शेतकऱ्यांसाठी महत्वाची बातमी! लवकरच खात्यावर जमा होणार 2000 रुपये, किती शेतकऱ्यांना मिळणार लाभ?

उजनी धरण AI डेटा सेंटर! सत्ताधारी आणि विरोधक आमने-सामने येण्याची शक्यता, एका बाजूला विरोधात आंदोलन होणार तर दुसऱ्या बाजूला समर्थनात आंदोलन

आफताब शेख, एबीपी माझा — Fri, 30 Oct 2026 22:13:57 +0530

Solapur Ujani dam AI Data Center News : उजनी धरणावर होणाऱ्या AI डेटा सेंटर प्रकल्पाला (Solapur Ujani dam AI Data Center ) शेतकऱ्यांचा प्रचंड विरोध आहे. कोणत्याही परिस्थितीत हा प्रकल्प आम्हाला नको असी भूमिका शेतकऱ्यांनी घेतली आहे. दरम्यान, या प्रकल्पाच्या विरोधात उद्या म्हणजे 31 ऑक्टोबर रोजी टेंभूर्णीजवळ मोठं आदोलन करण्यात येणार आहे. राष्ट्रवादी काँग्रेस शरदचंद्र पवार पक्षाचे आमदार रोहित पवार (MLA Rohit Pawar) आणि खासदार धैर्यशील मोहिते पाटील (Dhairsheel Mohite Patil) यांच्या नेतृत्वात हे आंदोलन केलं जाणार आहे. दरम्यान, दुसऱ्या बाजूला उजनी धरणावरील AI डाटा सेंटरच्या समर्थनात सोलापुरात आंदोलन केलं जाणार आहे. त्यामुळं उजनी धरणावरील प्रस्तावित AI धरणाच्या मुद्यावरून सत्ताधारी आणि विरोधक उद्या आमने-सामने येण्याची शक्यता निर्माण झाली आहे.

उजनी धरणावरील AI डाटा सेंटरच्या समर्थनाथ सोलापुरात आंदोलन केलं जाणार

उजनी धरणावरील AI डेटा सेंटरच्या विरोधात राष्ट्रवादी शरद पवार गटाकडून उद्या आंदोलन करण्यात येणार आहे. आमदार रोहित पवार यांच्या नेतृत्वात पुणे-सोलापूर महामार्गवर उद्या राष्ट्रवादी शरद पवार गटाचे आंदोलन होणार आहे. तर दुसरीकडे उजनी धरणावरील AI डाटा सेंटरच्या समर्थनाथ सोलापुरात आंदोलन केलं जाणार आहे. सोलापुरात उद्या AI डेटा सेंटर समर्थनाथ जनसमर्थन करण्याचा प्रयत्न केला जाणार आहे. या जनसमर्थन आंदोलनात सत्ताधारी भाजपचे नेते सहभागी होणार असल्याची माहिती मिळत आहे. सोलापूर शहरातील डॉ. बाबासाहेब आंबेडकर चौक येथे AI डेटा समर्थनात एकवटणार आहेत. तर उजनी धरणावरील या AI डेटा सेंटर संदर्भात प्रशासनाने देखील प्रसिद्धी पत्रक जाहीर केलं आहे. या डेटा सेंटरमुळं सोलापूरच्या विकासाला चालना मिळणार असल्याचे जिल्हाधिकारी एस कार्तिकेयन यांनी प्रसिद्धी पत्रकतून सांगितलं आहे.

शेतकऱ्यांशी चर्चा करुनच पुढचा निर्णय घेतला जाईल :कृषीमंत्री

उजनी धरणावर होणाऱ्या AI डेटा सेंटर प्रकल्पाबाबत राज्याचे कृषीमंत्री दत्तात्रय भरणे यांना विचारण्यात आले होते. यावेळी त्यांनी सांगितले की, शासनाच्या वतीने आमच्या अधिकाऱ्यांनी शेतकऱ्यांकडे जावं. प्रकल्पासंदर्भात त्यांच्याशी चर्चा करावी. त्यांच्या सूचना ऐकव्यात त्यांचे समज गैरसमज दूर करावेत. जोपर्यंत शेतकरी तयार होत नाहीत तोपर्यंत अधिकाऱ्यांनी या गोष्टी करु नयेत असी माहिती भरणे यांनी दिली. याबाबतीमध्ये शेतकऱ्यांशी चर्चा करुनच पुढचा निर्णय घेतला जाईल असंही ते म्हणाले.

