासनाने ठोस नियम घालून दिले आहेत. तसेच नियमांचे उल्लंघन केल्यास कारवाईचा इशारा देखील देण्यात आला आहे. असे असतांना पुणे शहरातील (Pune Crime) काही दहीहंडी मंडळांनी नियमांचं उल्लंघन केल्या प्रकरणी आता कारवाईचा बडगा उगारला आहे. पुण्यात (Pune)10 दहीहंडी मंडळांवर गुन्हे (Pune Crime) दाखल करण्यात आले आहे. तर 116 मंडळांवर न्यायालयीन खटले दाखल करण्यात आले आहे.
Pune Crime News : कारवाईत चार प्लाझ्मा, चार प्रेशर मिडसह 6 ध्वनियंत्रणा जप्त
दरम्यान, पुणे पोलिसांनी केलेल्या या कारवाईत चार प्लाझ्मा, चार प्रेशर मिडसह 6 ध्वनियंत्रणा जप्त करण्यात आले आहे. दहीहंडीत नियमांचे उल्लंघन करणाऱ्या मंडळांवर ही कारवाई करण्यात आली आहे. लाऊडस्पिकरच्या कर्णकर्कश आवाजाला पुणेकरांचा वाढता विरोध आणि पोलिसांनी घालून दिलेली ‘चार बेस, चार टॉप’ची मर्यादा ओलांडणाऱ्या मंडळांवर आता कारवाईचा बडगा उगारण्यात आला आहे. पुणे शहराचा मध्यवर्ती भाग असलेल्या परिमंडळ एकच्या हद्दीत सर्वाधिक म्हणजे 55 मंडळावर खटले दाखल करण्यात आले आहेत. दहीहंडी उत्सवाच्या पार्श्वभूमीवर पुणे पोलिसांनी शहरातील तब्बल 1 हजार 100 मंडळांच्या ध्वनीच्या तीव्रतेचे पातळी तपासली होती. या नोंदींचे परीक्षण करून निर्धारित ध्वनिमर्यादेचे उल्लंघन झाल्यामुळे संबंधित मंडळांवर गुन्हे दाखल करण्यात आले आहे.
Pune Crime : पुणे शहरातील परिमंडळ व दाखल खटले
परिमंडळ 1: 55
परिमंडळ 2: 23
परिमंडळ 3: 10
परिमंडळ 4: 0
परिमंडळ 5: 0
परिमंडळ 6: 27
परिमंडळ 7: 1
Nagpur Crime: विश्व हिंदू परिषदेच्या शोभायात्रेत ध्वनिप्रदूषण; वेगवेगळ्या कारवाईत तीन गुन्हे दाखल
दुसरीकडे नागपुरात विश्व हिंदू परिषदेच्या शोभायात्रेत ध्वनिप्रदूषण झाल्यानं सितांबर्डी पोलिसात गुन्हा दाखल करण्यात आला आहे. तर इतर दोन वेगवेगळ्या कारवाईत एकूण तीन गुन्हे दाखल करण्यात आले आहे. नागपूर शहरात डीजे आणि विविध साऊंड सिस्टिमवर बंदी असतानाही विहिंपच्या शोभायात्रेत ध्वनिप्रदूषण झाल्याचा प्रकार समोर आला आहे. विश्व हिंदू परिषदेच्या स्थापनादिना निमित्त रविवारी शहरात शोभायात्रा काढण्यात आली होती. या शोभायात्रेत निर्धारित मर्यादेपेक्षा अधिक आवाजात डॉल्बी वाजवण्यात आल्याचे पोलिसांच्या तपासणीत आढळले. परिणामी सीताबर्डी पोलिसांनी या प्रकरणात तीन स्वतंत्र गुन्हे दाखल केले आहेत.
Nagpur News : नागपूर शहरात ध्वनिप्रदूषणप्रकरणी झालेली ही पहिलीच कारवाई
दरम्यान, पहिल्या कारवाईत वाहनावरील साऊंड सिस्टिम तब्बल 98.6 डेसिबल आवाजात वाजत असल्याचे आढळले. याप्रकरणी महाल येथील सागर मोरेश्वर बारसिंगे यांच्याविरुद्ध गुन्हा दाखल करण्यात आला आहे. दुसऱ्या कारवाईत छोटी मशीद परिसरात साऊंड सिस्टिमचा आवाज 101.5 डेसिबल असल्याचे तपासणीत समोर आले. या ठिकाणी लेझर बीमचाही वापर करण्यात आल्याने अजय सोमकुंवर यांच्याविरुद्ध गुन्हा दाखल करण्यात आला आहे. तिसऱ्या कारवाईत पकोडे गल्ली परिसरात साऊंड सिस्टिम 94.7 डेसिबल आवाजात वाजवण्यात येत असल्याचे आढळले. या ठिकाणीही लेझर बीमचा वापर करण्यात आल्याने अज्ञात चालकाविरुद्ध गुन्हा दाखल करण्यात आला आहे. पोलीस आयुक्तांनी डीजे, डॉल्बी, प्लाझ्मा आणि प्रेशर मिड साऊंड सिस्टिमच्या वापरावर बंदी घातली आहे. बीम लाईट आणि लेझर बीम लाईटच्या वापरावरही पोलिसांनी निर्बंध लागू केले आहेत. बंदीनंतर नागपूर शहरात ध्वनिप्रदूषणप्रकरणी झालेली ही पहिलीच कारवाई असल्याची माहिती समोर आली आहे.
इतर महत्वाच्या बातम्या
महत्त्वाच्या बातम्या
