Mhada : मोतीलाल नगर पुनर्विकासात रहिवाशांचे हित केंद्रस्थानी,म्हाडाच्या सी अँड डीए मॉडेलद्वारे 143 एकरांचा कायापालट, म्हाडाला मिळणार 7 हजार घरे : मिलिंद बोरीकर
Mhada : मोतीलाल नगर पुनर्विकासात रहिवाशांचे हित केंद्रस्थानी असून म्हाडाच्या सी अँड डीए मॉडेलद्वारे 143 एकरांचा कायापालट केला जाणार असल्याचं म्हाडाचे सीओ मिलिंद बोरीकर यांनी म्हटलं.
मुंबई : गोरेगाव पश्चिम येथील बहुचर्चित मोतीलाल नगर पुनर्विकास प्रकल्पात रहिवाशांचे हित केंद्रस्थानी ठेवून पुनर्विकास केला जात आहे. सुमारे १४३ एकर क्षेत्रावर विस्तारलेल्या या प्रकल्पासाठी म्हाडाने सी अँड डीए (कन्स्ट्रक्शन व डेव्हलपमेंट एजन्सी) मॉडेल स्वीकारले असून, या माध्यमातून रहिवाशांचे हक्क, आधुनिक सुविधा आणि नियोजनबद्ध पुनर्विकास यांचा समतोल साधण्यात येत असल्याचे प्रतिपादन म्हाडाच्या मुंबई मंडळाचे मुख्य अधिकारी (सीओ) मिलिंद बोरीकर यांनी केले.
एबीपी माझाच्या वतीने आयटीसी परळ येथे आयोजित ‘माझा इन्फ्रा व्हिजन’ कार्यक्रमात गृहनिर्माण विषयावरील सत्रात मिलिंद बोरीकर बोलत होते. म्हाडाच्या महत्वाकांक्षी सी अँड डीए मॉडेल अंतर्गत मोतीलाल नगर पुनर्विकास हा पहिलाच प्रकल्प असल्याचे त्यांनी सांगितले.
मोतीलाल नगरमध्ये सध्या सुमारे ३७०० घरे आणि आस्थापना आहेत. त्यामध्ये सुमारे ३४०० निवासी आणि ३०० व्यावसायिकांचा समावेश आहे. पुनर्विकास करताना विद्यमान रहिवाशांना त्यांच्या हक्कानुसार योग्य क्षेत्रफळ मिळणे हा म्हाडाचा प्रमुख उद्देश असल्याचे बोरीकर यांनी सांगितले.
रहिवाशांना १६०० चौ. फूट क्षेत्राची घरे, म्हाडालाही मोठा गृहसाठा मिळणार
शासन निर्णयानुसार मोतीलाल नगरमधील पात्र रहिवाशांना १६०० चौरस फूट कार्पेट (चटई) क्षेत्राची घरे तर व्यावसायिक आस्थापनांना ९८७ चौरस फूट कार्पेट क्षेत्राचे गाळे मिळणार आहेत. तसेच, या पुनर्विकासातून म्हाडाला सुमारे ६५०० ते ७००० घरे उपलब्ध होणार असल्याचे बोरीकर यांनी सांगितले. ही घरे म्हाडाच्या माध्यमातून लॉटरीद्वारे विक्रीसाठी उपलब्ध करून दिली जाऊ शकतात. त्यामुळे पुनर्विकासातून विद्यमान रहिवाशांचे पुनर्वसन करण्याबरोबरच सर्वसामान्य नागरिकांसाठीही मोठ्या संख्येने परवडणारी घरे उपलब्ध होण्याचा मार्ग मोकळा होणार आहे.
प्रकल्पाचे एकूण बांधकाम क्षेत्र सुमारे ३० लाख चौरस मीटर इतके असून यापैकी सुमारे ६ ते ६.५ लाख चौरस मीटर क्षेत्र पुनर्विकासासाठी, तर सुमारे ४ लाख चौरस मीटर बांधकाम म्हाडासाठी उपलब्ध होणार आहे. उर्वरित भाग विकासकाच्या विक्री घटकासाठी असेल, असेही बोरीकर यांनी सांगितले.
म्हाडाची भूमिका नेमकी काय?
सी अँड डीए मॉडेलमध्ये म्हाडाची प्रमुख भूमिका जमीन मालकाची असली तरी प्रकल्पाचे नियोजन आणि देखरेखही म्हाडाच्याच नियंत्रणाखाली केली जाणार असल्याचे बोरीकर यांनी स्पष्ट केले. डीसीपआर नुसार रहिवाशांना त्यांच्या हक्काचे योग्य क्षेत्र उपलब्ध करून देणे आणि संपूर्ण पुनर्विकास नियोजनबद्ध पद्धतीने होईल याची काळजी घेणे, हा म्हाडाच्या भूमिकेचा महत्त्वाचा भाग असल्याचे ते म्हणाले.
तसेच, त्यामुळे विकासकाला केवळ प्रकल्प उभारणीची जबाबदारी देऊन म्हाडा बाजूला होणार नसून, संपूर्ण प्रकल्पाचे नियोजन आणि देखरेख म्हाडाकडून केली जाणार असल्याचे बोरीकर यांनी सांगितले.
केवळ घरे नाही तर अनेक आधुनिक सुविधा, रहिवाशांचे जीवनमान उंचावणार!
मोतीलाल नगरचा पुनर्विकास केवळ जुन्या इमारतींच्या जागी नवीन इमारती उभारण्यापुरता मर्यादित राहणार नसून परिसरातील सामायिक सुविधा, मोकळ्या व हरित जागा आणि विविध वयोगटांसाठीच्या सुविधांचेही आधुनिकीकरण करण्यात येणार आहे.
लहान मुले, युवक, महिला तसेच ज्येष्ठ नागरिक यांच्या गरजा लक्षात घेऊन आधुनिक आणि नियोजनबद्ध सुविधा उपलब्ध करून देण्यावर भर असेल. त्यामुळे पुनर्विकासानंतर मोतीलाल नगरचा परिसर अधिक नियोजनबद्ध आणि नागरिकांसाठी सुविधायुक्त करण्यात येणार आहे. यामुळे येथील रहिवाशांचे जीवनमान उंचावण्याकरीता म्हाडा काम करत असल्याचे मिलिंद बोरीकर म्हणाले.
‘नागरिककेंद्रित पुनर्विकास’ हे म्हाडाचे उद्दिष्ट
मोतीलाल नगर प्रकल्पातून स्थानिक रहिवाशांचे हक्क, आधुनिक सुविधा, नियोजनबद्ध विकास व म्हाडासाठी मोठ्या प्रमाणात घरे, असा समतोल साधण्यात येत आहे. नागरिकांचे हित जपून पुनर्विकास करणे हेच म्हाडाचे प्रमुख उद्दिष्ट असल्याचे मिलिंद बोरीकर यांनी स्पष्ट केले.
माझा इन्फ्रा व्हिजन
महत्त्वाच्या बातम्या
