Ahilyanagar Crime News : अहिल्यानगर दक्षिण कमांड मिलीटरी इंटेलिजेंस यांच्या गुप्त बातमीद्वारे अहिल्यानगरच्या एमआयडी पोलिसांनी (Ahilyanagar MIDC Police) कारवाई करत पोखर्डी शिवारातून तीन बांगलादेशी नागरिकांना ताब्यात घेतलं आहे. मागील दोन वर्षांपासून हे बांगलादेशी (Bangladeshi citizens) अवैधरित्या अहिल्यानगरमध्ये राहत होते. जहांगिर अबुताहेर शेख (रा. चातपुर ठाणा हजीगंज, राज्य चेटोग्राम, बांगलादेश), हनीफ अब्दुल खलीद शेख (रा. खजीर खाली थाना शेनवाग पोस्टे शेबरहाट बांगलादेश) आणि मश्रफ हबीब शेख (रा. चातपुर ठाणा हजीगंज, राज्य चेटोग्राम, बांगलादेश) अशी ताब्यात घेण्यात आलेल्या बांग्लादेशी नागरिकांची नाव आहेत. (Ahilyanagar Crime News)
कुठलाही व्हिजा अथवा परवानगी नसताना विनापरवाना घुसखोरी करुन पोखर्डी शिवारात राहत होते, अशी गोपनिय माहिती मिळाल्याने एमआडीसी पोलीस स्टेशनचे दहशतवाद विरोधी पथकातील अधिकारी आणि अमंलदार यांनी स्वतः जावून खात्री केली. यावेळी पोखर्डी शिवारात (Pokhardi Shivar) एका खडी क्रेशरवर तिन संशयित इसम मिळून आले. त्यांची विचारपूस केली असता त्यांनी उडवाउडवीची उत्तरे दिली.
एमआयडीसी पोलीस स्टेशनमध्ये गुन्हा दाखल
त्यांच्याकडे कुठलीही परवानगी अथवा परवानगीची कागदपत्रे मळून आली नाही. त्यांच्याकडे बनावट आधारकार्ड, पॅनकार्ड आणि इतर बनावट कागदपत्रे मिळून आली असून ती जप्त करण्यात आली आहे. सदर बांगलादेशी नागरिकांवर एमआयडीसी पोलीस स्टेशन येथे गुन्हा दाखल करून पुढील कारवाई सुरू आहे. सदर कारवाईमध्ये सदन कमांड मिलीटरी इन्टेलिजन्स अहिल्यानगर यांची मदत घेण्यात आली.
गुप्तचर यंत्रणा करतेय काय?
दरम्यान, संबंधित व्यक्तींचा एखाद्या देशविरोधी कारवाईत सहभागी आहे का? यांच्यासह इतर काही लोक अवैधरित्या घुसखोरी करून अहिल्यानगर किंवा महाराष्ट्रात राहत आहेत का? याची चौकशी सुरू करण्यात आली आहे. मात्र, एमआयडीसी पोलीस ठाण्याच्या हद्दीत पोलिसांच्या नाकावर टिच्चून दोन वर्षे बांग्लादेशी अवैधरीत्या वास्तव्यास होते. पोलिसांची गुप्तचर यंत्रणा करतेय काय? असा सवाल उपस्थित होत असून थेट मिलीटरी इन्टेलिजन्सने माहिती कळवल्यानंतर कारवाई झाल्याने आश्चर्य व्यक्त होत आहे.
इतर महत्त्वाच्या बातम्या