ऑगस्ट महिन्याच्या सुरुवातीला सोने खरेदीदारांना मोठा झटका, पाच दिवसातच दरात सात हजारांची वाढ तर चांदीच्या दरात 14 हजारांची वाढ
Gold Silver Price : सोन्या चांदीची खऱेदी करणाऱ्यांना मोठा झटका बसला आहे. ऑगस्ट महिन्याच्या पहिल्या काही दिवसातच सोने आणि चांदीच्या दरात मोठी वाढ झाली आहे.
Gold Silver Price : ऑगस्ट महिन्याच्या पहिल्या काही दिवसांत सोने आणि चांदीच्या दरात मोठी वाढ झाली आहे. इंडियन बुलियन अँड ज्वेलर्स असोसिएशनच्या (IBJA) आकडेवारीनुसार, ऑगस्ट महिन्याच्या केवळ पाच दिवसांत सोन्याच्या दरात प्रति 10 ग्रॅम 7000 रुपयांची वाढ झाली. यामुळे सोन्याचा भाव प्रति 10 ग्रॅम 1 लाख 49 हजार 621 रुपयांच्या विक्रमी उच्चांकावर पोहोचला.
सोन्याप्रमाणेच चांदीच्या दरातही मोठी वाढ
चांदीच्या दरातही मोठी वाढ झाली. सोन्याप्रमाणेच चांदीच्या दरातही मोठी वाढ झाली. या पाच दिवसांत 99.9 टक्के शुद्ध चांदीचा भाव प्रति किलोग्रॅम 14000 रुपयांनी वाढून प्रति किलोग्रॅम 2 लाख 31 हजार 381 रुपयांच्या ऐतिहासिक उच्चांकावर पोहोचला आहे.
किमतींमध्ये ही ऐतिहासिक वाढ का झाली?
सोन्या-चांदीच्या किमतींमधील या वाढीमागे अनेक प्रमुख कारणे आहेत. सर्वात महत्त्वाचे म्हणजे, अमेरिका आणि इराण यांच्यातील युद्ध हे एक प्रमुख कारण आहे. मध्य-पूर्वेतील गंभीर संकटामुळे जागतिक बाजारपेठांमध्ये अनिश्चितता निर्माण झाली आहे. परिणामी, गुंतवणूकदार शेअर बाजारासारख्या जोखमीच्या पर्यायांमधून निधी काढून घेत आहेत आणि सोन्यामध्ये गुंतवणूक करत आहेत, ज्याला एक सुरक्षित गुंतवणूक मानले जाते. यामुळे सोन्याची मागणी वाढत आहे, ज्यामुळे किमती वाढत आहेत. अमेरिकन फेडरल रिझर्व्हची धोरणे देखील मौल्यवान धातूंमधील या प्रचंड वाढीसाठी जबाबदार आहेत. अमेरिकेतील रोजगार आणि महागाईच्या आकडेवारीमुळे अमेरिकेची मध्यवर्ती बँक, अमेरिकन फेडरल रिझर्व्हकडून आगामी काळात व्याजदरात कपात होण्याची शक्यता वाढली आहे. सामान्यतः, जेव्हा व्याजदर कमी होतात, तेव्हा सोन्याची मागणी वाढते आणि किमती झपाट्याने वाढतात. जेव्हा व्याजदर कमी होतात, तेव्हा बँक एफडी आणि सरकारी रोख्यांवरील परतावा कमी होतो, त्यामुळे गुंतवणूकदार अधिक नफ्यासाठी सोन्यामधील गुंतवणूक वाढवतात.
सोने खरेदी करताना काय काळजी घ्याल?
सोनं खरेदी करताना, सर्वात आधी त्यावर BIS हॉलमार्क आणि 6-अंकी HUID कोड असल्याची खात्री करा. तसेच, सोन्याची शुद्धता (कॅरेट) तपासा. सोने नेहमी वैध GST बिलासह खरेदी करा आणि 'मेकिंग चार्जेस' आणि इतर कोणत्याही छुप्या खर्चाबद्दल विचारणा करायला विसरू नका.
चांदी खरेदी करताना काय काळजी घ्याल?
चांदीचे दागिने खरेदी करतानाही त्याची शुद्धता तपासून पाहणं आवश्यक आहे. सोन्याप्रमाणेच चांदीचं मूल्यही तिच्या शुद्धतेवर अवलंबून असते. चांदी खरेदी करताना नेहमी अधिकृत बिल घ्या आणि त्यावर 'हॉलमार्क' असल्याची खात्री करा. तसेच, हे लक्षात ठेवा की, चांदीवरही घडणावळ आकारली जाते, त्यामुळे या बाबीची पूर्ण माहिती करून घेणं गरजेचं आहे.
महत्त्वाच्या बातम्या
