Maharashtra Weather Update: कडाक्याच्या उन्हाचा चटका सहन करणाऱ्या राज्यातील जनतेसाठी आणि बळीराजासाठी मोठी बातमी समोर येत आहे. येत्या 29 मेपर्यंत राज्यात मान्सूनपूर्व पाऊस (Pre-Monsoon Rain) पडण्याचा अंदाज हवामान तज्ज्ञांकडून व्यक्त करण्यात आला आहे. यंदा नैऋत्य मोसमी वारे (Southwest Monsoon) अत्यंत वेगाने पुढे सरकत असल्याने मान्सून महाराष्ट्रात नेहमीच्या वेळेपेक्षा काही दिवस आधीच दाखल होण्याचा अंदाज (Prediction) वर्तवण्यात आला आहे. 

Maharashtra Weather Update: 75 ते 100 मिलिमीटर पाऊस झाल्याशिवाय पेरणी नको!

मान्सून लवकर येत असल्यामुळे शेतकऱ्यांमध्ये उत्साहाचे वातावरण असले, तरी पेरणीबाबत शेतकऱ्यांनी अजिबात घाईगडबड करू नये, असा महत्त्वपूर्ण इशारा वसंतराव नाईक मराठवाडा कृषी विद्यापीठाच्या हवामानशास्त्र विभागाचे प्रमुख डॉ. कैलास डाखोरे यांनी दिला आहे. "जोपर्यंत शेतात किमान 75 ते 100 मिलिमीटर पाऊस (Rainfall) होत नाही, तोपर्यंत शेतकऱ्यांनी पेरणीची (Sowing) घाई करू नये, असे त्यांनी म्हटले आहे. अपुऱ्या पावसावर पेरणी केल्यास दुबार पेरणीचे संकट (Risk of Resowing) ओढावू शकते, ज्यामुळे शेतकऱ्यांचे आर्थिक नुकसान होऊ शकते, असे देखील त्यांनी म्हटले आहे.  

Maharashtra Weather Update: जून महिन्यात सरासरीपेक्षा चांगल्या पावसाचा अंदाज

हवामान शास्त्र विभागाने दिलेल्या माहितीनुसार, यंदा मान्सूनची वाटचाल अत्यंत अनुकूल असून जून महिन्यात राज्यात सरासरीपेक्षा चांगल्या पावसाची शक्यता आहे. आगामी मान्सूनपूर्व पावसामुळे राज्यातील तापमानात (Temperature) मोठी घट होईल, ज्यामुळे नागरिकांना उष्णतेच्या लाटेपासून (Heat Wave) मोठा दिलासा मिळेल.

Maharashtra Weather Update:  वादळी वाऱ्यांसह विजांचा कडकडाट: काळजी घेण्याचे आवाहन

दरम्यान, मान्सूनपूर्व पाऊस हा अनेकदा वादळी स्वरूपाचा असतो. त्यामुळे राज्यातील काही भागांत जोरदार वादळी वारे (Strong Winds), मेघगर्जना आणि विजांच्या कडकडाटासह (Thunderstorm and Lightning) हा पाऊस पडण्याची शक्यता आहे. या पार्श्वभूमीवर शेतात काम करताना किंवा बाहेर प्रवास करताना नागरिकांनी आणि शेतकऱ्यांनी स्वतःच्या व पाळीव प्राण्यांच्या संरक्षणासाठी आवश्यक ती खबरदारी (Precautions) घ्यावी, असे आवाहनही कृषी विद्यापीठाच्या हवामान विभागातर्फे करण्यात आले आहे.

Rain Update: मुंबईत मान्सूनपूर्व पावसाची हजेरी; राज्यातील धरणांमध्ये 30.53 टक्के पाणीसाठा

हवामान खात्याच्या अंदाजानुसार मुंबईत मान्सूनपूर्व पावसाने हजेरी लावली आहे. दादरमधील शिवाजी पार्कसह अनेक भागांत आज सकाळपासून हलका पाऊस पडत असून वातावरणात गारवा निर्माण झाला आहे. पुढील काही दिवसांत पावसाचा जोर वाढण्याची शक्यता वर्तवण्यात आली आहे. दरम्यान, राज्यातील धरणांमध्ये सध्या 30.53 टक्के पाणीसाठा शिल्लक आहे. जायकवाडी धरणात 37 टक्के, खडकवासला धरणात 57.47 टक्के, तर कोयना धरणात केवळ 13 टक्के पाणीसाठा उपलब्ध आहे.

आणखी वाचा 

Petrol Diesel Shortage : इंधन टंचाईमुळे बळीराजा रडकुंडीला, परभणीत संयम सुटला; मानवतच्या पेट्रोल पंपावर तुंबळ हाणामारी, नंदुरबारच्या शहाद्यात शेतकऱ्याला मारहाण