Pradeep purnekar Death case and Rajendra Shinde: मोठी बातमी: मिनाक्षी शिंदेंचे पती आणि टल्ली-पपलीची समोरासमोर चौकशी, प्रदीप पूर्णेकर खटल्यात मोठी घडामोड
Pradeep purnekar Death case and Rajendra Shinde: राजेंद्र शिंदे आणि प्रदीप पूर्णेकरांच्या मारेकऱ्यांना समोरासमोर बसवून चौकशी, ठाणे क्राईम ब्रांचच्या ऑफिसमध्ये काय घडलं?

Pradeep purnekar Death case and Rajendra Shinde: ठाण्यातील प्रदीप पूर्णेकर हत्याप्रकरणाचा तपास आता अत्यंत महत्त्वाच्या टप्प्यावर पोहोचला आहे. प्रदीप पूर्णेकर यांची हत्या झाल्यापासून चौकशीच्या फेऱ्यापासून दूर असलेले राजेंद्र शिंदे यांना ठाणे गुन्हे शाखेने मंगळवारी अचानक चौकशीसाठी बोलावून घेतले आहे. गेल्या तासाभरापासून ठाणे गुन्हे शाखेच्या खंडणीविरोधी पथकाच्या कार्यालयात राजेंद्र शिंदे यांची चौकशी सुरु आहे. विशेष म्हणजे प्रदीप पूर्णेकर यांच्या मारेकऱ्यांनाही पोलिसांनी याच कार्यालयात आणले आहे. या सगळ्यांना समोरासमोर बसवून आता पोलिसांकडून चौकशी सुरु आहे. या चौकशीतून प्रदीप पूर्णेकर यांच्या हत्येबाबतचा एखादा महत्त्वाचा दुवा पोलिसांच्या हाती लागण्याची शक्यता आहे. त्यामुळे आता पुढील काही तासांमध्ये या चौकशीतून कोणती माहिती समोर येणार, हे बघावे लागेल. (Thane Crime news)
प्रदीप पूर्णेकर यांची 29 सप्टेंबरला रात्री साडेनऊच्या सुमारास मनोरमा नगरमधील त्यांच्या कार्यालयात हत्या झाली होती. पाच मारेकऱ्यांनी कार्यालयात घुसून प्रदीप पूर्णेकर यांच्यावर गोळ्या झाडल्या होत्या आणि त्यांच्यावर कोयत्याने वार करुन त्यांना ठार मारले होते. याप्रकरणात पूर्णेकर कुटुंबाने ठाण्याच्या माजी महापौर मिनाक्षी शिंदे आणि त्यांचे पती राजेंद्र शिंदे यांच्यावर गंभीर आरोप केले होते. राजकीय वैर आणि स्थानिक पातळीवर वर्चस्वाच्या लढाईतून मिनाक्षी शिंदे आणि राजेंद्र शिंदे यांनीच प्रदीप पूर्णेकर यांना सुपारी देऊन संपवले, असा दावा पूर्णेकरांच्या कुटुंबाने केला होता. संजय राऊत आणि आदित्य ठाकरे यांनी पोलीस ठाण्यात ठिय्या मांडल्यानंतर पोलिसांकडून पुरवणी एफआयआरमध्ये राजेंद्र शिंदे आणि मिनाक्षी शिंदे यांच्या नावाचा समावेश केला होता. मात्र, या दोघांविरोधात कोणतीही ठोस कारवाई झाली नव्हती. परंतु, आता राजेंद्र शिंदे यांना चौकशीला बोलावल्याने आणि पूर्णेकर यांच्या मारेकऱ्यांसमोर बसवून त्यांची चौकशी होत असल्याने पोलिसांच्या हाती एखादा महत्त्वाचा दुवा लागल्याची शक्यता वर्तविली जात आहे.
प्रदीप पूर्णेकर हत्या प्रकरणात मुख्य आरोपी संतोष कनजिया उर्फ टल्ली आणि आरोपी अमित जयकिशन सिंग उर्फ पपलू या दोघांना काहीवेळापूर्वीच ठाणे खंडणी विरोधी पथक गुन्हे शाखा येथे चौकशीसाठी आणण्यात आले. क्राईम ब्रांचकडे सध्या हत्येत सहभागी पाचही आरोपी अटकेत आहेत. त्यांना देखील समोरासमोर बसवून उलट तपासणी करण्यात आली. या चौकशीत समोर आलेले मुद्दे घेऊन आज राजेंद्र शिंदे यांना चौकशीला बोलावण्यात आले होते. त्यानंतर आता आरोपी आणि राजेंद्र शिंदे यांची आता समोरासमोर चौकशी सुरू आहे.
आणखी वाचा























