Share Market Crash : अमेरिकेत AI कंपन्यांचा फुगा फुटला, 2026 मधील सर्वात मोठी घसरण, भारताला फायदा होणार, तज्ज्ञांनी काय सांगितलं?
Share Market Crash: अमेरिकन शेअर बाजारात शुक्रवारी मोठी घसरण झाली. काही तासात गुंतवणूकदारांचे 2 लाख ट्रिलियन डॉलर बुडाले. भारतीय बाजारात त्याचे पडसाद उमटण्याची शक्यता आहे.
नवी दिल्ली : अमेरिकन शेअर बाजारात शुक्रवारी मोठी पडझड पाहायला मिळाली. एका तासात गुंतवणूकदारांचे 2 ट्रिलियन डॉलर्स म्हणजे 190 लाख कोटी रुपये बुडाले. वॉल स्ट्रीटवरील 2026 मधील सर्वात मोठी घसरण आहे. वॉल स्ट्रीटवरील तीन एक्सचेंज डाओ जोन्स, एस अँड पी 500 आणि नॅस्डॅकवर विक्रीचं जोरदार सत्र पाहायला मिळालं. अमेरिकन जॉब मार्केटची आकडेवारी मजबूत राहिल्यानं फेड रिझर्व्हकडून व्याज दर अधिक ठेवला जाण्याची शक्यता असल्यानं गुंतवणूकदारांनी धडाधड विक्री सुरु केली.
अमेरिकन टेक कंपन्यांच्या शेअरमध्ये मोठी घसरण
अमेरिकन शेअर बाजारात टेक कंपन्यांच्या शेअरमध्ये मोठी घसरण पाहायला मिळाली. सेमीकंडक्टर म्हणजेच चिप कंपन्यांचे स्टॉक घसरले. ब्रॉडकॉम 8 टक्के, मार्वेल टेक्नोलॉजी 16 टक्के, इंटेल 11 टक्के, AMD 11 टक्के, मायक्रॉन टेक्नोलॉजी 13 टक्क्यांनी घसरले. या घसरणीचा परिणाम अमेरिकन शेअर बाजारावर पाहायला मिळाला.
भारतात ब्लॅक मंडेची भीती पण आशेचा एक किरण
अमेरिकन शेअर बाजारातील घसरणीमुळं भारतीय शेअर बाजारात देखील आज मोठी घसरण होण्याची शक्यता वर्तवली जात आहे. भारतीय शेअर बाजारात आज मोठी घसरण झाल्यास आजचा सोमवार ब्लॅक मंडे ठरणार का अशी भीती व्यक्त केली जातेय. जिओजित इन्वेस्टमेंटसचे मुख्य गुंतवणूक रणनीतीकार डॉ. वी.के. विजयकुमार यांनी अमेरिकेत आर्टिफिशिअल इंटेलिजन्सशी संबंधित तेजी थंडावल्यास भारतीय बाजारातून बाहेर जाणारे गुंतवणूकदार परत येऊ शकतात असं म्हटलं आहे. ते म्हणाले की भारतीय बाजारातून विदेशी पोर्टफोलिओ गुंतवणूकदारांनी 32296 कोटी रुपये काढून घेतले. तर, जून महिन्यात 6 जून पर्यंत 42926 कोटी रुपये काढून घेतले. 2026 मध्ये FPI नं 283662 कोटी रुपये भारतीय बाजारातून काढून घेतले आहेत.
डॉ. विजयकुमार यांच्या मते भारतीय बाजारातून विदेशी गुंतवणूकदारांनी पैसे काढन घेण्याचं कारण अमेरिकेचं AI ट्रेड होता. मात्र 5 जूनला नॅस्डॅकमध्ये झालेली 5 टक्क्यांची घसरण एआयचा फुगा फुटत असल्याचे प्राथमिक संकेत असू शकतात. हाच ट्रेंड सुरु राहिला तर विदेशी गुंतवणूकदार पुन्हा भारताकडे परत येऊ शकतात. म्हणजेच येत्या काळात FPI डेटासह, अमेरिकन टेक शेअरची कामगिरी आणि AI ट्रेडवर देखील लक्ष ठेवावं लागेल, त्यातून भारतीय बाजाराची पुढील दिशा स्पष्ट होईल, असं विजयकुमार यांनी म्हटलं.
दरम्यान, केंद्र सरकार आणि आरबीआयनं विदेशी गुंतवणूक आकर्षित करण्याचा प्रयत्न करत आहे. सरकारी बाँडमध्ये गुंतवणूक करणाऱ्यांना व्याज आणि कॅपिटल गेन टॅक्समध्ये सूट देण्याची घोषणा केली आहे. याशिवाय इतर निर्णय देखील घेण्यात आले आहेत.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
महत्त्वाच्या बातम्या