PM किसान योजनेचा 24 वा हप्ता शेतकऱ्यांच्या खात्यात जमा, महाराष्ट्रातील किती शेतकऱ्यांना मिळाला लाभ?

अभिषेक मुठाळ — Fri, 30 Oct 2026 16:43:51 +0530

मुंबई : प्रधानमंत्री किसान सन्मान निधी योजनेअंतर्गत 24 हप्ता आज शेतकऱ्यांच्या खात्यात जमा झाला आहे. गुजरातमधील बनासकांठा येथे आयोजित कार्यक्रमात प्रधानमंत्री नरेंद्र मोदी यांच्या हस्ते देशातील शेतकऱ्यांना 24 वा हप्ता वितरीत करण्यात आला. महाराष्ट्रातील 91 लाख 12 हजार 765 शेतकऱ्यांच्या बँक खात्यांत 1 हजार 835 कोटी रुपयांचा निधी थेट जमा केला. शेतकऱ्यांचे उत्पन्न वाढवण्यासाठी केंद्र सरकारने आर्थिक सहाय्याबरोबरच विज्ञान, तंत्रज्ञान, सिंचन, पशुपालन आणि पूरक व्यवसायांना प्राधान्य देत असल्याचे प्रधानमंत्री नरेंद्र मोदी यांनी यावेळी सांगितले.

पीएम किसान सन्मान निधीच्या माध्यमातून आतापर्यंत सुमारे 4 लाख कोटी रुपये जमा

या कार्यक्रमात मुख्यमंत्री देवेंद्र फडणवीस यांनी वर्षा निवासस्थान येथून दूरदृश्य संवाद प्रणालीद्वारे सहभाग घेतला. कृषी विभागाचे सचिव परिमल सिंग यावेळी उपस्थित होते. प्रधानमंत्री मोदी म्हणाले, केंद्र सरकारच्या विविध धोरणांमुळे गेल्या काही वर्षांत देशातील शेतकऱ्यांना 50 लाख कोटी रुपयांपेक्षा अधिक रक्कम मिळाली आहे. देशातील 85 टक्क्यांपेक्षा अधिक असलेल्या लहान शेतकऱ्यांना पीएम किसान सन्मान निधीच्या माध्यमातून आतापर्यंत सुमारे 4 लाख कोटी रुपये थेट बँक खात्यांत देण्यात आले आहेत.

जागतिक बाजारात खतांच्या किमती वाढल्यानंतरही केंद्र सरकारने त्याचा भार शेतकऱ्यांवर पडू दिला नाही. शेतकऱ्यांना परवडणाऱ्या दरात खते उपलब्ध करून देण्यासाठी सरकारने सुमारे 16 लाख कोटी रुपये खर्च केले. गेल्या 12 वर्षांत गहू आणि धान उत्पादक शेतकऱ्यांना किमान आधारभूत किमतीच्या माध्यमातून 24 लाख कोटी रुपये देण्यात आले. प्रधानमंत्री पीक विमा योजनेतून गेल्या दहा वर्षांत शेतकऱ्यांना 2 लाख कोटी रुपयांपेक्षा अधिक भरपाई मिळाल्याचेही त्यांनी सांगितले.

सिंचनावरील खर्च कमी करण्यासाठी पीएम कुसुम योजनेअंतर्ग 12 लाख सौरपंप दिले

सिंचनावरील खर्च कमी करण्यासाठी पीएम कुसुम योजनेअंतर्गत आतापर्यंत सुमारे 12 लाख सौरपंप देण्यात आले आहेत. या पंपांमुळे शेतकऱ्यांची 80 कोटी लिटरपेक्षा अधिक डिझेलची बचत झाली आहे. याशिवाय अतिरिक्त वीज निर्मितीचाही शेतकऱ्यांना लाभ होत असल्याचे प्रधानमंत्री मोदी यांनी स्पष्ट केले.

