Meesho Income Tax: ई-कॉमर्स कंपनी Meesho ला आयकर विभागाने धाडली तब्बल 1500 कोटींची नोटीस; नेमकं कारण काय?
Meesho Income Tax: ई-कॉमर्स क्षेत्रातील प्रमुख मार्केटप्लेसपैकी एक असलेल्या मीशो कंपनीला आयकर विभागाकडून मोठा धक्का बसला आहे.
Meesho Income Tax: ई-कॉमर्स क्षेत्रातील प्रमुख मार्केटप्लेसपैकी एक असलेल्या मीशो कंपनीला आयकर विभागाकडून मोठा धक्का बसला आहे. आर्थिक वर्ष 2023-24 च्या कर निर्धारणासाठी आयकर विभागाने कंपनीला सुमारे 1500 कोटी रुपयांची कर मागणी नोटीस पाठवली आहे. या नोटीसमध्ये व्याजासह एकूण 1499.73 कोटी रुपयांची रक्कम भरण्याची मागणी करण्यात आली आहे. कंपनीने ही माहिती सार्वजनिक करत या नोटीशीला कायदेशीररित्या आव्हान देण्याची भूमिका घेतली आहे.
Meesho Income Tax: नोटीस पाठवण्यामागचे कारण काय?
आयकर विभागाच्या मते, कंपनीने आपल्या उत्पन्नाचे कमी प्रकटीकरण केले आहे. त्यामुळे कर निर्धारण प्रक्रियेदरम्यान काही अतिरिक्त समायोजने करण्यात आली आहेत. यामध्ये थकबाकी करावर आकारण्यात आलेले व्याजही समाविष्ट आहे. ही डिमांड नोटीस आयकर कायद्याच्या कलम 143(3) आणि 156 अंतर्गत जारी करण्यात आली आहे. या कलमानुसार कर निर्धारणानंतर विभागाला अतिरिक्त कर मागणी करण्याचा अधिकार आहे.
Meesho Income Tax: कंपनीची भूमिका काय?
मीशोने ही माहिती स्टॉक एक्सचेंजला दिलेल्या नियामक फाइलिंगमधून जाहीर केली आहे. कंपनीने सांगितले की, आयकर विभागाच्या आदेशाचा सध्या सविस्तर आढावा घेतला जात आहे. सध्याच्या घडीला या नोटीशीमुळे कंपनीच्या आर्थिक कामगिरीवर मोठा नकारात्मक परिणाम होणार नाही, असेही कंपनीने स्पष्ट केले आहे.
कंपनीच्या म्हणण्यानुसार, आयकर विभागाने घोषित उत्पन्नामध्ये काही अतिरिक्त समायोजने केली आहेत. मात्र या निष्कर्षांशी कंपनी सहमत नसून नोटीसमधील निरीक्षणांवर आक्षेप घेण्याची तयारी सुरू आहे. या प्रकरणात कंपनीकडे मजबूत कायदेशीर आधार आहेत आणि स्वतःच्या हिताचे संरक्षण करण्यासाठी आवश्यक ती सर्व पावले उचलली जातील, असे म्हटले आहे.
Meesho Income Tax: ई-कॉमर्स क्षेत्रात कर वाद का होतात?
सामान्यतः ई-कॉमर्स कंपन्यांमध्ये करासंदर्भातील वाद निर्माण होण्यामागे ग्राहकांना दिल्या जाणाऱ्या सवलती आणि प्रोत्साहन योजना कारणीभूत ठरतात. अनेक कंपन्या या सवलतींना व्यापारिक खर्च म्हणून दाखवतात, त्यामुळे करपात्र नफा कमी होतो. मात्र काही प्रकरणांमध्ये आयकर विभाग या खर्चांना पूर्णपणे वजावटीस पात्र मानत नाही, त्यामुळे करासंदर्भात वाद निर्माण होतात.
Meesho Income Tax: मीशो कंपनीबद्दल माहिती
मीशोची स्थापना 2015 मध्ये आयआयटी पदवीधर विदित अत्रे आणि संजीव बरनवाल यांनी केली. बंगळुरूस्थित ही कंपनी प्रामुख्याने लहान विक्रेते आणि सोशल कॉमर्स मॉडेलवर आधारित ई-कॉमर्स मार्केटप्लेस म्हणून ओळखली जाते. मीशो विशेषतः टियर-2 आणि लहान शहरांमधील ग्राहकांवर लक्ष केंद्रित करते. कमी किमतीतील उत्पादने आणि लहान व्यापाऱ्यांना ऑनलाइन बाजारपेठ उपलब्ध करून देण्यामुळे कंपनीने अल्पावधीतच मोठी वाढ नोंदवली आहे. दरम्यान, आयकर विभागाच्या या नोटीशीवर कंपनी कायदेशीर पातळीवर कसा प्रतिसाद देते आणि पुढील कारवाई काय होते, याकडे उद्योग क्षेत्राचे लक्ष लागले आहे.
आणखी वाचा
महत्त्वाच्या बातम्या
