मुंबई : केंद्र सरकारच्या वित्त मंत्रालयानं तंबाखू, सिगारेट आणि बीडीवरील जीएसटी 1 फेब्रुवारीपासून 40 टक्क्यांच्या दरानं आकारण्याचा निर्णय घेतला आहे. याशिवाय त्यावरील उत्पादन शुल्क, आरोग्य सेस वाढवण्याचा निर्णय घेतला आहे. यामुळं सिगारेट, तंबाखू आणि बीडीच्या दरात 15 टक्के वाढ होण्याची शक्यता आहे. केंद्राच्या या निर्णयाची अपडेट येताच भारतातील सर्वात मोठी सिगारेट कंपनी असलेल्या आयटीसीच्या शेअर मध्ये मोठी घसरण झाली आहे. आयटीसीच्या स्टॉकमध्ये सहा वर्षातील सर्वात मोठी घसरण झाली आहे. आयटीसीचा स्टॉक 10 टक्क्यांनी घसरल्यानं कंपनीचं बाजारमूल्य 50 हजार कोटींनी घटलं. याचा फटका एलआयसी आणि इतर म्युच्युअल फंडला बसला आहे.
ITC ला मोठा फटका
आयटीसी कंपनीचा शेअर 9.71 टक्क्यांनी घसरला. आयटीसीचा शेअर आज 39.15 रुपयांनी घसरण होत 363.85 रुपयांवर पोहोचला आहे. आयटीसीच्या शेअरनं वर्षभरतील निच्चांक गाठला आहे. आयटीसीचा शेअर 402.70 रुपयांवरुन घसरुन 362.70 रुपयांवर पोहोचला आहे.
जुलै ते सप्टेंबर 2025 तिमाहीच्या अखेरपर्यंत 100 टक्के भागीदारी पब्लिक शेअर होल्डर्सकडे होती. कंपनीत प्रमोटर नाही किंवा प्रमोटर ग्रुप नाही. पब्लिक शेअर होल्डर्समध्ये म्युच्युअल फंडचा वाटा अधिक आहे.
आयटीसीमध्ये 46 म्युच्युअल फंडांची भागीदारी 14.30 टक्के राहिली आहे. यामध्ये सर्वाधिक भागीदारी एसबीआय म्युच्युअल फंडकडे 3.26 टक्के आहे. यानंतर आयसीआयसीआय प्रडेन्शिअल म्युच्युअल फंडची भागीदारी 2.28 टक्के भागीदारी आहे. याशिवाय निप्पॉन लाईफ इंडिया, यूटीआय, पराग पारेख फ्लेक्सी कॅप, मिराई असेटसची देखील भागीदारी आयटीसीमध्ये आहे.
एलआयसीची आयटीसी कंपनीतील भागीदारी 15.86 टक्के होती. जनरल इन्शुरन्स कॉर्पोरेशन्स ऑफ इंडियाकडे 1.73 टक्के भागीदारी होती. न्यू इंडिया अॅशूरन्स कंपनीकडे 1.4 टक्के भागीदारी होती.
आयटीसीच्या शेअरमध्ये गेल्या पाच दिवसात 10 टक्के घसरण झालीय. तर, गेल्या सहा महिन्यात 12 टक्के घसरण झाली आहे. कंपनीचं बाजारमूल्य 4.59 लाख कोटी आहे.
गॉडफ्रे फिलिप्स इंडियाच्या स्टॉकमध्ये घसरण
मार्लबोरो सिगारेटची विक्री करणाऱ्या गॉडफ्रे फिलिप्स इंडियाच्या शेअरमध्ये देखील घसरण झाली. गॉड फ्रे फिलिप्सच्या स्टॉकमध्ये 17 टक्क्यांची घसरण झाली. गॉडफ्रे फिलिप्सचा स्टॉक 471.80 रुपयांनी घसरुण 2290.50 रुपयांवर आला आहे.
केंद्रीय वित्त मंत्रालयानं 1 फेब्रुवारीपासून सिगारेटच्या लांबीच्या आधारावर 1000 सिगारेट स्टिक्सवर 2050 ते 8500 रुपयांपर्यंत उत्पादन शुल्क लावण्याचा निर्णय घेतला आहे. हा कर 40 टक्के जीएसटीवर लावला आहे.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)