Nashik Crime News: नाशिकमधील एका बहुराष्ट्रीय आयटी कंपनीत केवळ लैंगिक शोषणच नाही, तर धार्मिक कट्टरतेचे एक भयानक जाळे पसरल्याचे खळबळजनक वास्तव समोर आले आहे. विशिष्ट धर्माच्या तरुण-तरुणींनी संगनमताने इतर धर्मीय तरुणींना 'टार्गेट' करण्यासाठी व्हॉट्सॲपवर गुप्त गट (WhatsApp Groups) तयार केले होते, अशी धक्कादायक माहिती एसआयटी (SIT) तपासात उघड झाली आहे.
Nashik Crime News: व्हॉट्सॲप ग्रुपद्वारे 'पुढचे लक्ष्य' निश्चित
मिळालेल्या माहितीनुसार, या नामांकित कंपनीत विशिष्ट समुदायातील तरुण-तरुणींचा एक व्हॉट्सॲप ग्रुप सक्रिय होता. या ग्रुपवर केवळ कंपनीतील राजकारण किंवा गटबाजीच नाही, तर 'पुढचे लक्ष्य' कोणाला करायचे, यावरही चर्चा व्हायची, असा संशय पीडित तरुणींनी व्यक्त केला आहे. विशेष म्हणजे, ज्या तरुणींना जाळ्यात ओढले जायचे, त्यांच्यासाठी पुन्हा एक स्वतंत्र व्हॉट्सॲप ग्रुप बनवून त्यांचे ब्रेनवॉश केले जात असे.
Nashik Crime News: अशी होती 'कार्यपद्धती'
संशयित आरोपी तरुणींना जाळ्यात ओढण्यासाठी अत्यंत नियोजनबद्ध पावले उचलत होते. संशयित तरुण स्वतःला 'सिंगल' असल्याचे भासवून तरुणींचे कौतुक करायचे, त्यांच्याशी गोड बोलून फ्लर्टिंग करायचे आणि नंतर जेवणाच्या बहाण्याने बाहेर न्यायचे. कंपनीतील कामाचा फायदा घेत, "तुला हव्या त्या ठिकाणी बदली करून देतो किंवा रजा मिळवून देतो," असे सांगून तरुणींना उपकृत करायचे आणि त्यातून जवळीक साधण्याचा प्रयत्न व्हायचा. ज्या तरुणींनी या आमिषांना बळी पडण्यास नकार दिला, त्यांना मानसिक त्रास दिला जायचा, ज्यामुळे अनेक तरुणींनी नोकरीचा राजीनामा दिल्याची माहिती सूत्रांकडून मिळत आहे.
Nashik Crime News: नाशिकमध्ये 9 गुन्हे दाखल
या कटात केवळ तरुणच नाही तर तरुणींचाही सहभाग असल्याचे तपासात निष्पन्न झाले आहे. या प्रकरणी नाशिक पोलिसांनी नऊ गुन्हे नोंदवले आहेत. या गुन्ह्यांत आसिफ अन्सारी, शफी शेख, रझा मेमन, तौसिफ अत्तार, शाहरूख कुरेशी, दानिश शेख ‘एसआयटी’च्या कोठडीत असून, निदा खान हिचा शोध सुरू आहे. एका प्रतिष्ठित आयटी कंपनीत अशा प्रकारे संघटित गुन्हेगारी आणि धार्मिक कट्टरतेचे प्रकार घडत असल्याने नाशिकमध्ये तीव्र संताप व्यक्त केला जात आहे.
Nashik Crime News: कंपनी प्रशासनावर कारवाई करा, भाजपची मागणी
दरम्यान, भारतीय जनता पक्ष युवा मोर्चाकडून नाशिकमधील बहुराष्ट्रीय कंपनीच्या बाहेर आंदोलन करण्यात आली. कंपनीमध्ये महिलांचे लैंगिक शोषण आणि धर्मांतर करण्याचा प्रयत्न झाल्याने युवा मोर्चाने आक्रमक भूमिका घेतली आहे. तर आंदोलकांना ताब्यात घेण्यासाठी पोलीस कंपनी परिसरात दाखल झालेले होते. पोलिसांसोबत दंगा नियंत्रण पथक देखील दाखल झाले होते. यामुळे परिसरात तणावाची परिस्थिती निर्माण झाली होती. यानंतर पोलीस उपायुक्त मोनिका राऊत कंपनीत दाखल झाल्या. कंपनी प्रशासनावर कारवाई करण्याची मागणी भाजपकडून करण्यात आली आहे.
आणखी वाचा