मुंबई : शिकून-सवरून उच्चशिक्षित झालेला इंजिनिअरिंगचा विद्यार्थी, (Student) पण डोक्यात मात्र भामटेगिरीचे 'हायटेक' प्लॅन्स. स्वतःचा मोबाईल नंबर वापरला तर पोलीस पकडतील म्हणून व्हॉट्सॲपवर व्हर्च्युअल फेक नंबर जनरेट केला, मालकाचा विश्वास संपादन करून ड्रायव्हर म्हणून कामाला लागला आणि 12 लाखांची लक्झरी कार(Car) घेऊन पसार झाला. पण, मेघवाडी पोलिसांनी (Police) या बी.टेक स्टुडंटच्या हुशारीची सर्व सूत्रे तांत्रिक तपासाद्वारे छाटून टाकत त्याला पुण्यातील कोंढव्यातून बेड्या ठोकल्या आहेत!
बी.टेक चे शिक्षण घेतलेला 27 वर्षीय आरोपी निझामी शमसुद्दीन याने आपल्या तांत्रिक ज्ञानाचा गैरवापर केला. पकडले जाण्याच्या भीतीपोटी त्याने स्वतःचा मूळ मोबाईल नंबर कधी वापरलाच नाही. त्याने इंटरनेटच्या साहाय्याने व्हॉट्सॲपवर बनावट नंबर जनरेट केला आणि याच नंबरवरून तक्रारदार जिगर घनश्याम पटेल यांच्याशी संवाद साधून ड्रायव्हरची नोकरी मिळवली. 22 जून 2026 रोजी सकाळच्या सुमारास अवघ्या 17 मिनिटांच्या कालावधीत, जिजामाता रोड, पंप हाऊस, अंधेरी (पूर्व) येथील रामगुरूदेव सोसायटीतून आरोपीने जिगर पटेल यांची 12,45,000/- रुपये किमतीची मारूती सुझुकी XL6 स्मार्ट हायब्रिड कार मालकाच्या परवानगीशिवाय चोरून नेली. घटनेची गांभीर्य लक्षात घेऊन मेघवाडी पोलीस ठाण्यात गुन्हा दाखल करण्यात आला.
हैदराबादवरुन कार जप्त
आरोपीने स्वतःची ओळख लपवण्यासाठी कितीही तांत्रिक क्लिपत्या वापरल्या असल्या, तरी मेघवाडी पोलिसांच्या 'गुन्हे प्रकटीकरण पथका'ने अत्यंत सूक्ष्म तांत्रिक विश्लेषण आणि गुप्त बातमीदारांच्या जाळ्याचा वापर केला. तपासाचे धागेदोरे जोडत पथकाने थेट पुण्यातील कोंढवा भागात धाड टाकून निझामी शमसुद्दीन याला ताब्यात घेतले. पोलीस खाक्या दाखवताच आरोपीने गुन्ह्याची कबुली दिली आणि चोरी केलेली लक्झरी कार हैदराबाद येथे लपवून ठेवल्याचे सांगितले. पोलिसांनी तातडीने हैदराबाद गाठून निवेदन पंचनाम्यांतर्गत 12 लाख 45 हजारांची XL6 कार रीतसर जप्त केली.
पोलिसांकडून अधिक तपास सुरू
पोलीस उपायुक्त दत्तात्रय नलावडे, सहाय्यक पोलीस आयुक्त, वरिष्ठ पोलीस निरीक्षक किरण शाळीग्राम आणि पोलीस निरीक्षक श्याम पवरे यांच्या मार्गदर्शनाखाली गुन्हे प्रकटीकरण पथकाने ही कौतुकास्पद कारवाई केली. या कारवाईत सहभागी तपास पथकातील सहायक पोलीस निरीक्षक संजय सरोळकर, सहाय्यक फौजदार पवार, पोलीस हवालदार राठोड, पोलीस शिपाई कापसे, खरात, आणि कांजर यांनी हि कौतुकास्पद कामगिरी केली आहे. दरम्यान, तंत्रज्ञानाचा वापर गुन्हेगारीसाठी करणाऱ्या या बी.टेक स्टुडंटला वाटले होते की, तो पोलिसांच्या हातावर तुरी देऊन निसटेल, पण मेघवाडी पोलिसांच्या सतर्कतेने आणि हायटेक तपासाने त्याच्या मुसक्या आवळल्या आहेत. आरोपी सध्या गजाआड असून या प्रकरणात आणखी कोणाचा हात आहे का, याचा अधिक तपास पोलीस करत आहेत.