JIO IPO :जिओ प्लॅटफॉर्म्स लिमिटेड आयपीओद्वारे 27 कोटी शेअर जारी करणार, जिओचा IPO 'या' तारखेला खुला होणार
JIO IPO : रिलायन्स उद्योग समुहाच्या मालकीच्या जिओ प्लॅटफॉर्म्स लिमिटेडचा आयपीओ लवकरच बोली लावण्यासाठी खुला होईल. आयपीएच्या माध्यमातून कंपनी 27 कोटी शेअर जारी करेल.

नवी दिल्ली : मुकेश अंबानी यांच्या मालकीच्या रिलायन्स इंडस्ट्रीजची टेलिकॉम क्षेत्रातील कंपनी जिओ प्लॅटफॉर्म्स लिमिटेडटच्या आयपीओचा किंमतपट्टा जाहीर झाला आहे. कंपनीनं आयपीएच्या लॉटमधील एका शेअरसाठी किंमत 1065 ते 1119 रुपये निश्चित केला आहे. या आयपीओच्या माध्यमातून जिओचे 27 कोटी शेअर जारी केले जाणार आहेत. उच्च किंमतपट्टा ग्राह्य धरल्यास जिओचा आयपीओ 30213 कोटी रुपयांचा असेल. हा भारतातील सर्वात मोठा आयपीओ ठरु शकतो.
जिओ प्लॅटफॉर्म्स लिमिटेड नव्यानं 27 कोटी शेअर जारी करणार आहे. एका शेअरचं दर्शनी मूल्य 10 रुपये निश्चित करण्यात आलं आहे. आयपीओ सबस्क्राइब करण्यासाठी 21 ऑक्टोबरपासून खुला असेल तर सबस्क्रीप्शन 23 ऑक्टोबरला बंद होईल. अँकर इन्वेस्टर्स 19 ऑक्टोबरपासून बोली लावू शकतात.
जिओ प्लॅटफॉर्म्सच्या आयपीओ कमिटीनं बुधवारी झालेल्या बैठकीत किंमतपट्टा निश्चित करण्यास मंजुरी दिली आहे. जिओ प्लॅटफॉर्म्सच्या कर्मचाऱ्यांना प्रतिशेअर 54 रुपये सूट दिली आहे. जिओच्या कर्मचाऱ्यांसाठी 500 कोटींचे शेअर राखीव असतील. तर,रिलायन्स इंडस्ट्रीजच्या कर्मचाऱ्यांसाठी 2500 कोटींचे शेअर राखीव असतील.
भारतात आतापर्यंत सर्वात मोठा आयपीओ ह्युंदाई मोटर्सचा आहे. ह्युंदाईचा आयपीओ 27859 कोटी रुपयांचा होता. तो आयपीओ 2024 मध्ये आला होता. तर, एलआयसीचा आयपीओ 20557.23 कोटी रुपयांचा होता. आता जिओचा आयपीओ भारतातील सर्वात मोठा आयपीओ ठरु शकतो. आयपीओचं लिस्टींग कसं आणि कधी होणार याकडे सर्वांचं लक्ष लागलं आहे.
विशेष बाब म्हणजे ह्युंदाई मोटर्स इंडिया आमि एलआयसीचे आयपीओ ऑफर फॉर सेलचे होते. जिओ प्लॅटफॉर्म्स लिमिटेडचा आयपीओ नव्यानं शेअर जारी करणार आहे. यामुळं आयपीओतून उभी राहणारी रक्कम थेट कंपनीकडे जाईल, ती शेअरधारकांकडे जाणार नाही.
जिओ प्लॅटफॉर्म्सच्या आयपीओच्या एका लॉटमध्ये 12 शेअर असतील. उच्च किंमतपट्ट्यानुसार एका लॉटसाठी 13428 रुपयांची बोली लावावी लागेल. हा आयपीओ 28 ऑक्टोबरला लिस्ट होण्याची शक्यता आहे.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
महत्त्वाच्या बातम्या























