HSC Exam Papers Leaked Case: नागपुरातील बारावी पेपरफुटी प्रकरणात मोठी कारवाई; कोचिंग क्लास चालकासह एका विद्यार्थ्यालाही बेड्या, मोठं रॅकेट उघड होण्याची शक्यता
HSC 12th Exam Papers Leaked: नागपुरातून (Nagpur) एक धक्कादायक प्रकार समोर आला आहे. या पेपर फुटीच्या प्रकरणात (Nagpur HSC 12th Exam) तपासाअंती आता दोघांना अटक करण्यात आली आहे.
Nagpur HSC 12th Exam : नागपूर शहरात बारावी (HSC) परीक्षेतील पेपर फुटल्याच्या धक्कादायक प्रकारामुळे शैक्षणिक क्षेत्रात मोठी खळबळ उडाली आहे. बारावीच्या दोन पेपरफुटी प्रकरणाच्या (Nagpur HSC 12th Exam) तपासाअंती आता दोघांना अटक करण्यात आली आहे. कोचिंग क्लास चालकासह एका विद्यार्थ्याला या प्रकरणी पोलिसांनी बेड्या ठोकल्या आहेत. राज्याला हादरविणाऱ्या या पेपर फुटीच्या प्रकरणात नागपुरातून मोठी कारवाई करण्यात आली असून सदर पोलिसांकडून अद्याप या प्रकरणाचा सखोल तपास सुरू आहे.
12th Exam Papers Leaked: कोचिंग क्लास चालकासह एका विद्यार्थ्याला पोलिसांनी ठोकल्या बेड्या
मिळालेल्या माहितीनुसार, निशिकांत मूल (४५, मानकापूर) असं ट्युशन क्लासेस चालवणाऱ्या संचालकाचे नाव आहे. तर फरहान अख्तर असं अटक करण्यात आलेल्या विद्यार्थ्यांच नाव आहे. सेंट उर्सुला हायस्कूल परीक्षा केंद्रावरील पर्यवेक्षकामुळे हा प्रकार उघड झाला होता. यात रसायनशास्त्राच्या पेपरच्या वेळेपूर्वीच व्हॉट्सअॅपवर प्रश्नपत्रिका आल्याचे पुढं आलं होतं. दरम्यान, वारंवार प्रसाधनगृहात गेलेल्या विद्यार्थिनीवर संशय आल्याने तिची झडती घेतली असता स्मार्टफोन आढळून आला. त्यानंतर हा मोबाईल जप्त करत तपासणी केली असता मोबाईलमध्ये परीक्षा सुरू होण्यापूर्वीच 10.37 ला पेपर, प्रश्नांसोबत उत्तरेही एका व्हॉट्सअॅप ग्रुपवर आढळून आले. ‘XII’ नावाच्या 21 सदस्यांच्या व्हॉट्सअॅप ग्रुपवर निशिकांत मूलच्या क्रमांकावरून पेपर पाठवल्याचे उघड झालं. यात बारावीच्या विज्ञान शाखेचे फिजिक्स आणि केमिस्ट्रीचा पेपर परीक्षेच्या तासाभरापूर्वीच व्हाट्सअपवर आल्याची माहिती आहे. गुरुवारी बारावी केमिस्ट्रीचा पेपर होता. मात्र परीक्षेआधी पेपर विद्यार्थ्यांच्या व्हाट्सअप ग्रुपवर आला होता. नागपूर शहरातील सदरच्या सेंट उर्सुला परीक्षा केंद्रावर हा प्रकरण उघडकीस आला आहे.
Nagpur Police : आणखी किती विद्यार्थ्यांपर्यंत पोहोचला पेपर? मोठे रॅकेट उघड होण्याची शक्यता
दरम्म्यान प्रकरण उघड होताच तो क्रमांक निशिकांत मूल याने बंद केला. 16 फेब्रुवारीचा फिजिक्स पेपरही मोबाईलमध्ये सापडला होता. या दोन्ही विषयांची पेपरफुटीची पुष्टी पोलिसांकडून करण्यात आली असून कोचिंग क्लास चालकासह एका विद्यार्थ्याला या प्रकरणी पोलिसांनी बेड्या ठोकल्या आहेत. फरहानने ग्रुपवर उत्तरं टाकल्याचा आरोप आहे. तर या प्रकरणी दोघांना न्यायालयाकडून चार दिवसांची पोलिस कोठडी सुनावण्यात आली आहे. अशातच हि प्रश्नपत्रिका नेमकी कुठून आली? यात आणखी कोणाचा सहभाग आहे? याचा तपास पोलिसांकडून सुरु करण्यात आला आहे.
इतर महत्वाच्या बातम्या
महत्त्वाच्या बातम्या
