मुंबईत अमली पदार्थांविरोधात मोठी कारवाई, 53 लाखांचा मुद्देमाल जप्त, 4 आरोपीं पोलिसांच्या ताब्यात

मुंबई पोलिसांच्या गुन्हे शाखा कक्ष 11 ने अमली पदार्थांविरोधात मोठी कारवाई केली आहे. ​नशा करण्यासाठी वापरल्या जाणाऱ्या 'कोडेन फॉस्फेटयुक्त सिरप'चा मोठा साठा जप्त करण्यात आला आहे.

Mumbai Crime News

Source : Getty Images

Mumbai Crime News : मुंबई पोलिसांच्या गुन्हे शाखा कक्ष 11 ने अमली पदार्थांविरोधात मोठी कारवाई केली आहे. ​नशा करण्यासाठी वापरल्या जाणाऱ्या 'कोडेन फॉस्फेटयुक्त सिरप'चा मोठा साठा जप्त करण्यात आला आहे. तब्बल 52 लाख 7 हजार 400 रुपये किंमतीच्या एकूण 4 हजार 734 बाटल्या पोलिसांनी हस्तगत केल्या आहेत. बेकायदेशीरपणे साठा करुन विक्री करणाऱ्या 4 आरोपींना पोलिसांनी ताब्यात घेतलं आहे. आरोपींमध्ये एका विधीसंघर्षग्रस्त बालकाचा समावेश आहे.

52 लाखांच्या अमली पदार्थांसह 1 लाख रुपये किमतीची एक मोटारसायकल जप्त​

मालाड (पश्चिम) येथील एस.व्ही. रोडवरील इंडियन ऑईल पेट्रोल पंपासमोरून पहिली अटक केली आहे. त्यानंतर आरोपीच्या सांगण्यावरून खारघर (नवी मुंबई) येथील गोदामावर छापा टाकला आहे. 52 लाखांच्या अमली पदार्थांसह 1 लाख रुपये किमतीची एक मोटारसायकल, असा एकूण 53 लाख 7 हजार 400 रुपयांचा मुद्देमाल जप्त केला आहे. मालाड पोलीस ठाण्यात एनडीपीएस (NDPS) कायद्यांतर्गत गुन्हा दाखल करण्यात आला आहे. गुन्हे शाखा कक्ष 11 (कांदिवली) कडून पुढील तपास सुरु आहे. 

सांगली जिल्ह्यातील वाळवा तालुक्यातही मोठी कारवाई, 9 लाखांच्या गांजाच्या झाडांचा साठा जप्त

सांगली जिल्ह्यातील वाळवा तालुक्यातील  येलूर येथे शेतातील 9 लाखांच्या गांजाच्या झाडांचा साठा ईश्वरपूर पोलिसांनी जप्त केला आहे. या प्रकरणी दोघांना ताब्यात घेण्यात आले आहे. एकूण 44 किलो वजनाची 48 झाडे जप्त करण्यात आली आहेत. उसाच्या शेतात असलेली ही गांजाची 8 ते 9  फूट उंचीची आणि 44 किलोहून अधिक वजनाची 48 झाडे जप्त केली. त्याची किंमत 8 लाख 89 हजार रुपये इतकी आहे. याबाबत पोलिस कर्मचारी विशाल पांगे यांनी फिर्याद दिली आहे. त्यानुसार रवींद्र सदाशिव माळी (वय 49) आणि आनंदा भीमराव चव्हाण (दोघे रा. येलूर) यांना ताब्यात घेत त्यांच्याविरुद्ध अमली पदार्थ प्रतिबंधक कायद्याच्या विविध कलमाखाली गुन्हा नोंद करण्यात आला आहे. 

गोंदिया रेल्वे स्थानकावर मादक पदार्थाच्या तस्करीवर कारवाई

रेल्वे सुरक्षा बल, दक्षिण पूर्व मध्य रेल्वे, नागपूर मंडळाने ऑपरेशन नार्कोस अंतर्गत मादक पदार्थाच्या तस्करीवर कारवाई केली आहे. गोंदिया येथे पुरी-अहमदाबाद एक्स्प्रेसच्या एस- 3 कोच मधील इंजिन साईडच्या शौचालयाच्या छतावरून एक लावारिस चेक बॅग मिळाली. त्यात 4 पॅकेट गांजा आढळून आला. या गांज्याचे एकूण वजन 7.972 किलोग्रॅम असून त्याची किमत 3 लाख 98 हजार 600 रुपये आहे. आरपीएफने राज्य पोलिस आणि इतर कायदा अंमलदार संस्थांबरोबर समन्वय साधून ही कारवाई केली. गोंदिया रेल्वे स्थानकावर मंडल टास्क टीम व आरपीएफ पोस्ट गोंदिया यांनी ही कार्यवाही केली.