धुळे : जिल्ह्याच्या साक्री (Dhule) तालुक्यातील पिंपळनेर येथे एका कौटुंबिक विवाह समारंभ प्रसंगी दोन गटात वाद झाल्याची घटना काल गुरुवारी दुपारच्या सुमारास घडली. या वादातून धारदार शस्त्राने वार केल्याने तीन जणांचा मृत्यू झाला होता, तर दोन ते तीन जण गंभीर जखमी झाले आहेत. या घटनेत सोनू गोसावी, देवेंद्र पवार यांचा जागीच मृत्यू झाला असून, साई गोसावी यांचा धुळ्यात खासगी रुग्णालयात उपचारादरम्यान मृत्यू झाला. आता, या हत्याकांडामागील किरकोळ कारण समोर आलं असून लग्नपत्रिकेत नाव न टाकल्याने हा वाद सुरू झाल्याची माहिती पुढे आली आहे. याप्रकरणी, पोलिसांनी (Police) आरोपींना अटक केली आहे.
पोलिसांनी याप्रकरणी सोनगड येथील दोन संशयितांना आणि वाहनचालकाला ताब्यात घेतले होते. तर रात्री आणखी एका आरोपीला ताब्यात घेण्यात आले असून याप्रकरणी पिंपळनेर पोलीस ठाण्यात गुन्हा दाखल करण्यात आला आहे. साक्री तालुक्यातील पिंपळनेर येथे एका विवाह सोहळ्यात भाऊबंदांमध्ये वाद होऊन साखरपुड्याच्या मंडपात तुफान हाणामारी झाल्याची घटना घडली या घटनेत धारदार शस्त्रांचा वापर करण्यात आल्याने तीन जणांचा मृत्यू झाल्याची धक्कादायक घटना घडली होती. यात 3 जणांचा मृत्यू झालं असून तीन जण गंभीर जखमी झाले आहेत. या घटनेतील भांडणाचं प्रमुख कारण आता समोर आलंय.
या वादामागील मूळ कारण आता समोर आले असून लग्न पत्रिकेत सोनगड (गुजरात) येथील गोसावी समाजातील लोकांची नावे का नमूद केली नाहीत, यावरून सोनगड येथे काही महिन्यांपूर्वी वाद निर्माण झाला होता. तसेच गोसावी समाजातील लग्न समारंभ व इतर सामाजिक कार्यक्रमांमध्ये वर्चस्व कोणाचे असावे, यावरून सोनगड व पिंपळनेर येथील गोसावी समाजातील व्यक्तींमध्ये मतभेद सुरू होते. या वादातून ही घटना घडल्याची माहिती समोर आली आहे.
गुजरातला पळून जाताना अटक
पिंपळनेर पोलिसांनी या घटनेतील आरोपी ब्रेझा कारमधून गुजरातला पळून जात असताना सापळ रचून अटक केली. पोलिसांनी ओटाबरी या गुजरात बॉर्डर घाटातील रहिवाशांना गाडीचा नंबर देऊन ट्रॅफिक जाम करण्यास सांगितले. त्यातून घटनेतील आरोपींना पकडण्यात पोलिसांना यश आले असून हे तिन्ही आरोपी गुजरात राज्यातील सोनगड येथील रहिवासी असून याप्रकरणी कांतीलाल गोसावी (वय 42) आणि जसवंत गोसावी (वय 36) आणि वाहनचालक अशा तिघांना ताब्यात घेण्यात आले आहे. याप्रकरणी काल पोलिसांनी तीन जणांना अटक केल्यानंतर आणखी एका आरोपीला अटक करण्यात आली आहे. अनिल हट्टू गोसावी याला गुजरातमधून पिंपळनेर पोलिसांनी अटक केली. अनिल गोसावी यांनी गेल्या काही दिवसांपूर्वी व्हाट्सअप स्टेटस ठेवत चेथावणी दिल्याचा देखील प्रकार यातून समोर आला आहे.