Nashik Crime News: गोदावरी काठावर संशयास्पद काळी सुटकेस, चेन उघडताच पोलिसांच्याही पायाखालची जमीन सरकली; नाशिकमध्ये नेमकं काय घडलं?
Nashik Crime News: नाशिकच्या तपोवन रोड परिसरात, गोदावरी नदीच्या किनारी एका काळ्या रंगाच्या सुटकेसमध्ये अज्ञात महिलेचा मृतदेह आढळून आला आहे.
Nashik Crime News: नाशिक शहरात खळबळ उडवून देणारी धक्कादायक घटना समोर आली आहे. नाशिकच्या तपोवन रोड (Tapovan Road) परिसरात, गोदावरी नदीच्या (Godavari River) किनारी एका काळ्या रंगाच्या सुटकेसमध्ये अज्ञात महिलेचा मृतदेह आढळून आला आहे. या घटनेमुळे संपूर्ण परिसरात भीती आणि चर्चेचे वातावरण निर्माण झाले असून, पोलिसांनी घटनास्थळी तातडीने धाव घेत तपास सुरू केला आहे.
मिळालेल्या प्राथमिक माहितीनुसार, आज सकाळच्या सुमारास गोदावरी नदीकाठच्या परिसरात एक काळी सुटकेस संशयास्पद अवस्थेत पडून असल्याचे निदर्शनास आले. सुटकेसमधून दुर्गंधी येत असल्याने स्थानिकांना संशय आला. त्यानंतर ही माहिती पोलिसांना देण्यात आली.
Nashik Crime News: सफाई कर्मचाऱ्याच्या सतर्कतेमुळे प्रकार उघड
या घटनेबाबत प्रत्यक्षदर्शी आणि सफाई कर्मचारी सतीश घोडुंबे यांनी माहिती देताना सांगितले की, “मी सकाळी साडेआठ ते नऊच्या सुमारास परिसरात साफसफाई करत होतो. त्यावेळी मला एक बॅग दिसली. त्या बॅगेतून तीव्र वास येत होता. संशय आल्याने मी त्या बॅगेचा फोटो काढून आमच्या सुपरवायझरला पाठवला. त्यानंतर आम्ही 112 क्रमांकावर फोन करून पोलिसांना माहिती दिली.”
Nashik Crime News: घटनास्थळी पोलिसांचा मोठा फौजफाटा
घटनेची माहिती मिळताच आडगाव पोलीस (Adgaon Police), क्राईम ब्रँच युनिट-1 चे पथक आणि फॉरेन्सिक टीम घटनास्थळी दाखल झाली. पोलिसांनी परिसराचा पंचनामा सुरू केला असून मृतदेहाची ओळख पटवण्याचे प्रयत्न सुरू आहेत.
Nashik Crime News: मृतदेह चार ते पाच दिवसांपूर्वीचा?
पोलिसांनी दिलेल्या प्राथमिक माहितीनुसार, सुटकेसमध्ये आढळलेला मृतदेह अंदाजे चार ते पाच दिवसांपूर्वीचा असावा, असा प्राथमिक अंदाज वर्तवण्यात येत आहे. मात्र, मृत्यूचे नेमके कारण, महिलेची ओळख आणि हा खून आहे की अन्य काही प्रकार, याबाबत अद्याप स्पष्टता आलेली नाही. फॉरेन्सिक तपासणी आणि शवविच्छेदन अहवालानंतर या प्रकरणातील अनेक बाबी समोर येण्याची शक्यता आहे. सध्या नाशिक पोलीस या प्रकरणाचा सर्व बाजूंनी तपास करत आहेत.
राज्य आणि देश-विदेशातील महत्त्वाच्या बातम्या; पाहा व्हिडीओ
इतर महत्त्वाच्या बातम्या
महत्त्वाच्या बातम्या