पशुपालन हा ग्रामीण अर्थव्यवस्थेचा महत्त्वाचा भाग

बदलत्या हवामानाशी सुसंगत बियाण्यांच्या सुमारे तीन हजार नव्या जाती शेतकऱ्यांना उपलब्ध करून दिल्या आहेत. पशुपालन हा ग्रामीण अर्थव्यवस्थेचा महत्त्वाचा भाग असून, राष्ट्रीय गोकुळ अभियानातून देशी पशुधनाचे संवर्धन आणि वैज्ञानिक प्रजननाला चालना दिली जात आहे. पशूंना लाळ्या-खुरकुत रोगापासून वाचविण्यासाठी देशभर मोफत लसीकरण मोहीम राबविण्यात आली आहे. आतापर्यंत सुमारे 150 कोटी लसमात्रा देण्यात आल्या असून, 8 कोटींपेक्षा अधिक शेतकऱ्यांच्या पशुधनाला त्याचा लाभ झाला आहे. देशातील गाय आणि म्हशींचे प्रतिदिन सरासरी दूध उत्पादन 2013-14 मधील पाच लिटरपेक्षा कमी पातळीवरून आता सुमारे आठ लिटरपर्यंत वाढल्याचे प्रधानमंत्री मोदी यांनी नमूद केले. सरदार वल्लभभाई पटेल यांच्या जयंतीनिमित्त ३१ ऑक्टोबर रोजी आयोजित ‘रन फॉर युनिटी’मध्ये नागरिकांनी, विशेषतः युवकांनी मोठ्या संख्येने सहभागी व्हावे, असे आवाहन प्रधानमंत्री नरेंद्र मोदी यांनी यावेळी केले.

सात दिवसात पाऊस, साखर मिरची महाग ते राजकीय उलथापालथ, पट्टणकोडोलीच्या यात्रेत फरांडे बाबांची भाकणूक, हजारो भाविकांनी घेतलं दर्शन

विजय केसरकर, एबीपी माझा — Thu, 29 Oct 2026 20:38:24 +0530

Kolhapur Pattankodoli Yatra : महाराष्ट्रासह कर्नाटक, आंध्र प्रदेश आणि तेलंगणा राज्यामध्ये प्रसिद्ध असणाऱ्या कोल्हापूर जिल्ह्यातील पट्टणकोडोलीच्या (Pattankodoli Yatra) श्री विठ्ठल बिरदेव यात्रेला आजपासून सुरुवात झाली आहे. यात्रेच्या पहिल्याच दिवशी हजारो भाविकांनी विठ्ठल बिरुदेवाचे दर्शन घेऊन भंडाऱ्याची उधळण केली. या यात्रेचा अनुभव घेण्यासाठी देश विदेशातील नागरिक पट्टणकोडोली या ठिकाणी येत असतात. यात्रेचे आणखी एक वैशिष्ट्य म्हणजे फरांडे बाबा (Farande Baba) यांनी केलेली भाकणूक होय. फरांडे बाबांची भाकणूक ऐकण्यासाठी भक्तांचे कान आसुसलेले असतात. यावर्षी त्यांनी नेमकी काय भाकनूक केली याबाबतची माहिती पाहुयात.

Farande Baba Bhakanuk : फरांडे बाबांनी काय केली भाकणूक?

कोल्हापूर जिल्ह्यातील पट्टणकोडोलीच्या (Pattankodoli Yatra) श्री विठ्ठल बिरदेव यात्रेला आजपासून सुरुवात झाली आहे. या यात्रेसाठी मोठ्या प्रमाणात भाविक दरवर्षी येतात. यावर्षी देखील मोठ्या प्रमामात भाविक पट्टणकोडोलीत दाखल झाले आहेत. दरम्यान, या यात्रेत फरांडे बाबा भाकणूक करतात. ही भाकणूक एकण्यासाठी भाविकांची मोठी गर्दी या यात्रेत होत असते. फरांडे बाबांनी केलेल्या भाकनुकीनुसार, पुढच्या सात दिवसात पाऊस पडेल, राजकीय उलथापालथ होऊन देशावर महिला राज येईल. मिरची आणि साखरेचे दर वाढतील, इतकंच नाही तर मोठी आंदोलनं होऊन लढाया होतील अशी भाकणुक फरांडे बाबा यांनी केली आहे.

