PM Kisan Scheme : पंतप्रधान किसान सन्मान निधी योजना केंद्र सरकारच्या कृषी आणि ग्रामीण विकास मंत्रालयाकडून चालवली जाते. या योजनेच्या माध्यमातून देशभरातील शेतकऱ्यांना दरवर्षी 6000 रुपये दिले जातात. आतापर्यंत देशातील शेतकर्यांना पीएम किसान योजनेचे 18 हप्ते (36000 रुपये) मिळाले आहेत. आता पीएम किसान सन्मान निधी योजनेचा 19 वा हप्ता शेतकऱ्यांना लवकरच मिळणार आहे. पंतप्रधान नरेंद्र मोदी यांच्या हस्ते 19 व्या हप्त्याचं वितरण सोमवारी (24 फेब्रुवारी) केलं जाणार आहे. पीएम किसान सन्मान निधीच्या वितरणाचा कार्यक्रम बिहारमध्ये पार पडणार आहे.
पीएम किसान सन्मान निधी योजनेचा डिसेंबर 2024 ते मार्च 2025 कालावधीतील 19 वा हप्ता पंतप्रधान नरेंद्र मोदी यांच्या हस्ते सोमवारी (दि. 24) दुपारी दोन ते साडे तीन वाजण्याच्या सुमारास बिहारमधील भागलपूर या ठिकाणी असलेल्या समारंभात वितरित होणार आहे. त्यातून राज्यातील 92.89 लाख शेतकरी कुटुंबांना सुमारे 1 हजार 967 कोटी रुपयांहून अधिक रकमेचा लाभ मिळणार असल्याची माहिती कृषी विभागातून देण्यात आलेली आहे.
बिहारमध्ये पार पडणाऱ्या या कार्यक्रमासाठी महाराष्ट्र राज्याचे मुख्यमंत्री देवेंद्र फडणवीस व कृषिमंत्री माणिकराव कोकाटे हे नागपूर येथून सहभागी होणार आहेत. राज्यामध्ये सर्वदूर कृषी विभाग, महसूल व वने विभाग, ग्राम विकास विभाग तसेच कृषी विज्ञान केंद्र, शेतकरी उत्पादन संघटनांच्या संयुक्त विद्यमाने हा कार्यक्रम यावेळी साजरा करण्यात येणार असल्याची माहिती आहे. बिहार राज्यात होणाऱ्या या कार्यक्रमाचं थेट प्रक्षेपण केंद्र सरकारच्या https://pmindiaweb-cast.nic.in या लिंकवरून पाहता येणार आहे. या लिंकचा वापर करून राज्यातील जास्तीत जास्त शेतकऱ्यांनी सहभागी होण्याचे आवाहन कृषी विभागाकडून करण्यात आलं आहे.
पीएम किसानचे 2000 रुपये खात्यात येण्यासाठी काय करावं?
ई केवायसी करा – पीएम किसान सन्मान निधी योजनेतील 2000 रुपये शेतकऱ्यांच्या खात्यात विना अडथळा जमा व्हायचे असल्यास ई केवायसी करणे आवश्यक आहे.अॅग्रीस्टॅक नोंदणी करा – शेतकऱ्यांना अॅग्रीस्टॅक अंतर्गत शेतकरी नोंदणी करणे आवश्यक आहे.फार्मर आयडी मिळवा – अॅग्रीस्टॅक नोंदणी केल्यानंतर शेतकऱ्यांना फार्मर आयडी मिळेल.जमीन पडताळणी करा – पीएम किसान सन्मान निधी योजनेतील लाभार्थी शेतकऱ्यांच्या नावावर जमीन असणे आवश्यक आहे. त्यासाठी जमीन पडताळणी करणे आवश्यक आहे.बँक खाते डीबीटी सुरु करा – शेतकऱ्यांचं बँक खाते डीबीटी (डायरेक्ट बेनिफिट ट्रांसफर) पर्याय सुरु असलेले असावे.18 वा हप्ता – पीएम किसान सन्मान निधी योजनेचा 18 वा हप्ता ऑक्टोबर 2024 मध्ये पात्र शेतकऱ्यांच्या खात्यात वर्ग करण्यात आला.ई केवायसी कसं करा – ई केवायसी फोनवरून किंवा सीएससी केंद्रावरून पूर्ण केली जाऊ शकते.