Pune Crime News: वर्गमैत्रिणीसोबत प्रेमसंबंधाचा संशय, तरुणाला भररस्त्यात पाठलाग करून संपवलं, पुण्यातील धक्कादायक घटना
Pune Crime News: वर्गमैत्रिणीसोबत प्रेमसंबंध असल्याच्या संशयातून एका तरुणाचा भररस्त्यात पाठलाग करत त्याला संपवण्यात आल्याची धक्कादायक घटना पुण्यातील बाणेर परिसरात घडली आहे.
Pune Crime News: वर्गमैत्रिणीसोबत प्रेमसंबंध (Love Relationship) असल्याच्या संशयातून एका तरुणाचा भररस्त्यात पाठलाग करत लोखंडी हत्याराने वार करून त्याला संपवण्यात आल्याची धक्कादायक घटना पुण्यातील (Pune) बाणेर (Baner) परिसरात घडली आहे. गुरुवारी (6 ऑगस्ट) सकाळी सुमारे 12 वाजण्याच्या सुमारास रायकर फार्म (Raikar Farm) येथील ब्रह्मकुमारी सेंटर परिसरात ही घटना घडली. या घटनेमुळे परिसरात एकच खळबळ उडाली आहे.
या प्रकरणी बाणेर पोलिसांनी (Police) सोलोमन सूर्यभान शेंडगे (वय 52) याला अटक केली आहे. तर घनश्याम संजय रायकर असे मृत्यू झालेल्या तरुणाचे नाव आहे. याप्रकरणी संजय कृष्णाजी रायकर यांनी बाणेर पोलीस ठाण्यात फिर्याद दिली आहे.
Pune Crime News: वर्गमैत्रिणीवर एकतर्फी प्रेम, नकारानंतर सुरू झाला त्रास
पोलिसांनी दिलेल्या माहितीनुसार, आरोपी सोलोमन शेंडगे याचे रायकर मळा परिसरातील एका तरुणीवर एकतर्फी प्रेम होते. संबंधित तरुणी ही त्याची वर्गमैत्रीण होती. आरोपीने अनेक वेळा तिच्याकडे लग्नाची मागणी घातली होती. मात्र, तरुणीने त्याला स्पष्ट नकार दिला होता. नकार मिळाल्यानंतरही आरोपी तिचा सतत पाठलाग करत होता. तसेच, अश्लील संदेश पाठवून मानसिक त्रास देत होता. याशिवाय, "तुझे घनश्याम रायकर याच्यासोबत प्रेमसंबंध आहेत," असा संशय व्यक्त करून तो वारंवार तरुणीला त्रास देत असल्याचे प्राथमिक तपासात समोर आले आहे.
Pune Crime News: घराबाहेर बोलावून केला हल्ला
आरोपीच्या सततच्या त्रासामुळे संबंधित तरुणी आणि घनश्याम रायकर दोघेही त्रस्त झाले होते. आरोपीचा छळ थांबला नाही तर पोलिसांत तक्रार करू, अशी भूमिका त्यांनी घेतली होती. याचाच राग आरोपीच्या मनात होता. गुरुवारी सकाळी आरोपीने घनश्याम रायकर याला रायकर मळा परिसरातील घराबाहेर बोलावले. त्यानंतर त्याच्यावर लोखंडी हत्याराने वार केले. गंभीर जखमी झालेला घनश्याम जीव वाचवण्यासाठी पळू लागला. मात्र, आरोपीने त्याचा पाठलाग करत काही अंतरावर पुन्हा गाठले आणि भररस्त्यात सपासप वार केले. या हल्ल्यात घनश्याम रायकर गंभीर जखमी झाला. त्याला तातडीने उपचारासाठी नेण्यात आले. मात्र, उपचारादरम्यान त्याचा मृत्यू झाला.
Pune Crime News: आरोपी अटकेत, पुढील तपास सुरू
घटनेची माहिती मिळताच बाणेर पोलिसांनी घटनास्थळी धाव घेत पंचनामा केला. त्यानंतर तपासाची चक्रे वेगाने फिरवत आरोपी सोलोमन शेंडगे याला अटक करण्यात आली. त्याच्याविरुद्ध बाणेर पोलीस ठाण्यात गुन्हा दाखल करण्यात आला असून, पोलीस पुढील तपास करीत आहेत.
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा
महत्त्वाच्या बातम्या
