Zomato: तर आता ₹5 ते ₹20 अधिक द्यावे लागणार! झोमॅटोवरून जेवण ऑर्डर करणं महागलं
झोमॅटोने आकारलेले हे नवीन 'पे ऑन डिलिव्हरी फी' हे कंपनीचे प्लॅटफॉर्म शुल्क, रेस्टॉरंट पॅकेजिंग शुल्क, डिलिव्हरी शुल्क आणि GST यांपासून वेगळे आहे.
Zomato Cash on Delivery Charges: झोमॅटो या फूड डिलिव्हरी प्लॅटफॉर्मवरून जेवण मागवणे आता अधिक महाग झाले आहे. झोमॅटोवरून जेवण मागवताना तुम्ही 'कॅश ऑन डिलिव्हरी' हा पर्याय निवडल्यास, तुम्हाला ₹5 अधिक द्यावे लागतील. हे नवीन शुल्क ॲपच्या बिल सारांशामध्ये 'पे ऑन डिलिव्हरी फी' म्हणून जोडले जाईल. काही युझर्ससाठी हेच शुल्क ₹7 ते ₹20 पर्यंत वेगवेगळ्या रकमेत दिसत आहे. मात्र, जे युझर्स UPI, क्रेडिट/डेबिट कार्ड किंवा नेट बँकिंगसारख्या डिजिटल माध्यमांद्वारे ऑनलाइन पेमेंट करतात, त्यांना हे अतिरिक्त शुल्क आकारले जाणार नाही.
प्लॅटफॉर्म शुल्क आणि पॅकिंग शुल्कामध्ये नवीन शुल्क जोडले
झोमॅटोने आकारलेले हे नवीन 'पे ऑन डिलिव्हरी फी' हे कंपनीचे प्लॅटफॉर्म शुल्क, रेस्टॉरंट पॅकेजिंग शुल्क, डिलिव्हरी शुल्क आणि GST यांपासून वेगळे आहे. याचा अर्थ असा की, आता जेवणाव्यतिरिक्त पॅकेजिंग, डिलिव्हरी, प्लॅटफॉर्म आणि रोख पेमेंटसाठी स्वतंत्रपणे पैसे द्यावे लागतील. मात्र, स्विगीने अद्याप असे कोणतेही शुल्क लागू केलेले नाही. एका लहान शुल्कामुळे कंपनीला कोट्यवधी रुपयांचा नफा मिळू शकतो. झोमॅटो दररोज अंदाजे 23 ते 25 लाख ऑर्डर्सवर प्रक्रिया करते. केवळ 5 रुपयांच्या लहान अतिरिक्त शुल्कातूनही दररोज 1.25 कोटी रुपयांपर्यंतचा महसूल मिळू शकतो.जरी सर्व ग्राहक कॅश ऑन डिलिव्हरीचा पर्याय निवडणार नसले, तरी या निर्णयामुळे झोमॅटोच्या नफ्यात दरवर्षी शेकडो कोटी रुपयांची वाढ होईल.
2 रुपयांवरून प्लॅटफॉर्म शुल्क आता 14.99 रुपयांपर्यंत वाढले
फूड डिलिव्हरी प्लॅटफॉर्म्सनी ऑर्डर्सवर विविध शुल्क लावणे ही काही नवीन गोष्ट नाही. एप्रिल 2023 मध्ये, झोमॅटो आणि स्विगीने केवळ 2 रुपयांच्या प्लॅटफॉर्म शुल्काने सुरुवात केली होती, जे आता प्रति ऑर्डर 14.99 रुपये (अधिक 18 टक्के जीएसटी) झाले आहे. 2 ते 15 रुपयांपर्यंतचे हे शुल्क जरी कमी वाटत असले, तरी ई-कॉमर्स आणि फूड डिलिव्हरी कंपन्या या लहान शुल्कांमधून दरवर्षी तब्बल 3,500 ते 4,000 कोटी रुपये कमावतात.
फूड डिलिव्हरी मार्केटमधील वाढती स्पर्धा
झोमॅटोचा हा निर्णय अशा वेळी आला आहे, जेव्हा देशातील क्विक-कॉमर्स आणि फूड-डिलिव्हरी क्षेत्रांमध्ये स्पर्धा तीव्र झाली आहे. रॅपिडोचे 'ओन्ली' प्लॅटफॉर्म आणि फ्लिपकार्टची नवीन 'ईट इन' सेवा या बाजारपेठेत प्रवेश करत आहेत. याशिवाय, स्विससारख्या नवीन स्टार्टअप्सनीही अलीकडेच नवीन निधी मिळवला आहे, ज्यामुळे झोमॅटो आणि स्विगीसारख्या प्रस्थापित कंपन्यांवर नफा वाढवण्याचा दबाव आणखी वाढला आहे.
इतर महत्वाच्या बातम्या
महत्त्वाच्या बातम्या
