टँकरच्या धडकेत तीन मित्रांचा मृत्यू; बीड महामार्गावरील दुर्घटना, रस्ते कामावरुन नागरिकांचा संताप
बीड ते अहिल्यानगर या राष्ट्रीय महामार्गावरील उखंडा तलावानजीक एका भरधाव वेगातील टँकरने दुचाकीला धडक दिली.
बीड : जिल्ह्यातून जाणाऱ्या बीड ते अहिल्यानगर (Beed) या राष्ट्रीय महामार्गाचे गेल्या दोन वर्षापासून काम सुरू आहे. त्यामुळे, या रस्त्यावरुन प्रवास करणाऱ्या प्रवाशांना भरधाव वेगाने जाताना काळजी घ्यावी लागते. विशेष म्हणजे, रस्त्याचे काम सुरू असताना ठिकठिकाणी सूचनाफलक लावण्याची तसदी मात्र या कंत्राटदाराने घेतलेली नाही, आणि याचे परिणाम या रस्त्यावरून प्रवास करणाऱ्यांना भोगावे लागत आहेत. त्यातूनच आज महामार्गावर भीषण अपघाताची (Accident) घटना घडली. या अपघातात तिघांचा जागीच मृत्यू झाल्याने सर्वत्र हळहळ आणि रस्तेकामाविरुद्ध तीव्र संताप व्यक्त होत आहे.
आजचा वार अपघात वार ठरला असून महाराष्ट्रातील तीन जिल्ह्यात भीषण अपघाताच्या घटना घडल्या आहेत. विविध ठिकाणी झालेल्या या अपघातात तब्बल 21 जणांचा मृत्यू झाला असून नांदेड, भंडारा आणि अहिल्यानगरमधील कुटुबीय आणि नातेवाईकांवर शोककळा पसरली आहे. आता, बीड जिल्ह्यातही असाच भीषण अपघात झाला असून यात 3 जणांचा जागीच मृत्यू झाल्याची घटना घडली. बीड ते अहिल्यानगर या राष्ट्रीय महामार्गावरील उखंडा तलावानजीक एका भरधाव वेगातील टँकरने दुचाकीला धडक दिली. त्यामध्ये दुचाकीवरील तीन मित्रांचा जागीच मृत्यू झाल्याची दुर्दैवी घटना घडली. कैलास टुले, ऋषिकेश फुलझळके आणि अक्षय शिंदे अशी तिन्ही मृतांची नावे आहेत. रस्त्याचे काम करताना सूचनाफलक लावण्याबरोबरच योग्य ठिकाणी बॅरिकेटिंग केली असती तर हा अपघात टाळता आला असता अशी चर्चा परिसरातील नागरिकांत होत आहे. मात्र, या दुर्घटनेत तीन मित्रांचा जागीच मृत्यू झाल्याने कुटुंबीयांवर शोककळा पसरली आहे.
हेही वाचा
महत्त्वाच्या बातम्या
