Ketan Agrawal Murder Case Dr Muskan Soni Suspended: पुण्याच्या (Pune) लोहगड (Lohagad) किल्ल्यावर ट्रेकिंगला गेलेल्या केतन अग्रवालचा (Ketan Agarwal) पाय घसरून दरीत पडून मृत्यू झाल्याची धक्कादायक घटना घडलेली. सुरुवातीला अपघात वाटणाऱ्या या घटनेनं सर्वांना अक्षरशः हादरवून सोडलं. पुणे पोलिसांच्या (Pune Police) तपासात एक अत्यंत खळबळजनक आणि थरारक खुलासा झाला. हा अपघात नसून, होणाऱ्या पत्नीनंच आपल्या प्रियकराच्या मदतीनं रचलेला हा एक थंड डोक्यानं केलेला 'मर्डर प्लॅन' (Ketan Agarwal Murder Case) असल्याचं निष्पन्न झालं. अग्रवाल कुटुंबात लग्नाची तयारी सुरू असताना, प्रेमातील अडसर दूर करण्यासाठी केतनची भावी पत्नी सिया गोयल आणि तिचा प्रियकर चेतन चौधरी (Chetan Chaudhary) या दोघांनी मिळून केतन अग्रवालची लोहगड किल्ल्यावरून दरीत ढकलून हत्या केल्याचं तपासाअंती स्पष्ट झालं. सियाचा वाढदिवस साजरा करण्यासाठी केतन लोहगडावर गेला होता. यावेळी फोटोसाठी पोज देताना सियाच्या प्रियकरानं केतनला दरीत ढकललं. केतनची हत्या एक अपघात असल्याचा प्लॅन होता असं सिया आणि तिच्या प्रियकराला दाखवायचं होतं. पण एका सीसीटिव्हीत या दोघांच्या संशयास्पद हालचाली कैद झाल्यानं दोघांनी केतनची हत्या केल्याचं उजेडात आलं. सिया गोयल आणि तिचा प्रियकर चेतन चौधरी यांना अटक करण्यात आलीय.
केतन अग्रवाल आणि सिया गोयल (Siya Goyal) यांचा फेब्रुवारी महिन्यात साखरपुडा झाला. नोव्हेंबरमध्ये हे दोघे बोहल्यावर चढणार होते. त्यासाठी जयपूरमध्ये 14 कोटींचा पॅलेस आणि दोन खासगी विमानं बुक करण्यात आलेली. मात्र त्याआधी काहीही करून केतनचा काटा काढण्याचं सियानं आणि चेतननं ठरवलं आणि लोहगडावरुन ढकलून त्याची हत्या केली. आता या प्रकरणानं संपूर्ण देशभरात संतापाची लाट उसळलीय. सिया आणि चेतनला फाशीची शिक्षा देण्यात यावी, अशी मागणी केतनचे कुटुंबीय करत आहेत. तसेच, इतरही अनेकजण सिया गोयलला कठोरता कठोर शिक्षा दिली जावी, अशी मागणी करत आहेत. देशभरातून केतनला न्याय मिळावा, असा एकच सूर ऐकू येतोय. पण, अशातच एका डॉक्टर महिलेनं मात्र केतन अग्रवाल प्रकरणाची खिल्ली उडवणारा एक व्हिडीओ सोशल मीडियावर शेअर केलाय.
केतन अग्रवाल प्रकरणाची खिल्ली उडवणाऱ्या डॉक्टरवर शिस्तभंगाची कारवाई
पुण्यातील व्यावसायिक केतन अग्रवालच्या धक्कादायक हत्या प्रकरणाची एका डेंटिस्ट असलेल्या महिलेनं खिल्ली उडवलीय. एका संतापजनक पोस्टद्वारे हिंसेचं समर्थन करणाऱ्या डॉ. मुस्कान सोनी या डेंटल डॉक्टर तरुणीवर ऑल इंडिया डेंटल स्टुडंट्स अँड सर्जन्स असोसिएशननं AIDSA कठोर कारवाई केली आहे. या डॉक्टर महिलेवर शिस्तभंगाची कारवाई करण्यात आली आहे. तसेच, पाच वर्षांसाठी तिचं निलंबन करण्यात आलंय. केतन अग्रवालच्या दुर्दैवी मृत्यूनंतर, डॉ. सोनी यांनी आपल्या इन्स्टाग्राम अकाऊंटवर या घटनेची थट्टा करणारी एक 'स्टोरी' पोस्ट केल्याचा आरोप आहे. संघटनेनं ही पोस्ट अत्यंत आक्षेपार्ह, अपमानजनक आणि संघटनेच्या नैतिक मूल्यांशी विसंगत असल्याचं मानलंय.
व्हायरल व्हिडीओमध्ये मुस्कान नेमकं काय म्हणालेली?
डेंटल असलेल्या डॉ. मुस्कान सोनी हिच्या व्हायरल व्हिडीओमध्ये असं ऐकू येतंय की, "तो माणूस टक्कल असलेला होता. अशा पुरुषांनी मरायलाच हवं, #Ihatemen. दोन जणांचा मृत्यू झालाय आणि संपूर्ण समाज दहशतीखाली आहे..." हा व्हिडीओ प्रचंड व्हायरल झाला आणि मुस्कान सोनीला जोरदार ट्रोल केलं जाऊ लागलं. ट्रोलिंग वाढल्यानंतर सोनीनं एक व्हिडीओ शेअर केला आणि माफी मागितली.
इतक्या संवेदनशील विषयाची थट्टा करण्याचा तिचा कोणताही हेतू नव्हता, असं तिनं स्पष्ट केलं. ती म्हणाली, "मी वापरलेल्या शब्दांसाठी मनापासून माफी मागते... लिंगाच्या आधारावर मी कधीही कोणाचाही अवमान करत नाही... मी माझ्या पोस्ट्समध्ये #ihatemen हा हॅशटॅग वापरते हे खरंय. तो काढून टाकण्याची माझी तयारी आहे. मात्र, माझ्या आयुष्यात घडलेल्या काही विशिष्ट घटनांमुळेच मला हा हॅशटॅग वापरावा लागला..."
सोनीनं आरोप केला की, तिला शाब्दिक छळाचा सामना करावा लागत आहे आणि लोक तिला 'स्लट' (Slut) आणि 'वेश्या' यांसारखी अपमानास्पद विशेषणं लावत आहेत. तिनं ट्रोल करणाऱ्यांना हे वागणं थांबवण्याचं आवाहन केलंय.
महत्त्वाच्या इतर बातम्या :