पोलीस अंमलदार ACB च्या जाळ्यात, 10 हजारांची लाच घेताना रंगेहात अटक; 'कॅरेक्टर खराब करुन टाकीन'चा व्हिडिओ व्हायरल
पोलीस अंमलदार बळवंत यांनी, काही महिन्यांपूर्वी एका तरुणाला तुझे कॅरेक्टर खराब करून टाकेल, अशी धमकी दिल्याचा कथित व्हिडिओ व्हायरल झाला होता.
बीड : राज्यातील सरकारी कार्यालय, प्रशासकीय खात्यात, पोलीस (Police) खात्यात होत असलेला भ्रष्टाचार सातत्याने समोर येत आहे. गेल्या काही महिन्यात एसीबीने अनेक जिल्ह्यात धाडी टाकून बड्या अधिकाऱ्यांसह सरकारी नोकरदारांना रंगेहात अटक केली आहे. आता, बीड (Beed) जिल्ह्याच्या नेकनूर पोलीस ठाण्यात कार्यरत असलेल्या अंमलदार बळवंत यास 10 हजारांची लाच (bribe) स्वीकारताना जालना लाचलुचपत प्रतिबंधक विभागाने रंगेहात अटक केली आहे. विशेष म्हणजे ही कारवाई नेकनूर पोलीस ठाण्याच्या आवारातच करण्यात आली. त्यामुळे जिल्हा पोलीस दलात खळबळ उडाली आहे. अमलदार बळवंत हे नेहमीच वादग्रस्त राहिलेले पोलीस कर्मचारी आहेत.
पोलीस अंमलदार दत्तात्रय बळवंत यांनी, काही महिन्यांपूर्वी एका तरुणाला तुझे कॅरेक्टर खराब करून टाकेल, अशी धमकी दिल्याचा कथित व्हिडिओ व्हायरल झाला होता. त्यानंतर, त्यांच्यावर टीकेची झोड उठली होती. आता, त्याच बळवंत महोदयांना लाच प्रकरणात अटक करण्यात आली आहे. एका प्रकरणातील काम करण्यासाठी संबंधित अंमलदाराने तक्रारदाराकडे लाचेची मागणी केली होती. याबाबत तक्रार प्राप्त झाल्यानंतर जालना एसीबीने पडताळणी करुन सापळा रचला. त्यानुसार उपअधीक्षक बाळासाहेब जाधवर यांच्या मार्गदर्शनाखालील पथकाने नेकनूर पोलीस ठाण्याच्या परिसरात कारवाई करत अंमलदार बळवंत यांस 10 हजारांची लाच स्वीकारताना रंगेहाथ पकडले.
अंमलदाराने शेतकऱ्याला दिली होती धमकी
दरम्यान, या कारवाईनंतर आरोपीविरुद्ध गुन्हा दाखल करण्याची प्रक्रिया सुरू असून पुढील तपास एसीबीकडून करण्यात येत आहे. अटक करण्यात आलेला हा कर्मचारी यापूर्वीही वादाच्या भोवऱ्यात सापडला होता. काही महिन्यांपूर्वी शेतीच्या कारणावरून झालेल्या वादात संबंधित अंमलदार एका व्यक्तीस “कॅरेक्टर खराब करून टाकीन” अशी धमकी देत असल्याचा व्हिडिओ सोशल मीडियावर व्हायरल झाला होता. त्या घटनेनंतरही अंमलदाराच्या वर्तणुकीबाबत प्रश्नचिन्ह उपस्थित झाले होते. आता, लाच स्वीकारताना झालेल्या कारवाईमुळे पुन्हा एकदा नेकनूर पोलीस ठाणे चर्चेत आले आहे.
हेही वाचा
महत्त्वाच्या बातम्या
