Chandrapur Crime News: लग्नसराईची धामधूम, उन्हाळ्यात दूध उत्पादन घटलं, बदमाशांनी दीड लाखांचं बनावट पनीर बाजारात आणलं!
Chandrapur Crime News : चंद्रपुरात अन्न व औषध प्रशासनाच्या पथकाने दीड लाख रुपयांचे 472 किलो बनावट पनीर जप्त केलंय. या कारवाईमुळे सर्वत्र एकच खळबळ उडाली आहे.
चंद्रपूर : सध्या सर्वत्र लग्नसराईची धामधूम बघायला मिळत आहे. दरम्यानच्या या काळात दूध आणि दुग्धजन्य पदार्थांची मागणी देखील होते. मात्र उन्हाळा लागताच दुधाचं उत्पादन कमी झाल्याने दूध, पनीर आणि इतर दुग्धजन्य पदार्थ ज्यादा किमतीत देखील विकले जातात. याच संधीचा फायदा घेत भेसळयुक्त आणि बनावट पनीर विक्रीचा सुळसुळाट देखील बघायला मिळतो. असाच एक प्रकार चंद्रपूर (Chandrapur Crime News) शहरात उघड झाला आहे. यात सुमारे दीड लाखांचे 472 किलो बनावट पनीर जप्त करण्यात पोलिसांना यश आले आहे.
सुमारे दीड लाखांचं बनावट पनीर जप्त, चंद्रपूरात खळबळ!
पुढे आलेल्या माहितीनुसार, पनीरच्या नावाखाली चीज अनॅलॉगची विक्री करण्याचा प्रकार पोलिसांनी हाणून पडला आहे. उन्हाळा लागताच दुधाचं उत्पादन कमी झाल्याने आणि लग्न सराईचे दिवस असल्याने पनीरची बाजारात मागणी वाढली आहे. मात्र याचाच फायदा घेत बनावट पनीर बाजारात विकल्या जात असल्याची माहिती अन्न व औषध प्रशासन विभागाला मिळाली होती. अशातच चंद्रपुरात अन्न व औषध प्रशासनाच्या पथकाने दीड लाख रुपयांचे 472 किलो बनावट पनीर जप्त केलंय. या कारवाईमुळे सर्वत्र एकच खळबळ उडाली आहे.
चंद्रपूर शहरातील सपना डेली नीड्स या दुकानातून चीज अनॅलॉग हा अन्नपदार्थ पनीर म्हणून विक्री करत असल्याचे लक्षात आल्यावर ही धाड टाकण्यात आली. या धाडीत सुमारे 197 किलो साठा जप्त करण्यात आला. तर दुसऱ्या कारवाईत शहरातील मुख्य गोल बाजार परिसरातील न्यू भाग्यश्री घी भंडार या दुकानातून 275 किलो हाच पदार्थ जप्त करण्यात आला. दोन्ही कारवाईतील नमुने प्रयोगशाळेत विश्लेषणासाठी पाठवण्यात आले असून त्यानंतर अन्न व सुरक्षा मानके कायदा 2006 अंतर्गत संबंधित दुकानदारांवर कारवाई करण्यात येणार आहे.
पुण्यातील भेसळयुक्त पनीर बनविण्याच्या कारखान्यावर छापा
पुण्यातील मांजरी खुर्द येथील कारखान्यावर पुणे पोलीसांच्या गुन्हे शाखेची छापेमारी करत भेसळयुक्त पनीर जप्त केल आहे. पोलिसांच्या या छापेमारीत सुमारे 1400 किलो पनीर जप्त केलंय. हे पनीरचे नमुने तपासणीसाठी प्रयोगशाळेत पाठविण्यात आले असल्याची माहिती पुढे आली आहे. मिळालेल्या माहितीनुसार, पुणे पोलिसांच्या युनिट 6 मधील कर्मचाऱ्यांना एका कारखान्यात भेसळयुक्त पनीर बनविले जात असल्याची माहिती मिळाली.
पोलिसांनी ही बाब अन्न व औषध प्रशासन विभागाला कळवली. पोलिसांनी आणि औषध प्रशासन विभागाने या कारखान्यावर संयुक्त कारवाई केली. या कारवाईत कारखान्यातून 400 किलो जीएमएस पावडर, 1800 किलो एस एम पी पावडर, 718 लिटर पामतेल तसेच 1400 किलो भेसळयुक्त पनीर असा 11 लाख रुपयांचा मुद्देमाल जप्त केला आहे. तर या घटनेचा अधिक तपास पोलिसांकडून सुरू आहे.
हे ही वाचा
महत्त्वाच्या बातम्या
