साखर आणि तेलानंतर आता कांद्याच्या दरात मोठी वाढ, पण शेतकऱ्यांना फायदा मिळतोय का? प्रति किलोसाठी किती दर?
गेल्या काही दिवसात साखर आणि तेलाच्या दरात मोठी वाढ झाल्याचं पाहायला मिळालं होतं. अशातच आता कांद्याच्या दरात (Onion Price) देखील मोठी वाढ झाली आहे.
Onion Price News : गेल्या काही दिवसात साखर आणि तेलाच्या दरात मोठी वाढ झाल्याचं पाहायला मिळालं होतं. अशातच आता कांद्याच्या दरात (Onion Price) देखील मोठी वाढ झाली आहे. कांद्याच्या दरात झालेली वाढ ही शेतकऱ्यांसाठी दिलासादायक आहे. मात्र, सध्या बहुतांश शेतकऱ्यांकडे कांदा शिल्लक नाही. मात्र, ज्या शेतकऱ्यांकडे सध्या कांदा आहे, त्या शेतकऱ्यांना मोठा पायदा होताना दिसत आहे. दुसऱ्या बाजूला कांद्याच्या दरात वाढ झाल्यामुळं ग्राहकांच्या खिशाला झळ लागत आहे. सध्या कांद्याचे दर हे 60 ते 70 रुपये किलोवर गेले आहेत.
देशात महागाई वाढत असल्याचं पाहायला मिळत आहे. तेल आणि साखरेच्या किमती सातत्याने वाढत आहेत. दरम्यान, कांद्याच्या किमतींतही वाढ झाली आहे. महाराष्ट्रात अलीकडे कांद्याच्या किमती झपाट्याने वाढत आहेत. सध्या महाराष्ट्रात कांद्याचा किरकोळ भाव 60 ते 70 रुपये प्रति किलोवर पोहोचला आहे. दरम्यान, या कांद्याच्या वाढत्या दराचा मोठा फायदा शेतकऱ्यांना होताना दिसत नाही. कारण अनेक शेतकऱ्यांकडे सध्या कांदा शिल्लक नाही. व्यापाऱ्यांनी मोठ्या प्रमाणात कांदा बाजारात आणल्याचे सांगितले जात आहे. ज्या शेत कऱ्यांकडे कांदा शिल्लक आहे, त्यांना फायदा होताना दिसत आहे.
मुंबईसह पुण्यातही कांदा महागला
मुंबईसह पुण्यातही कांद्याच्या दरात वाढ झाल्याचं चित्र पाहायला मिळत आहे. मुंबईत कांद्याचा भाव 60 ते 70 रुपये प्रति किलोवर पोहोचला असताना, पुण्यातही कांद्याचे किरकोळ भाव 60 ते 65 रुपये प्रति किलोपर्यंत वाढले आहेत. महाराष्ट्र कांद्याचे केंद्र म्हणून ओळखले जाते, त्यामुळे जर येथे कांद्याच्या किमती इतक्या वाढल्या, तर देशातील इतर राज्यांमध्येही किमती आणखी वाढण्याची शक्यता आहे.
कांद्याचे दर वाढण्याचं कारण काय?
कांद्याच्या भावात अचानक वाढ होण्याचे मुख्य कारण म्हणजे पुरवठा कमी होणे. नाशिक, अहिल्यानगर, पुणे आणि सोलापूर यांसारखे भाग कांद्याचे सर्वात मोठे उत्पादक आहेत. त्यामुळे, या भागांमधून पुरवठा कमी झाल्यामुळं भाव वाढत आहेत. नाशिकमधील लासलगाव कृषी उत्पन्न बाजार समिती (एपीएमसी) ही देशातील सर्वात मोठी बाजारपेठ आहे, जिथे चांगल्या प्रतीच्या कांद्याचा घाऊक भाव 55 रुपये प्रति किलोवर पोहोचला आहे, तर कमी प्रतीचा कांदा सुमारे 45 रुपये प्रति किलो दराने विकला जात आहे. याबाबत बोलताना लासलगाव एपीएमसीच्या एका सदस्याने सांगितले, की, गेल्या दोन वर्षांतील हा सर्वाधिक घाऊक भाव आहे. मध्य प्रदेश आणि कर्नाटकसारख्या शेजारील राज्यांमधून मोठ्या प्रमाणात कांदा येऊ लागल्यास भाव खाली येऊ शकतात, अन्यथा पुढील महिन्यात भाव आणखी वाढण्याची शक्यता आहे.
कांद्याचे भाव किती वाढले?
घाऊक व्यापारी नितीन पारेख यांच्या मते, मुंबईत गेल्या महिन्यात कांद्याच्या किरकोळ दरात 10 रुपयांनी वाढ झाली आहे. चांगल्या प्रतीचा कांदा घाऊक दरात 52 रुपये प्रति किलो दराने विकला जात आहे, तर कमी प्रतीचा कांदा 40 रुपये प्रति किलो दराने विकला जात आहे. दरम्यान, पुण्यात कांद्याचे किरकोळ भाव 60 ते 65 रुपये प्रति किलोवर पोहोचले आहेत, तर घाऊक दरात कांदा 50 रुपये प्रति किलो दराने विकला जात आहे.
महत्त्वाच्या बातम्या
