Maharashtra Live Blog Updates: औषध विक्रेत्यांचा आज देशव्यापी संप, अनेक शहरांतील मेडिकल्स आज बंद राहणार
Maharashtra Live Blog Updates: ऑनलाईन अॅप्सवरून होणाऱ्या औषध विक्रीविरोधात आज देशभरातील औषध विक्रेत्यांनी बंद पुकारला आहे.
LIVE
Background
Maharashtra Live Blog Updates: ऑनलाईन अॅप्सवरून होणाऱ्या औषध विक्रीविरोधात आज देशभरातील औषध विक्रेत्यांनी बंद पुकारला आहे. बेकायदेशीर आणि नियमबाह्य पद्धतीने औषध विक्री होत असल्याचा आरोप करत साडेबारा लाखांहून अधिक औषध विक्रेते आणि वितरक या आंदोलनात सहभागी झाले आहेत. ऑल इंडिया केमिस्ट अॅण्ड ड्रगिस्ट असोसिएशनने देशभरात बंदची घोषणा केली आहे. ऑनलाइन अॅप्सवर डॉक्टरांच्या प्रिस्क्रिप्शनशिवाय औषधांची विक्री होत असल्याचा आरोप औषध विक्रेत्यांनी केला आहे. यामुळे छोट्या केमिस्ट दुकानदारांना आर्थिक फटका बसत असल्याचं संघटनेचं म्हणणं आहे.कोविड काळात दिलेल्या सवलतीचा ऑनलाइन कंपन्यांकडून गैरफायदा घेतला जात असल्याचा आरोपही केला जातोय. यासंदर्भात पंतप्रधान नरेंद्र मोदी यांना लेखी निवेदन देण्यात आलं होतं, मात्र केंद्र सरकारकडून कोणताही प्रतिसाद मिळाला नसल्याचं संघटनेने म्हटलं आहे.
पंढरपुरात 500 मेडिकल दुकाने बंद; पंढरपूर तालुका केमिस्ट असोसिएशनकडून तहसील कार्यालयासमोर निदर्शने
ऑनलाइन फार्मसीच्या विरोधात आज पंढरपुरात ऑल इंडिया केमिस्ट असोसिएशनच्या पंढरपूर शाखेच्या वतीने केमिस्ट व ड्रगिष्ट असोसिएशन यांच्याकडून एक दिवसीय बंद पाळण्यात आला. याचवेळी पंढरपूर शहर व तालुक्यातील सर्व केमेस्ट यांनी येथील तहसील कार्यालयाच्या दारात येऊन निदर्शने देखील केली. ऑनलाइन औषध विक्री बंद करा, कॉर्पोरेट द्वारे व्यावसायिक डिस्काउंट बंद करा, व बनावट औषधांपासून देश वाचवा. अशा मागण्या केमिस्ट असोसिएशनच्या वतीने यावेळी करण्यात आल्या. पंढरपूर शहर व तालुक्यातील केमिस्ट धारकांनी येऊन आज मोठ्या प्रमाणावर घोषणाबाजी करत निदर्शने केली.
Beed : नीट पेपरफुटी प्रकरणात बीडमधील उमाकिरण परिसरातील कोचिंग क्लासेस चालकांसह पालकांची सीबीआय चौकशी
नीट पेपर फुटीची धागेदोरे आता बीड पर्यंत पोहोचले आहेत. सीबीआयने शहरातील उमाकीरण परिसरातील काही कोचिंग क्लासेस चालकांची चौकशी केल्याची खात्री लायक माहिती आहे.
कुलकर्णी आणि मोटेगावकर यांचे मोबाईल कॉल रेकॉर्ड्स, आर्थिक व्यवहार विद्यार्थ्यांशी संपर्क आणि कोचिंग नेटवर्कची साखळी तपासताना बीड मधील काही कोचिंग क्लासेसची नावे तपासाच्या कक्षेत आले आहे. मागील दोन दिवसांपासून सीबीआयची दोन स्वतंत्र पथके बीड शहरात तळ ठोकून असून शहरातील प्रमुख नीट जेईई कोचिंग क्लासेस वर त्यांचे विशेष लक्ष आहे.
यादरम्यान शिक्षकांसह काही विद्यार्थ्यांच्या पालकांच्या अकाउंटची माहिती घेण्यात आली. उमाकिरण परिसरातील काही क्लासेस मध्ये जाऊन पथकाने चौकशी केली आहे. विद्यार्थ्यांच्या प्रवेश नोंदी, फी व्यवहार, बाहेरील जिल्ह्यातील विद्यार्थ्यांची माहिती तसेच शिक्षकांचे संपर्क तपासण्यात आले. काही ठिकाणी डिजिटल डेटा मोबाईल संपर्क आणि जुन्या बॅचची माहिती मागविण्यात आली असून 700 पेक्षा जास्त गुण मिळवणाऱ्या विद्यार्थ्यांचा डेटा चौकशीत घेतल्याचं कळत आहे.
महत्त्वाच्या बातम्या
