Holi 2026 : धुलिवंदनाच्या दिवशी चंद्रग्रहणाचं सावट? ग्रहणकाळात धुळवड खेळताना 'ही' घ्या काळजी, पंचांगकर्ते मोहन दाते सांगतात...

Holi 2026 : चंद्रग्रहणाचा सूतक काळ भारतात देखील असणार आहे. त्यामुळे भारतात होळी, तसेच, धुळवड नेमकी कधी साजरी करायची या संदर्भात पंचांगकर्ते मोहन दाते यांनी महत्त्वाची माहिती दिली आहे

Holi 2026

Source : ABP WEB TEAM

Holi 2026 : हिंदू धर्मशास्त्रानुसार, येत्या 2 तारखेला होळी (Holi 2026) असणार आहे. तर, 3 तारखेला धुळवड म्हणजेच धूलिवंदन असणार आहे. मात्र, यंदा 3 तारखेला चंद्रग्रहण देखील लागणार आहे. त्यामुळे धुलिंवदनाच्या दिवशी होळी साजरी करावी का? चंद्रग्रहणाचा सूतक काळ भारतात देखील असणार आहे. त्यामुळे भारतात होळी, तसेच, धुळवड नेमकी कधी साजरी करायची या संदर्भात पंचांगकर्ते मोहन दाते यांनी महत्त्वाची माहिती दिली आहे ती जाणून घेऊयात. 

होलिका दहन कधी करावे?

पंचांगकर्ते मोहन दाते म्हणतात, यावर्षी 2 मार्च 2026 रोजी सोमवारी भद्रा असताना प्रदोष काळात  होलिका दहन करावे. दुसऱ्या दिवशी म्हणजेच 3 मार्च 2026 रोजी ग्रस्तोदित चंद्रग्रहण असून मंगळवारी सूर्योदयापासून वेधकाळ सुरु होणार आहे. वेधकाळात पौर्णिमेचा कुळधर्म, पूजा-अर्चा, अभिषेक करता येईल. देवाला नैवेद्य दाखविता येईल. वेधामध्ये पूजन निषेध नाही. आपणास भोजन निषेध असल्याने नैवेद्य अगदी थोडा करावा. आपण प्रसाद म्हणून अभिषेकाचे तीर्थ घेऊ शकता किंवा एक घास अन्नाचा फक्त वास घेऊ शकता. वृद्ध, अशक्त, आजारी, गर्भवती यांना सकाळी 11 पर्यंत अन्नपदार्थ खाता येतील. गुरुजी किंवा सुवासिनी यांना कोरडा शिधा आणि दक्षिणा देऊन कुळधर्म करता येईल. 

ग्रहणाच्या काळात धुळवड करावी का? 

ग्रहण काळात श्राद्ध देखील सपिंडक करता येईल. त्यावेळेस देखील श्राद्धाचा स्वयंपाक नैवेद्यापुरता करून नंतर तो गाईला द्यावा. ब्राह्मणास शिधा आणि दक्षिणा देणे. अशा प्रकारची कर्मे करता येत असल्याने वेधकाळात धूलिवंदन (धुळवड), रंग खेळणे हे देखील करता येईल. आपल्या गावाच्या सूर्यास्तापासून 18:48 पर्यंत ग्रहणाचा पर्वकाल आहे. काही ठिकाणी अगदी थोडावेळ पर्वकाल असल्याने त्यांनी 18:48 नंतर फक्त मोक्षस्नान करावे. ज्यांना 15-20 मिनिटांपेक्षा अधिक पर्वकाळ मिळत आहे त्यांना सूर्यास्तानंतर स्नान करून थोडावेळ जप करून 18:48 नंतर मोक्षस्नान करता येईल.

चंद्रग्रहणाचा कालावधी

वर्षातील पहिले पूर्ण चंद्रग्रहण फाल्गुन पौर्णिमेच्या शुभ प्रसंगी, धुलिवंदनच्या दिवशी होईल. हे चंद्रग्रहण 3 मार्च 2026 रोजी दुपारी 2:17 वाजता सुरू होईल आणि संध्याकाळी 7:53 वाजता संपेल, जे कुंभ राशीत होईल. यावेळी ग्रहांची स्थिती काही राशींसाठी लाभदायी ठरु शकते. 

त्यामुळे 3 मार्च 2026 रोजी जरी चंद्रग्रहण असले तरी तुम्ही धुळवड खेळू शकता असे पंचांगकर्ते मोहन दाते सांगतात. 

- मोहन दाते (दाते पंचांग)

(टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही.)

हे ही वाचा :