Prostate Cancer Awareness Month: महिलांच्या आरोग्याबद्दल अनेकदा चर्चा होते, किंवा आजकाल महिला आपल्या आरोग्याबद्दल डॉक्टरांना न लाज बाळगता सांगतात. परंतु पुरूषांच्या बाबतीत बोलायला गेलं तर पुरूषांच्या आरोग्याबद्दल सहसा बोलणं टाळलं जातं. पुरुष सहसा त्यांच्या प्रोस्टेट आरोग्याबद्दल बोलताना लाजतात किंवा अस्वस्थ होतात. अनेक पुरुष याबद्दल बोलणे टाळतात आणि शांतपणे त्रास सहन करतात. पुणे येथील रोबोटिक आणि रिकन्स्ट्रक्शन स्पेशालिस्ट युरोसर्जन अपोलो स्पेक्ट्रा हॉस्पिटलचे युरोलॉजिस्ट डॉ. संजय धनगर यांनी महत्त्वाची माहिती दिलीय. जाणून घ्या..
पुरुषांनो, तुमच्या आरोग्याबद्दल बोलणं लाजिरवाणं नाही! प्रोस्टेट कॅन्सरविषयी जाणून घ्या
गैरसमज, लाज, जागरूकतेचा अभाव आणि मूत्रविषयक किंवा लैंगिक समस्यांबद्दल चर्चा करण्यास असलेली संकोच यामुळे प्रोस्टेट कॅन्सरच निदान उशिरा होतं. वेळीच आजाराचे निदान झाल्यास अनेकांचे जीव वाचू शकतात.
प्रोस्टेट म्हणजे काय?
तज्ज्ञांच्या मते, प्रोस्टेट ही पुरुषांच्या शरीरातील मूत्राशयाच्या खाली असलेली एक लहान ग्रंथी आहे. ही ग्रंथी वीर्यातील द्रव तयार करते, जो प्रजननासाठी महत्त्वाचा असतो. प्रोस्टेट कॅन्सर म्हणजे या ग्रंथीतील पेशी अनियंत्रितपणे वाढू लागतात तेव्हा होणारा आजार. हा कॅन्सर प्रामुख्याने 50 वर्षांपेक्षा जास्त वयाच्या पुरुषांमध्ये आढळतो, पण आता ३५ ते ४५ वर्षांच्या पुरुषांमध्येही दिसू लागला आहे. या आजाराचे नेमके कारण माहीत नाही, पण वय वाढणे, कुटुंबात अशा आजाराचा इतिहास असणे, वजन जास्त असणे आणि जास्त तेलकट-चरबीयुक्त अन्न खाणे यामुळे धोका वाढतो. हार्मोन्समधील बदल किंवा प्रोस्टेटला होणारी दीर्घकालीन सूज देखील यासाठी कारणीभूत ठरू शकते.
लक्षणे
वारंवार लघवी लागणे, विशेषतः रात्रीलघवीचा प्रवाह कमी होणेलघवी सुरू किंवा थांबवताना त्रास होणेवीर्य स्खलनाच्या वेळी वेदना होणेलघवी किंवा वीर्यात रक्त दिसणेपाठ किंवा श्रोणी (कमरेखालील भाग) मध्ये सतत दुखणे
पुरुष याबद्दल बोलणे का टाळतात?
भारतात अनेक पुरुष प्रोस्टेट किंवा लैंगिक आरोग्याविषयी बोलायला लाजतात.यामागे दोन मोठी कारणं आहेत. लाज आणि माहितीचा अभाव हे आहे. अनेक पुरुषांना वाटतं की लघवीच्या समस्या वयानं येतात, त्यामुळे ते त्याकडे दुर्लक्ष करतात. काहींना या विषयावर बोलताना अस्वस्थ वाटतं, तर काहींना वाटतं की लोक काय म्हणतील. या भीतीमुळे आणि गप्प राहण्यामुळे आजाराचे वेळीच निदान होत नाही. त्यामुळे उपचार कठीण होतात आणि जीवाला धोका वाढतो.
निदान
डॉक्टर सहसा PSA रक्त तपासणी आणि डिजिटल रेक्टल तपासणी करण्याचा सल्ला देतात. या दोन्ही सोप्या आणि वेदनारहित चाचण्या आहेत. या तपासण्यांमुळे प्रोस्टेट कॅन्सर लवकर ओळखता येतो, आणि वेळेवर उपचार केल्यास रुग्णाचं आयुष्य वाढू शकतं. म्हणून 50 वर्षांनंतर या तपासण्या नियमितपणे करणे महत्त्वाचे आहे. जर कॅन्सरचे निदान झाले, तर डॉक्टर रुग्णाच्या अवस्थेनुसार योग्य उपचार योजना ठरवतात.
प्रोस्टेट आरोग्याबद्दल बिनधास्त बोला..
या कॅन्सरचे व्यवस्थापन हे त्याच्या टप्प्यानुसार केले जाते आणि त्यात शस्त्रक्रिया, किरणोत्सार उपचार, हार्मोन थेरपी किंवा औषधोपचारांचा समावेश असू शकतो. फळे, भाज्या आणि ओमेगा-3 फॅटी अॅसिडयुक्त संतुलित आहार, प्रक्रिया केलेल्या अन्नाचा त्याग, नियमित व्यायाम आणि धूम्रपान टाळणे या उपायांनी या कॅन्सरपासून बचाव करता येतो. आता वेळ आली आहे की पुरुषांनी त्यांच्या प्रोस्टेट आरोग्याबद्दल खुल्या मनाने बोलले पाहिजे. जेणेकरून आजाराचे वेळीच निदान होऊ शकेल.
हेही वाचा
Astrology: 18 नोव्हेंबर तारीख 4 राशींचं नशीब पालटणारी! ग्रहांचे शुभ संकेत, पैसा, नोकरी, घर.. कोणत्या राशी होणार मालामाल?
(टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही.)