Nagpur Crime News: क्लासला जायचंय, पत्नीनं दिला जेवण बनवण्यास नकार, नवऱ्याची सटकली अन् त्याने..., नागपुरातील विवाहितेचा दुर्दैवी अंत
Nagpur Crime News: सोसायटीतील डान्स क्लासला जाण्याच्या मुद्द्यावरून पती-पत्नीमध्ये वाद झाला. यावेळी संतापलेल्या पतीने पत्नीला मारहाण केली होती.
Nagpur Crime News: नागपुरात (Nagpur) कौटुंबिक वादातून 38 वर्षीय महिलेचा मृत्यू (Death) झाल्याची धक्कादायक घटना समोर आली आहे. सोसायटीतील डान्स क्लासला (Dance Class) जाण्याच्या मुद्द्यावरून पती-पत्नीमध्ये वाद झाला. यावेळी संतापलेल्या पतीने पत्नीला मारहाण केली. गंभीर दुखापतींनंतर उपचारादरम्यान महिलेचा मृत्यू झाल्याची माहिती समोर येत आहे. मृत महिलेचे नाव यामिनी कृष्ण लाल यादव असून आरोपी पतीचे नाव कृष्ण लाल यादव आहे. कृष्ण लाल याला पोलिसांनी अटक केली असून त्याच्याविरोधात हत्येचा गुन्हा दाखल करण्यात आला आहे. या दाम्पत्याला दोन लहान मुले आहेत.
Nagpur Crime News: डान्स क्लासला जाण्यावरून पती-पत्नीमध्ये वाद
पोलिसांनी दिलेल्या माहितीनुसार, कृष्ण लाल कामावरून घरी परतल्यानंतर त्याने पत्नी यामिनीला स्वतःसाठी आणि मुलांसाठी जेवण बनवण्यास सांगितले. मात्र, यामिनी त्यांच्या सोसायटीत असलेल्या डान्स क्लासला जाण्याची तयारी करत होती. यामिनीने स्वयंपाक करण्यास नकार दिल्यानंतर दोघांमध्ये वाद सुरू झाला. सुरुवातीला झालेला कौटुंबिक वाद पुढे हिंसक स्वरूपाचा झाल्याचे पोलिस तपासात समोर आले आहे.
Nagpur Crime News: मुलांसमोरच पत्नीला मारहाण केल्याचा आरोप
पोलिसांच्या माहितीनुसार, कृष्ण लाल हा त्यावेळी मद्यधुंद अवस्थेत होता. त्याने आपल्या दोन मुलांसमोरच यामिनीच्या मानेवर आणि पोटावर मारहाण केल्याचा आरोप आहे. या मारहाणीनंतर यामिनीला मानेत आणि पोटात तीव्र वेदना होऊ लागल्या. प्रकृती बिघडत असल्याने तिने पतीकडे पेनकिलर आणण्यास सांगितले.
Nagpur Crime News: औषध आणण्यासाठी गेला, पण दुकान बंद
यामिनीच्या सांगण्यावरून कृष्ण लाल औषध घेण्यासाठी मेडिकल दुकानात गेला. मात्र, दुकान बंद असल्याने तो औषध न घेताच घरी परतला. दरम्यान, यामिनीची प्रकृती हळूहळू खालावत गेली. तिच्या पोटावर सूज आली आणि दुखापतींचा त्रास वाढत गेला.
Nagpur Crime News: रुग्णालयात उपचार सुरू असताना मृत्यू
यानंतर यामिनीला उपचारासाठी रुग्णालयात (Hospital) दाखल करण्यात आले. मात्र, तिच्या शरीरात झालेल्या गंभीर अंतर्गत दुखापतींमुळे उपचारादरम्यान तिचा मृत्यू झाला. सुरुवातीला या घटनेची अपघाती मृत्यू म्हणून नोंद करण्यात आली होती. त्यानंतर महिलेचा मृतदेह शवविच्छेदनासाठी पाठवण्यात आला.
Nagpur Crime News: पोस्टमार्टम रिपोर्टने मारहाणीचा संशय बळावला
शवविच्छेदन अहवालातून यामिनीच्या शरीरावर गंभीर दुखापती झाल्याचे समोर आले. मानेचे हाड मोडल्याचे, तसेच आतड्यांना गंभीर दुखापत झाल्याचे अहवालात नमूद झाल्याची माहिती आहे. या अहवालानंतर पोलिसांनी कृष्ण लालची चौकशी केली. चौकशीअंती त्याला अटक करण्यात आली. याप्रकरणी पोलिसांनी कृष्ण लाल यादवविरोधात हत्येचा गुन्हा (Murder) दाखल केला आहे. या प्रकरणाचा पुढील तपास पोलिसांकडून सुरू आहे.
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा
महत्त्वाच्या बातम्या