29 ऑक्टोबर ते 31 ऑक्टोबर 2026 या कालावधीत येथील यात्रा उत्साहात पार पडणार

पट्टणकोडोली येथील प्रसिद्ध श्री विठ्ठल-बिरदेव यात्रा 2026 ही तीन दिवस चालणार आहे. 29 ऑक्टोबर ते 31 ऑक्टोबर 2026 या कालावधीत येथील यात्रा उत्साहात पार पडणार आहे. या यात्रेसाठी मोठ्या संख्येनं भाविक पट्टणकोडोलीत दाखल झाले आहेत. आजच्या पहिल्याच दिवशी हजारो भाविकांनी विठ्ठल बिरुदेवाचे दर्शन घेऊन भंडाऱ्याची उधळण केल्याचं पाहायला मिळाल. विशेष म्हणजे दरवर्षी या यात्रेत फरांडे बाबा भाकणूक करत असतात. त्यांच्या भाकणूकीकडे सर्वाचं लक्ष लागलेलं असतं. यावर्षी देखील त्यांनी भाकणूक केली आहे. यामध्ये पुढच्या सात दिवसात पाऊस पडेल असे सांगण्यात आले आहे. त्याचबरोबर राजकीय उलथापालथ होऊन देशावर महिला राज येईल अशी भावकूम देखील फरांडे बाबांनी केली आहे. तसेच मिरची आणि साखरेचे दरात मोठ्या प्रमाणात वाढ होईल अशी भाकणूक फरांडे बाबांनी पट्टणकोडोलीत यात्रेत केली आहे. त्याचबरोबर मोठी आंदोलनं होऊन लढाया होतील असं ही त्यांनी सांगितलं आहे.

ऊसाला पहिली उचल 4500 घेतल्याशिवाय स्वस्थ बसणार नाही, शेतकऱ्यांच्या घामाला योग्य दाम मिळालाच पाहिजे, शेट्टींचा इशारा

गणेश लटके — Tue, 27 Oct 2026 20:13:42 +0530

Raju Shetti : सध्या राज्यात ऊस दराच्या मुद्यावरुन चांगलच वातावरण तापल्याचं चिन्ह पाहायला मिळत आहे. स्वाभिमानी शेतकरी संघटनेचे प्रमुख राजू शेट्टींनी ऊस दराच्या मुद्यारुन साखर कारखानदार आणि सरकारला इशारा दिला आहे. साखर कारखानदारांनी उसाची पहिली उचल जाहीर न करता गळीत हंगाम सुरू करून कायद्याचे उल्लंघन केल्याचा आरोप करत राजू शेट्टींनी केलाय. आजपासून छावणी आंदोलन सुरू करण्याचा निर्णय घेतला आहे. पहिली उचल 4 हजार 500 घेतल्याशिवाय आम्ही स्वस्थ बसणार नाही असा इशारा देखील यावेळी राजू शेट्टी यांनी दिला आहे.

ज्या परिसरात साखर कारखाने सुरू आहेत, त्या परिसरातील प्रमुख मार्गांवर शेतकऱ्यांच्या छावण्या उभारून उसाची वाहतूक रोखण्यात येणार आहे. उसाने भरलेली एकही ट्रॉली अथवा ट्रक कारखान्याच्या दिशेने जाऊ दिला जाणार नाही, असा निर्धार संघटनेने व्यक्त केला आहे. पहिली उचल 4 हजार 500 घेतल्याशिवाय आम्ही स्वस्थ बसणार नाही असा इशारा देखील यावेळी राजू शेट्टी यांनी दिला. सांगली व कोल्हापूर जिल्ह्यांतील स्वाभिमानी शेतकरी संघटनेच्या प्रमुख पदाधिकाऱ्यांची बैठक पार पडली. संघटनेचे संस्थापक अध्यक्ष राजू शेट्टी यांच्या प्रमुख उपस्थितीत झालेल्या या बैठकीत आंदोलनाची पुढील दिशा निश्चित करण्यात आली.

केवळ निवेदने देऊन किंवा बैठका घेऊन प्रश्न सुटणार नाहीत, आंदोलन तीव्र करावं लागेल

साखर कारखानदारांनी शेतकऱ्यांच्या उसाला पहिली उचल किती देणार, हे स्पष्ट न करताच कारखाने सुरू केले आहेत. शेतकऱ्यांच्या उसाचा दर निश्चित करण्याबाबत पारदर्शकता न ठेवता गळीत हंगाम सुरू करणे अन्यायकारक आहे. साखर कारखानदारांचे हे धोरण स्वाभिमानी शेतकरी संघटना कदापि सहन करणार नाही. त्यामुळे आता केवळ निवेदने देऊन किंवा बैठका घेऊन प्रश्न सुटणार नसून प्रत्यक्ष रस्त्यावर उतरून आंदोलन तीव्र केले जाईल, असा इशारा राजू शेट्टी यांनी दिला.

साखर कारखानदारांनी एफआरपीच्या पुढे जाऊन उसाचा दर जाहीर करावा

साखर कारखानदारांनी एफआरपीच्या पुढे जाऊन उसाचा दर जाहीर करावा, ही शेतकऱ्यांची रास्त मागणी आहे. उत्पादन खर्चात सातत्याने वाढ होत असताना खतांचे, औषधांचे, मजुरीचे आणि वाहतुकीचे दर वाढले आहेत. मात्र, त्या तुलनेत शेतकऱ्यांना मिळणाऱ्या उसाच्या दराबाबत कारखानदारांकडून स्पष्ट भूमिका घेतली जात नाही. शेतकऱ्यांनी वर्षभर कष्ट करून पिकवलेल्या उसाच्या दराचा निर्णय शेतकऱ्यांना विश्वासात घेऊनच झाला पाहिजे असे शेट्टी म्हणाले.

शेतकरी विखुरलेले राहिले, तर त्याचा फायदा कारखानदारांना होईल

कर्नाटक राज्यातील शेतकऱ्यांनी संघटितपणे आवाज उठवल्यामुळे तेथील ऊसदराच्या प्रश्नावर सरकारला दखल घ्यावी लागली, असे सांगत राजू शेट्टी यांनी महाराष्ट्रातील शेतकऱ्यांनाही एकजूट दाखविण्याचे आवाहन केले. शेतकऱ्यांची वज्रमूठ मजबूत असेल, तरच कारखानदार आणि सरकारला शेतकऱ्यांच्या प्रश्नांची दखल घ्यावी लागेल. शेतकरी विखुरलेले राहिले, तर त्याचा फायदा कारखानदारांना होईल. आंदोलन कमकुवत करण्याचे प्रयत्न होऊ शकतात; मात्र शेतकऱ्यांनी एकजुटीने त्याला सामोरे गेले पाहिजे, असे ते म्हणाले.

या आंदोलनासाठी प्रत्येक कारखान्याच्या परिसरात शेतकऱ्यांनी छावणीमध्ये सहभागी व्हावे, असे आवाहन संघटनेच्या वतीने करण्यात आले आहे. सांगली आणि कोल्हापूर जिल्ह्यांतील कार्यकर्ते, पदाधिकारी आणि ऊस उत्पादक शेतकऱ्यांनी आंदोलनात सक्रिय सहभाग घ्यावा, अशी भूमिका बैठकीत मांडण्यात आली. पहिली उचल जाहीर करून शेतकऱ्यांच्या मागण्यांवर समाधानकारक तोडगा काढल्याशिवाय आंदोलन मागे घेण्याचा प्रश्नच उद्भवत नाही, असे संघटनेने स्पष्ट केले. ऊसदराचा प्रश्न मार्गी लागेपर्यंत आंदोलन अधिक तीव्र करण्याचा निर्धारही यावेळी व्यक्त करण्यात आला.

शेतकऱ्यांच्या घामाला योग्य दाम मिळालाच पाहिजे

शेतकऱ्यांच्या घामाला योग्य दाम मिळालाच पाहिजे, उसाच्या दराबाबत स्पष्ट भूमिका घेतलीच पाहिजे आणि शेतकऱ्यांना विश्वासात घेतल्याशिवाय गळीत हंगाम राबविण्याच्या धोरणाला विरोध केला जाईल, अशी ठाम भूमिका स्वाभिमानी शेतकरी संघटनेने घेतली आहे.

Eknath Shinde: 'आरोप-प्रत्यारोप बंद करा, दुष्काळग्रस्त शेतकऱ्यांच्या बांधावर उतरा; अर्जापासून पंचनाम्यापर्यंत मदतीचा हात द्या'; उपमुख्यमंत्री एकनाथ शिंदे यांचे नेते-कार्यकर्त्यांना आदेश

अक्षय भाटकर, एबीपी माझा — Mon, 26 Oct 2026 06:57:12 +0530

Eknath Shinde मुंबई: राज्यातील दुष्काळग्रस्त शेतकरी आणि ग्रामीण जनतेला तातडीने मदत मिळावी, यासाठी उपमुख्यमंत्री एकनाथ शिंदे (Eknath Shinde) यांनी शिवसेनेचे (Shivsena) सर्व मंत्री, खासदार आमदार आणि पदाधिकाऱ्यांना प्रत्यक्ष बांधावर उतरून शेतकऱ्यांना मदत करण्याचे आवाहन केले आहे. दुष्काळग्रस्तांना (Maharashtra Drought ) मदत देताना अर्जापासून पंचनाम्यापर्यंत आणि सरकारी मदत प्रत्यक्ष लाभार्थ्याच्या हातात येईपर्यंत शेतकऱ्याच्या पाठीशी उभे राहण्याची जबाबदारी घ्यावी, असे आवाहन त्यांनी पदाधिकाऱ्यांना व्हिडीओ कॉन्फरन्सद्वारे आयोजित बैठकीतून केलं आहे.(Eknath Shinde on Maharashtra Drought )

Eknath Shinde : पक्षाच्या वतीने गावोगावी टँकर पुरवण्याचा देखील नक्की विचार करू

दुष्काळाच्या पार्श्वभूमीवर शिवसेनेकडून दसरा मेळाव्याला 179 दुष्काळग्रस्त तालुक्यात 4 लाख 60 हजार धान्य किट मदत म्हणून पाठविण्यात आली. मात्र मदत पाठविणे एवढ्यावर न थांबता ती खरोखर गरजू कुटुंबांपर्यंत पोहोचावी, याची खात्री करण्याचे निर्देश शिंदे यांनी दिले. धान्य किटसोबत आवश्यक जीवनावश्यक वस्तूंची व्यवस्था आणि स्थानिक पातळीवर वितरणाची जबाबदारीही पदाधिकाऱ्यांनी घ्यावी, असे त्यांनी यावेळी सांगितले. पिण्याच्या पाण्याची भीषण टंचाई पाहता पक्षाच्या वतीने गावोगावी टँकर पुरवण्याचा देखील नक्की विचार करू, असे शिंदे यांनी यावेळी स्पष्ट केले.

Eknath Shinde : आरोप-प्रत्यारोपात वेळ न घालवता थेट शेतकऱ्यांच्या बांधावर जा

दुष्काळात राजकारणापेक्षा समाजकारणाला प्राधान्य देण्याचा संदेश देताना शिंदे यांनी बाळासाहेब ठाकरे यांच्या 80 टक्के समाजकारण आणि 20 टक्के राजकारणाच्या विचाराची आठवण करून दिली. आरोप-प्रत्यारोपात वेळ न घालवता शिवसैनिकांनी थेट शेतकऱ्यांच्या बांधावर जावे आणि त्यांच्या अडचणी सोडविण्यासाठी प्रशासनाशी समन्वय साधावा, असे आवाहन उपमुख्यमंत्री एकनाथ शिंदे यांनी केले.

प्रत्येक मंत्र्याने त्यांना सोपवलेल्या दुष्काळग्रस्त भागाची जबाबदारी स्वीकारून नियमित दौरे करावेत. केवळ बैठका न घेता शेत, गाव, बाजारपेठ आणि पाणीटंचाईच्या ठिकाणी जाऊन शेतकरी, महिला, शेतमजूर, पशुपालक आणि ग्रामस्थांशी थेट संवाद साधावा, असे निर्देश देण्यात आले. सध्या परिस्थिती बिकट असल्याने अनेक शेतकऱ्यांच्या मनात आत्महत्या करण्याचे टोकाचे विचार येऊ शकतात, त्यांना वेळीच रोखून धीर देण्याचा प्रयत्न करावा, असेही त्यांनी पक्ष पदाधिकाऱ्यांना सांगितले.

Maharashtra Drought: मंत्री आणि पालकमंत्र्यांनी दर 15 दिवसांनी दुष्काळग्रस्त तालुक्यांचा आढावा घ्यावा

पीक नुकसान आणि पंचनामे, नुकसानभरपाई, पीक कर्ज पुनर्गठन, कृषी पंपांचा वीजपुरवठा, पिण्याचे पाणी, जनावरांसाठी चारा-पाणी, रोजगार आणि शासनाच्या योजनांचा लाभ यांचा आढावा घेण्यास सांगण्यात आले. पात्र शेतकऱ्याला केवळ कागदपत्रे किंवा प्रशासकीय विलंबामुळे मदतीपासून वंचित राहावे लागू नये, यासाठी मंत्री आणि पालकमंत्र्यांनी दर 15 दिवसांनी दुष्काळग्रस्त तालुक्यांचा प्रशासनाकडून आढावा घ्यावा, त्याची नोंद वही तयार करून सर्व भागात आवश्यक मदत पोहोचते की नाही ते स्वतः तपासावे असेही सुचवले. शासकीय मदत मिळवताना अर्ज भरण्यापासून पंचनाम्यापर्यंत शिवसैनिकांनी शेतकऱ्यांना मदत करावी, अशी स्पष्ट भूमिका शिंदे यांनी यावेळी मांडली.

