Beed Crime News : भाजपचा पदाधिकारी आणि आमदार सुरेश धस यांचा कार्यकर्ता अशी ओळख असलेला सतीश भोसले उर्फ खोक्या संदर्भात एक मोठी बातमी समोर आली आहे. बुलढाणा जिल्ह्यातील कैलास वाघ या तरुणाला बॅटने बेदम मारहाण केलेल्या प्रकरणात सतीश उर्फ खोक्या भोसलेला बीड न्यायालयाने या प्रकरणात जामीन मंजूर केलाय. पाच महिन्यांपूर्वी सोशल माध्यमांवर प्रचंड व्हायरल होत चर्चेत आलेल्या व्हिडिओतून हा सर्व प्रकार समोर आला होता. या प्रकरणात चकलांबा पोलीस ठाण्यात सतीश भोसले विरोधात गुन्हा दाखल करण्यात आला होता.
दरम्यान, या प्रकरणाची सुनावणी आज बीड सत्र न्यायालयात पार पडली. या प्रकरणात न्यायालयाने खोक्याला जामीन मंजूर केलाय. बुलढाण्यातील कैलास वाघ याला सिनेस्टाईल पद्धतीने रिंगण करून सतीश भोसलेसह त्याच्या साथीदाराने बॅटने बेदम मारहाण केली होती आणि याच घटनेचा व्हिडिओ देखील समोर आला होता. गुन्हेगारी पार्श्वभूमी असलेल्या सतीश भोसले विरोधात गंभीर स्वरूपाच्या गुन्ह्यांची नोंद आहे. यात मारहाण, प्राणघातक हल्ला, फसवणूक, खुनाचा गुन्हा असे वेगवेगळ्या पोलीस ठाण्यांमध्ये गुन्हे दाखल आहेत.
खोक्याच्या गुन्हेगारी पार्श्वभूमी, आतापर्यंत नेमकं काय काय झालं? (Satish Bhosale Criminal Background)
दरम्यान, खोक्याच्या गुन्हेगारी पार्श्वभूमी लक्ष्यात घेता काही महिन्यापूर्वी वनविभागाच्या जागेवर दुमजली इमारत आणि त्या बाजूला आलिशान ऑफिसमधून सतीश भोसले चालवत असल्याचे लक्षात आल्यानंतर वनविभागाने सतीश भोसले उर्फ खोक्याच्या अनधिकृत घरावर तसेच ऑफिसवर बुलडोझर चालवला होता. तसेच शिरूर दिवाणी व फौजदारी न्यायालयात त्याला हजर केले असता सतीश भोसलेची रवानगी न्यायालयीन कोठडीत करण्यात आली होती. दरम्यान काही दिवसांपूर्वी सतीश भोसलेचे वाढलेले घर अज्ञातांनी पेटवून दिल्याची घटना घडली होती. यात त्याच्या घरातील जीवनावश्यक वस्तू, जनावरांचा चारा ही खाक झाला व घराचही मोठं नुकसान झालं होतं. दरम्यान सतीश भोसलेच्या कुटुंबातील महिलेला मारहाण केल्याची घटनाही घडली होती. या घटनेनंतर धाराशिवमध्ये सतीश भोसले उर्फ खोक्याच्या कुटुंबीयांच्या समर्थनार्थ आदिवासी समाज आक्रमक झाला होता.
वनविभागाकडून सतीश भोसलेच्या घरावर करण्यात आलेल्या कारवाईच्या निषेधार्थ तुळजापुरात रास्ता रोको करण्यात आला होता. वनविभागाच्या अधिकाऱ्यांवर कारवाई करावी. सतीश भोसलेच्या जातीवाचक उल्लेख करणाऱ्यांवर ॲट्रॉसिटी अंतर्गत गुन्हा दाखल करावा, अशी मागणी त्यावेळी करण्यात आली होती. सतीश भोसले खोक्या नाही तर आमचा विठ्ठल असल्याचेही तेव्हा म्हटल्या जात होतं. अशातच आता सतीश भोसलेला न्यायालयाने दिलासा देत त्याचा जामीन मंजूर केला आहे.
कोण आहे सतीश भोसले? (Who is Satish Bhosale?)
सतीश भोसले उर्फ खोक्या भाई हा शिरूर कासार तालुक्यातील झापेवाडीचा रहिवासी आहे . मागील पाच वर्षांपासून तो राजकारणात सक्रिय होता .भाजप आमदार सुरेश धस यांचा जवळचा सहकारी व भाजपचा पदाधिकारी अशी त्याची ओळख आहे .सतीश भोसले वर अनेक गंभीर गुन्ह्यांची नोंद आहे .काही महिन्यांपूर्वी समाज माध्यमांवर दहशत पसरवणारे त्याचे व्हिडिओ व्हायरल झाले होते .वनविभागाची कारवाई व घरात सापडलेल्या ऐवजामुळे बीडमध्ये व राज्यभर खोक्या भाईची एकच चर्चा होती .
इतर महत्वाच्या बातम्या