Shloka Mehta Ambani : श्लोका मेहता अंबानी यांची प्रेरणादायक कहाणी; मातृत्व, समाजसेवा आणि ConnectFor चा यशस्वी प्रवास
Shloka Mehta Ambani ConnectFor : श्लोका मेहता अंबानी यांनी एका शोमध्ये मातृत्व आणि त्यांच्या नॉन-प्रॉफिट संस्थेचे कार्य यामध्ये संतुलन साधण्यावर आणि अंबानी कुटुंबाच्या सहकार्यावर चर्चा केली.
मुंबई : उद्योगपती आकाश अंबानी यांच्या पत्नी श्लोका मेहता अंबानी यांनी अलीकडेच ‘मासूम मीनावाला’च्या शोमध्ये त्यांच्या खासगी आयुष्याबद्दल मोकळेपणाने संवाद साधला. श्लोका मेहता अंबानी या 'कनेक्टफॉर' या परोपकारी व ना-नफा मंचच्या सह-संस्थापकही आहेत. या शोमध्ये बोलताना त्यांनी सांगितले की, आई झाल्यानंतर समाजात सकारात्मक बदल घडवण्याची त्यांची बांधिलकी आणखीनच बळकट झाली आहे.
अंबानी कुटुंबाने प्रत्येक टप्प्यावर साथ दिली
'मासूम मीनावाला' शोमध्ये श्लोका यांनी आईपण आणि एक उद्दिष्टाधिष्ठित संस्था चालवण्याच्या अनुभवांबाबत मोकळेपणाने सांगितले. त्यांनी स्पष्ट केले की, त्यांच्या सासरच्या मंडळींनी, अंबानी कुटुंबाने त्यांना प्रत्येक टप्प्यावर साथ दिली आहे.
कनेक्टफॉरचा प्रवास आणि यश
श्लोका यांनी त्यांच्या सह-संस्थापक मनिती शहा यांच्या सोबत 'कनेक्टफॉर' ची स्थापना केली. आजपर्यंत या प्लॅटफॉर्मने 1 लाखांहून अधिक स्वयंसेवकांना 1,000 पेक्षा अधिक स्वयंसेवी संस्थांशी जोडले आहे. या कामामुळे सामाजिक क्षेत्रात सुमारे 21 कोटी रुपयांची बचत झाली आहे. श्लोका म्हणाल्या, “माझा मुलगा सध्या दोन वर्षांचा आहे, पण त्याला माहीत आहे की मम्मी ऑफिसला जाते. त्याने हे पाहणं आवश्यक आहे की आम्ही काहीतरी चांगलं करण्याचा प्रयत्न करत आहोत.”
कुटुंबाचा ठाम पाठिंबा
श्लोका यांनी त्यांच्या सासरच्या कुटुंबाचे, विशेषतः पती आकाश अंबानी आणि त्यांच्या पालकांचे कौतुक केले. त्या म्हणाल्या, माझे पती आणि कुटुंबीयांना माझा खूप अभिमान आहे. माझी कामगिरी ते माझ्याहून अधिक चांगल्या प्रकारे मांडतात. कुटुंबाच्या या पाठिंब्यामुळे आपल्याला ‘कनेक्टफॉर’ पुढे नेण्यास आणि स्वतःचे ध्येय आत्मविश्वासाने पूर्ण करण्यास मदत झाली असं श्लोका म्हणतात.
View this post on Instagram
शिक्षण आणि सामाजिक कामांमध्ये रस
श्लोका यांनी प्रिन्स्टन युनिव्हर्सिटीमधून मानववंशशास्त्र (Anthropology) आणि लंडन स्कूल ऑफ इकॉनॉमिक्स (LSE) मधून कायद्याचं शिक्षण घेतलं आहे. त्यांचे प्रबंध आणि संशोधन सामाजिक विषयांशी संबंधित होते, जे त्यांच्या परोपकारी वृत्तीला अधोरेखित करतात. त्यांचा विश्वास आहे की, उद्दिष्टांची सुरुवात घरापासून होते. त्या म्हणतात, “तुम्ही गृहिणी असाल, उद्योजिका किंवा कॉर्पोरेटमध्ये काम करणाऱ्या, प्रत्येक कामाची किंमत आहे. त्याचं मूल्य किती तास काम केलं यावरून मोजता येत नाही.”
कनेक्टफॉरचा उद्देश काय आहे?
श्लोका आणि मनिती यांनी 'कनेक्टफॉर' ची स्थापना ना-नफा क्षेत्रात कॉर्पोरेट स्तरावरील व्यावसायिकता आणण्यासाठी केली. उद्देश होता स्वयंसेवक आणि स्वयंसेवी संस्थांमधील समन्वय अधिक परिणामकारकपणे घडवणं आणि ‘कम्युनिटी कॅपिटल’च्या आधारे दीर्घकालीन सामाजिक प्रभाव निर्माण करणं. श्लोका म्हणाल्या, आम्ही स्वतः एनजीओंना भेट दिल्या, त्यांच्या कार्यालयात गेलो आणि स्वयंसेवक जोडण्यासाठी गुगल फॉर्म्स वापरले.
लग्न आणि आई झाल्यानंतरही कार्य सुरू
लग्न आणि आई झाल्यानंतरही श्लोका आणि मनिती यांनी 'कनेक्टफॉर' चे काम कधीही थांबू दिलं नाही. श्लोका अभिमानाने सांगतात की, “गेल्या 10 वर्षांत एकही दिवस असा गेला नाही की कनेक्टफॉर बंद राहिलं. त्या पुढे म्हणाल्या की, “आपली आई काहीतरी उत्कटतेने चांगलं काम करते हे माझ्या मुलाने समजावून घ्यावं आणि त्यानेही तशाच प्रकारचं काम करावं".
'कनेक्टफॉर' ला अधिक लोकांपर्यंत पोहोचवण्याची गरज
पूर्वी श्लोका आणि मनिती यांनी 'कनेक्टफॉर' बाबत फारसा प्रचार केला नव्हता, पण आता संस्थेचा विस्तार वाढल्यामुळे आणि लोक स्वयंसेवेमध्ये रस दाखवू लागल्यामुळे, त्यांनी ठरवलं आहे की लोकांनी त्यांच्या कामाविषयी जाणलं पाहिजे. श्लोका म्हणाल्या की, “आता लोक समाजाला काहीतरी परत देण्याची इच्छा बाळगतात. म्हणून लोकांनी हे जाणणं महत्त्वाचं आहे की आम्ही काय करतो.”
आज ‘कनेक्टफॉर’ एक मजबूत मंच आहे, जो स्वयंसेवक आणि स्वयंसेवी संस्थांना जोडून समाजात सकारात्मक बदल घडवत आहे. श्लोका यांची ही प्रेरणादायी कहाणी दाखवते की, जिद्द आणि पाठिंब्याच्या जोरावर कोणतंही उद्दिष्ट पूर्ण करता येऊ शकतं.
महत्त्वाच्या बातम्या
