Beed Crime: सरपंच संतोष देशमुखांना हालहाल करुन मारणाऱ्या जयराम चाटेच्या चेहऱ्यावर पश्चातापाचा लवलेशही नाही, तुरुंगाबाहेर पडताच काय घडलं?
Santosh Deshmukh Murder Case Massajog: मस्साजोग गावचे सरपंच संतोष देशमुख यांना अमानुष पद्धतीने मारण्यात आले होते. जयदीप चाटे हा आरोपींपैकी एक आहे. काल तो तुरुंगाबाहेर आला होता.
Santosh Deshmukh Murder Case Massajog: संपूर्ण राज्याला हादरवून सोडणाऱ्या आणि क्रूरतेची परिसीमा गाठणाऱ्या सरपंच संतोष देशमुख हत्याप्रकरणातील (Santosh Deshmukh Murder Case) आरोपी जयराम चाटे याला शुक्रवारी एका दिवसासाठी तुरुंगातून बाहेर सोडण्यात आले होते. जयराम चाटे (Jayram Chate) याच्या भावाचे 2 मार्चला निधन झाले होते. त्याच्या बाराव्याचा कार्यक्रम काल होता. त्यासाठी जयराम चाटे याच्या वकिलांनी विनंती केल्यानंतर न्यायालयाने सकाळी 9 ते दुपारी 4 या वेळेत पोलीस बंदोबस्तात धार्मिक विधीस उपस्थित राहण्याची परवानगी देण्यात आली होती. जयराम चाटे याला काल तुरुंगातून बाहेर काढण्यात आले तेव्हा बंदुका घेतलेल्या पोलिसांचा मोठा फौजफाटा त्याच्यासोबत होता. सात तासांच्या सवलतीनंतर भावाचे विधी आटोपून त्याला पुन्हा तुरुंगात नेण्यात आले. (Maharashtra Crime news)
मस्साजोग गावचे सरपंच असलेल्या संतोष देशमुख यांना विष्णू चाटे (Vishnu Chate), जयराम चाटे, सुदर्शन घुले, कृष्णा आंधळे, सुधीर सांगळे या सगळ्यांनी अक्षरश: हालहाल करुन मारले होते. लोखंडी रॉडच्या फटक्याने संतोष देशमुख यांच्या शरीरावर गंभीर जखमा झाल्या होत्या. मारेकऱ्यांनी संतोष देशमुख यांना नग्न करून मारहाण केली आणि त्यानंतर गॅस पाईपचा वापर करून त्यांचे हात-पाय निकामी केले होते. हे सगळे सुरु असताना आरोपींनी वाल्मिक कराड (Walmik Karad News) याला व्हिडीओ कॉल केल्याचाही आरोप आहे. या हत्याकांडामुळे संपूर्ण राज्य हादरुन गेले होते. मात्र, या सगळ्याचा आरोपी जयराम चाटे याला जराही पश्चाताप नसल्याचे दिसून आले.
जयराम चाटे काल तुरुंगाबाहेर आला तेव्हा त्याच्या चेहऱ्यावर आपण एका गंभीर हत्याप्रकरणातील आरोपी आहोत किंवा आपण माणुसकीला काळिमा फासणारे कृत्य केले आहे, याबद्दलच्या पश्चातापाचा कोणताही लवलेश नव्हता. त्याच्या चेहऱ्यावर कोणतीही भीती किंवा तणाव दिसून आला नाही. मात्र, त्याच्या लूकमध्ये मोठा बदल झाल्याचे पाहायला मिळाले. त्याने पूर्णपणे क्लीन शेव्ह केली होती. त्याने काळ्या रंगाचा शर्ट, राखाडी जिन्स पँट परिधान केली होती. शर्टाचं पहिलं बटण त्याने लावले नव्हते. तसेच जयराम चाटे याने कपाळावर लाल गंध लावले होते. त्याच्या हातात एक रुमालही होता. तो शांतपणे पोलिसांसोबत चालत गाडीत बसला. भावाचे अंत्यविधी संपल्यावर त्याला पुन्हा तुरुंगात नेण्यात आले.
आणखी वाचा
जयराम चाटे तुरुंगातून बाहेर पडण्यापूर्वी गँगचा राडा , बीडमध्ये तरुणावर लोखंडी रॉड, कत्तीने हल्ला
महत्त्वाच्या बातम्या
