मुंबई : गोरेगाव पूर्व (Goregaon East) परिसरात अंगावर काटा आणणारी आणि मन सुन्न करणारी अत्यंत भीषण घटना घडली आहे. अवघ्या 12 वर्षांच्या एका अल्पवयीन मुलीने शेजारी राहणाऱ्या अवघ्या 18 महिन्यांच्या चिमुकल्या बाळाला इमारतीच्या 6 व्या मजल्यावरून खाली फेकून दिले. या दुर्दैवी घटनेत चिमुकल्याचा जागीच मृत्यू झाला आहे. मयत मुलीचं नाव अरिबा खान असं आहे.
दिंडोशी पोलीस ठाण्याच्या (Dindoshi Police) हद्दीतील शिवशाही प्रकल्प, इमारत क्रमांक 1 मध्ये बुधवारी रात्री साडेदहा वाजेच्या सुमारास ही भीषण घटना घडली. या घटनेमुळे संपूर्ण परिसरात प्रचंड खळबळ उडाली असून नागरिकांमध्ये भीतीचे वातावरण पसडले आहे.
खेळताना उचलले अन् डक्टमधून खाली ढकलले
मिळालेल्या माहितीनुसार, 18 महिन्यांचे बाळ रात्री इमारतीच्या 6 व्या मजल्यावर खेळत होते. त्याच वेळी शेजारी राहणाऱ्या 12 वर्षीय मुलीने बाळाला उचलून थेट इमारतीच्या डक्टमधून (Duct) खाली फेकून दिले. इमारतीतून खाली पडल्याने अत्यंत गंभीर इजा होऊन चिमुकलीचा जागेवरच करुण अंत झाला. हा संपूर्ण थरार इमारतीत बसवलेल्या सीसीटीव्ही (CCTV) कॅमेऱ्यात कैद झाला आहे.
पुरावा नष्ट करण्याचा प्रयत्न; मुलगी आणि आई ताब्यात
या घटनेनंतर कृत्य करणाऱ्या मुलीच्या कुटुंबीयांनी सीसीटीव्ही फुटेज आणि इतर पुरावे नष्ट करण्याचा प्रयत्न केल्याचा गंभीर आरोप स्थानिक रहिवाशांकडून करण्यात येत आहे.
या घटनेची माहिती मिळताच दिंडोशी पोलिसांनी घटनास्थळी धाव घेतली. पोलिसांनी सुरुवातीला आकस्मिक मृत्यूची (ADR) नोंद केली होती. त्यानंतर सीसीटीव्ही फुटेज आणि तांत्रिक तपासाच्या आधारे 12 वर्षीय मुलगी आणि तिच्या आईला ताब्यात घेतले आहे. पोलीस या प्रकरणी पुढील सखोल चौकशी करत आहेत.
ही बातमी वाचा: