Beed Crime: शेतीच्या फेरफाराची नोंदीसाठी तब्बल एक लाख रुपयांच्या लाचेची मागणी, अंबाजोगाईत मंडल अधिकारी 'एसीबी'च्या जाळ्यात
Beed Crime: कारवाईचा संशय आल्याने अधिकाऱ्याने लाचेची रक्कम स्वीकारली नाही. मात्र, लाच मागितल्याचे सिद्ध झाल्याने त्याच्यावर कायदेशीर कारवाई करण्यात आली.
Beed Crime: बीड जिल्ह्यातील अंबाजोगाईत शेतीच्या फेरफाराची नोंद करून देण्यासाठी तब्बल एक लाख रुपयांच्या लाचेची मागणी करणाऱ्या एका मंडळ अधिकाऱ्याविरुद्ध बीड एसीबीने कारवाई केली आहे. सतीश विठ्ठलराव भुसेवाड असे या लाचखोर अधिकाऱ्याचे नाव असून तो अंबाजोगाई तालुक्यातील लोखंडी सावरगावात सेवेत होता. तक्रारदार यांच्या शेतीच्या फेरफार नोंदीची कार्यवाही करण्यासाठी सतीशने तब्बल एक लाख रुपयांची लाच मागितली होती. यासंदर्भात तक्रारदाराने बीड लाचलुचपत प्रतिबंधक विभागाकडे (एसीबी) तक्रार नोंदवली. या तक्रारीची दखल घेत एसीबीच्या पथकाने तातडीने पडताळणी केली असता लाचेची मागणी केल्याचे निष्पन्न झाले.
संशय आल्याने लाचेची रक्कम स्वीकारली नाही, पण
दरम्यान, कारवाईचा संशय आल्याने अधिकाऱ्याने लाचेची रक्कम स्वीकारली नाही. मात्र, लाच मागितल्याचे सिद्ध झाल्याने त्याच्यावर कायदेशीर कारवाई करण्यात आली. लाच स्वीकारण्यासाठी मागणी केल्याप्रकरणी सतीश भुसेवाडविरुद्ध अंबाजोगाई शहर पोलीस ठाण्यात गुन्हा दाखल करण्याची प्रक्रिया सुरू असून, या प्रकरणाचा अधिकचा तपास लाचलुचपत प्रतिबंधक दीपकाकडून केला जात आहे.
चांदीची अंगठी लाच म्हणून स्वीकारणे महागात
दुसरीकडे, नवीन व्यवसाय सुरू करण्यासाठी आवश्यक असलेला 'ना हरकत दाखला' देण्याच्या मोबदल्यात 1200 रुपये किमतीची चांदीची अंगठी लाच म्हणून मागणाऱ्या कुडाळ नगरपंचायतीच्या स्वच्छता निरीक्षकाला लाचलुचपत प्रतिबंधक विभागाने सापळा रचून रंगेहाथ ताब्यात घेतले. पांडुरंग वासुदेव नाटेकर असे त्याचे नाव आहे. कुडाळ येथे 'पदमगड ज्वेलर्स' नावाचा व्यवसाय सुरू करण्यासाठी नगरपंचायतीकडे ना हरकत दाखल्यासाठी अर्ज केला होता. हा दाखला मंजूर करून देण्याच्या मोबदल्यात स्वच्छता निरीक्षक पांडुरंग नाटेकरने 1200 रुपये किंमतीची नवीन खडा असलेली चांदीची अंगठी लाच म्हणून मागितली होती.
तक्रारदाराची लाच देण्याची इच्छा नसल्याने त्यांनी याप्रकरणी लाचलुचपत प्रतिबंधक विभागाकडे तक्रार नोंदवली. एसीबीचे पथक येताच संशयित नाटेकर यांनी स्वतःला वाचवण्यासाठी ती अंगठी लपवून पुरावा नष्ट करण्याचा प्रयत्न केला. मात्र, वस्तू हाताळताना लावली जाणारी अँथ्रोसिन पावडर नाटेकरच्या हातावर स्पष्ट दिसून आल्याने, पथकाने त्यांना तत्काळ ताब्यात घेतले. या प्रकरणी संशयित पांडुरंग नाटेकर यांच्यावर कुडाळ पोलीस ठाण्यात भ्रष्टाचार प्रतिबंधक अधिनियम 1988 (सुधारणा 2018) चे कलम 7 आणि भारतीय न्याय संहिता 2023 चे कलम 238 (पुरावा नष्ट करण्याचा प्रयत्न) अंतर्गत गुन्हा दाखल करण्यात आली आहे.
इतर महत्वाच्या बातम्या
महत्त्वाच्या बातम्या
