Nida Khan: नाशिकच्या टीसीएस कंपनीतील धर्मांतर आणि लैंगिक शोषण प्रकरणातील मुख्य संशयित निदा खान (Nida Khan) हिने तब्बल 43 दिवस पोलिसांना गुंगारा दिला. मात्र, नाशिक पोलिसांच्या विशेष तपास पथकाने (SIT) अत्यंत गोपनीय पद्धतीने मोहीम राबवून तिला छत्रपती संभाजीनगरमधून बेड्या ठोकल्या आहेत. नाशिकच्या भद्रकालीतील घास बाजार भागात जळाऊ लाकडे विकून उदरनिर्वाह करणाऱ्या सामान्य कुटुंबातील निदा खान इतके दिवस फरार कशी राहिली? तिला कोणी आर्थिक आणि लॉजिस्टिक रसद पुरवली? याबाबत आता एसआयटी तपास माहिती समोर येत आहे.
Nida Khan: 43 दिवसांचा थरार आणि नगरसेवकाचे कनेक्शन
तपासानुसार, 23 मार्च रोजी भिवंडीतून बेपत्ता झालेली निदा खान छत्रपती संभाजीनगरमधील नारेगाव भागात एका फ्लॅटमध्ये लपून बसली होती. धक्कादायक बाब म्हणजे, हे घर एमआयएमचे नगरसेवक मतीन पटेल यांचे असल्याचे प्राथमिक तपासात समोर आले आहे. या काळात निदा आणि तिच्या कुटुंबाला किराणा, चिकन आणि इतर दैनंदिन वस्तू पुरवण्याचे काम नगरसेवकाच्या ड्रायव्हरमार्फत केले जात असल्याचा संशय आहे.
Nida Khan: पोलिसांची सिनेस्टाईल कारवाई
सहाय्यक पोलीस आयुक्त संदीप मिटके यांच्या मार्गदर्शनाखाली एसआयटीने एक मोहीम राबवली. नाशिक पासिंगच्या वाहनांमुळे संशय येऊ नये, म्हणून पोलिसांनी इतर जिल्ह्यांच्या खाजगी वाहनांचा वापर केला. गुन्हे शाखा युनिट-1 चे पोलीस उपनिरीक्षक चेतन श्रीवंत आणि त्यांचे पथक साध्या वेशात तीन दिवस नारेगाव परिसरात वास्तव्यास होते. स्थानिक खबऱ्यांना किंवा नगरसेवकाच्या समर्थकांना सुगावा लागू नये, यासाठी पोलिसांनी 'मोबाईल लोकेशन' पेक्षा मानवी गुप्तचरांवर अधिक भर दिला होता. पोलिसांनी 7 मे रोजी तिला अत्यंत शिताफीने अटक केली होती.
Nida Khan: आश्रय देणाऱ्यांवर गुन्हे दाखल होणार?
तपास यंत्रणांच्या मते, फरार आरोपीला माहिती असूनही आश्रय देणे हा गंभीर गुन्हा मानला जातो. निदा खानला 43 दिवस लपवून ठेवण्याचा खर्च कोणी केला? यामागे एखादे मोठे नेटवर्क आहे का? याचा तपास आता सुरू झाला आहे. एसआयटीने आता नगरसेवक मतीन पटेल, त्यांचा ड्रायव्हर आणि निदाच्या काही नातेवाईकांची माहिती गोळा केली असून, लवकरच त्यांना चौकशीसाठी ताब्यात घेण्याची शक्यता आहे. केवळ निदा खानच नाही, तर या प्रकरणामागे तिला रसद पुरवणारे खरे 'मास्टरमाईंड' कोण आहेत, याचा छडा लावणे हे पोलिसांसमोर मोठे आव्हान आहे. निदा खानच्या अटकेमुळे आता या संपूर्ण साखळीचा पर्दाफाश होण्याची शक्यता निर्माण झाली आहे.
आणखी वाचा