Chhatrapati Sambhajinagar Crime : समृद्धी महामार्गावरील (Samruddhi Mahamarg) सावंगी टोल नाक्यावर शुक्रवारी रात्री ‘पिस्तूल खरी की खोटी’ असे दाखवताना गोळी झाडली गेल्याने एक कर्मचारी गंभीर जखमी झाल्याची धक्कादायक घटना घडली आहे. हा प्रकार शुक्रवारी रात्री सुमारे 9 वाजेच्या सुमारास टोलनाका परिसरातील एका खोलीत घडला. विशेष म्हणजे, या प्रकरणातील दोघेही कर्मचारी रेकॉर्डवरील गुन्हेगार असल्याची धक्कादायक माहिती समोर आली आहे. यामुळे टोल नाक्यावर कर्मचारी भरती करताना पार्श्वभूमी तपासली जाते की नाही? हा गंभीर प्रश्न निर्माण झाला आहे.
याबाबत मिळालेल्या माहितीनुसार, भरत विजय घाटगे आणि करण सोमिनाथ भालेराव (दोघेही सावंगी गावचे) हे दोघे मित्र समृद्धी महामार्गाच्या सावंगी टोल नाक्यावर सुरक्षा कर्मचाऱ्याचे काम करत होते. 12 जुलै रोजी रात्री 9 वाजण्याच्या सुमारास दोघे टोलनाक्यावरील एका खोलीत बसले होते. या वेळी करण याने त्याच्याकडे असलेले पिस्तूल काढून भरतला दाखवले. भरतने ते नकली असल्याचा अंदाज व्यक्त केला.
दोघेही रेकॉर्डवरील गुन्हेगार
यावर करणने ते खरे असल्याचे सांगत, “तुला चालवून दाखवू का?” असे म्हणत ट्रिगर दाबले. त्या वेळी पिस्तूलमधून गोळी झाडली गेली आणि ती थेट भरतच्या पोटात घुसली. त्यानंतर घटनास्थळी एकच गोंधळ उडाला. जखमी भरतला तातडीने छत्रपती संभाजीनगर येथील घाटी रुग्णालयात दाखल करण्यात आले असून, त्याच्यावर सध्या उपचार सुरू आहेत. दरम्यान, या दोघांविरुद्ध यापूर्वीही विविध गुन्ह्यांची नोंद असल्याचे समोर येत आहे. त्यामुळे अशा व्यक्तींना समृद्धी महामार्गासारख्या महत्वाच्या प्रकल्पावर सुरक्षा कर्मचाऱ्याच्या भूमिकेत कसे नेमले गेले? यावर प्रश्नचिन्ह निर्माण झाले आहे.
वाळूज एमआयडीसी परिसरात एकाची हत्या
दरम्यान, छत्रपती संभाजीनगरच्या वाळूज एमआयडीसी परिसरातून एक धक्कादायक घटना समोर आली आहे. अंबेलोहळ गावातील गट क्रमांक 37 मध्ये 23 वर्षीय तरुणाची कपडे काढून अमानुष मारहाण करत हत्या करण्यात आल्याची माहिती उघड झाली आहे. मृत युवकाचे नाव अर्जुन रतन प्रधान असे असून, तो वाळूज एमआयडीसीतील एका खासगी कंपनीत काम करत होता. अर्जुनचा सावत्र भाऊ रामकृष्ण प्रधान याला अर्जुन रस्त्याच्या कडेला अर्धनग्न अवस्थेत गंभीर जखमी स्थितीत आढळून आला. त्याने तातडीने याची माहिती पोलिसांना दिली. घटनेची माहिती मिळताच वाळूज एमआयडीसी पोलीस घटनास्थळी दाखल झाले व पंचनामा केला. पोलिसांच्या प्राथमिक तपासात, अर्जुनला कपडे काढून निर्घृणपणे मारहाण करण्यात आल्याचे स्पष्ट झाले आहे. याच मारहाणीत त्याचा मृत्यू झाल्याचा पोलिसांचा संशय आहे. मात्र, ही अमानुष मारहाण नेमकी कोणी आणि कुठल्या कारणाने केली, हे अद्याप अस्पष्ट असून याचा शोध घेण्यासाठी पोलीस तपास करत आहेत.
आणखी वाचा