पाणी हा सर्वोच्च प्राधान्यक्रम ठेवून टँकरची गरज, टँकर वेळेवर पोहोचतो का, विहिरी-बोअरवेलची स्थिती आणि पुढील १५ ते ३० दिवसांची पाणीव्यवस्था याची पाहणी करण्याच्या सूचना देण्यात आल्या. जनावरांसाठी चारा, पाणी, छावण्या आणि पशुवैद्यकीय सेवांकडेही लक्ष देण्यास सांगण्यात आले.

Eknath Shinde : अनावश्यक स्वागत-सत्कार जाहिरातबाजी, बॅनर-होर्डिंग्जवरील खर्च टाळून मदतकार्यासाठीचे आवाहन

दरम्यान, दुष्काळाच्या काळात भव्य कार्यक्रम, अनावश्यक स्वागत-सत्कार, शक्तिप्रदर्शन, मंडप, जाहिरातबाजी, बॅनर-होर्डिंग्जवरील खर्च टाळून उपलब्ध साधनसंपत्ती मदतकार्यासाठी वापरण्याचे आवाहन करण्यात आले. पक्ष, जात, गाव किंवा राजकीय मत न पाहता प्रत्येक पात्र लाभार्थ्यापर्यंत मदत पोहोचली पाहिजे, हा शिंदे यांच्या मार्गदर्शनाचा केंद्रबिंदू ठरला. शेतकऱ्याला जगवणे सगळ्यात जास्त महत्त्वाचे असून बाकीच्या गोष्टीना नंतर प्राधान्य द्या असेही त्यांनी पक्ष सहकाऱ्यांना सांगितले.

याशिवाय पक्ष पदाधिकाऱ्यांनी सुचवलेल्या सूचनांची अंमलबजावणी करण्यासाठी त्या आगामी कॅबिनेट बैठकीत मांडून त्यांना मंजुरी मिळण्याबाबत त्यांनी सकारात्मकता दाखवली. तसेच काही मागण्या केंद्रीय पातळीवर सोडवण्यासाठी केंद्र शासनाला पत्र लिहिण्याची देखील त्यांनी तयारी दर्शवली.

Eknath Shinde : शेतकऱ्यांना नक्की मोठा दिलासा मिळेल त्यासाठी सर्वांनी एकदिलाने कामाला लागा

मायक्रो फायनान्स कंपन्या, बँका आणि खाजगी सावकार यांच्याकडून शेतकऱ्यांना कोणताही त्रास होऊ नये यासाठी प्रशासकीय पातळीवर ठोस निर्णय घेण्यात येणार असून त्याची अंमलबजावणी करण्याबाबत शिवसेनेच्या पदाधिकाऱ्यांनी दक्ष राहावे असेही शिंदे यांनी यावेळी सांगितले. शासकीय यंत्रणेच्या सोबतीने शिवसेनेची यंत्रणा राबली तर शेतकऱ्यांना नक्की मोठा दिलासा मिळेल असे सांगून त्यासाठी सर्वांनी एकदिलाने कामाला लागावे असे आवाहन शिंदे यांनी यावेळी केले.

इतर महत्वाच्या बातम्या

बॅलेट पेपर हवा होता तर मग राजीव गांधींच्या काळात EVM मशीन का आणली? आठवलेंचा काँग्रेसला सवाल, म्हणाले चुकीचा प्रचार करु नका, तुम्हीही सत्तेवर या

शेतकऱ्यांसाठी महत्वाची बातमी! दिवाळीपूर्वी खात्यात जमा होणार 2000 रुपये, पैसे मिळण्यासाठी काय करावं? जाणून घ्या सविस्तर माहिती

गणेश लटके — Sun, 25 Oct 2026 19:37:39 +0530

PM Kisan Samman Nidhi Yojana : शेतकऱ्यांसाठी महत्वाची बतमी आहे. पुढच्या आठवड्यात शेतकऱ्यांच्या खात्यात 2000 रुपये जमा होणार आहेत. पंतप्रधान किसान सन्मान निधी योजनेचा (PM Kisan Samman Nidhi Yojana) 24 वा हप्ता 30 ऑक्टोबर रोजी वितरित केला जाणार आहे. पात्र शेतकऱ्यांना 2000 रुपये थेट त्यांच्या बँक खात्यात जमा होणार आहेत. दरम्यान, ज्या शेतकऱ्यांची ई-केवायसी अपूर्ण आहे, त्यांनी तात्काळ ती पूर्ण करावी, अन्यथा पैसे मिळण्यापासून वंचित राहण्याची शक्यता आहे.

दरम्यान, अपूर्ण ई-केवायसी किंवा चुकीच्या नोंदींमुळे पेमेंटला विलंब होऊ शकतो. आधार लिंकिंग किंवा जमिनीची पडताळणी यांसारख्या समस्यांमुळेही पेमेंटवर परिणाम होऊ शकतो. शेवटच्या दिवसाची वाट पाहण्याऐवजी शेतकऱ्यांनी या समस्यांचे निराकरण आगाऊ करावे. या योजनेअंतर्गत ई-केवायसी पूर्ण करणे ही अत्यावश्यक अट आहे. त्यामुळे नोंदणीकृत शेतकऱ्यांची ओळख पडताळण्यात मदत होते. शेतकऱ्यांनी त्यांचे बँक खाते आधारशी लिंक आहे की नाही हेही तपासावे. तसेच त्यांच्या जमिनीच्या नोंदींची पडताळणी करून त्यांची वैयक्तिक माहिती बरोबर असावी.

तुम्ही पात्र आहात की नाही हे कसे तपासायचे?

पीएम किसानच्या अधिकृत वेबसाइटद्वारे शेतकरी त्यांच्या पेमेंटची माहिती तपासू शकतात. तुमच्या मोबाईल फोनवर किंवा संगणकावर pmkisan.gov.in उघडा. ‘नो युवर स्टेटस’ पर्याय निवडा आणि तुमचा नोंदणी क्रमांक टाका. यानंतर, स्क्रीनवर दिसणारा कॅप्चा कोड प्रविष्ट करा आणि ‘ओटीपी मिळवा’ निवडा. पुढे जाण्यासाठी तुमच्या नोंदणीकृत मोबाईल नंबरवर प्राप्त झालेला OTP एंटर करा. तुमची माहिती आणि लाभार्थी स्थिती पुढील स्क्रीनवर दिसून येईल. तुमचे ई-केवायसी पूर्ण झाले आहे की नाही ते तपासा आणि काही चुका आहेत का ते पहा. जर काही काम बाकी असेल तर दिलेल्या सूचनांचे पालन करा. तुम्हाला तुमचे रेकॉर्ड दुरुस्त करण्यासाठी मदत हवी असल्यास, संबंधित सेवा केंद्राशी संपर्क साधा.

ई-केवायसी कसे पूर्ण करावे?

ई-केवायसी पूर्ण करण्यासाठी शेतकऱ्यांकडे तीन पर्याय आहेत: OTP, फिंगरप्रिंट किंवा फेस ऑथेंटिकेशन. ओटीपी पद्धतीसाठी, कार्यरत मोबाइल क्रमांक आधारशी जोडलेला असणे आवश्यक आहे. शेतकरी हा पर्याय पीएम किसान वेबसाइट किंवा मोबाईल ॲपद्वारे वापरू शकतात. वेबसाइटवर पडताळणीसाठी, ‘ई-केवायसी’ निवडा आणि तुमचा आधार क्रमांक टाका. यानंतर, तुमच्या आधारशी लिंक केलेल्या मोबाइल नंबरवर प्राप्त झालेला ओटीपी प्रविष्ट करा. ही प्रक्रिया पूर्ण करण्यासाठी उर्वरित सूचनांचे काळजीपूर्वक पालन करा. त्यानंतर, पडताळणी यशस्वी झाल्याचे सुनिश्चित करण्यासाठी तुमची स्थिती पुन्हा तपासा.

फिंगरप्रिंट पडताळणीसाठी शेतकरी ‘कॉमन सर्व्हिस सेंटर’मध्येही जाऊ शकतात. ज्यांना मदतीची गरज आहे त्यांच्यासाठी ‘राज्य सेवा केंद्र’ हा पर्यायही उपलब्ध आहे. ज्यांना ऑनलाईन पद्धतीचा वापर करण्यात अडचण येत आहे अशा शेतकऱ्यांना याचा फायदा होऊ शकतो. फेस ऑथेंटिकेशनद्वारे मोबाइल फोनद्वारे सत्यापन पूर्ण केले जाऊ शकते. Google Play Store वरून ‘PM-KISAN’ ॲप आणि ‘आधार फेस आरडी’ ॲप डाउनलोड करा. या योजनेत नोंदणीकृत मोबाईल क्रमांक वापरून PM-KISAN मध्ये लॉग इन करा. ‘लाभार्थी स्थिती’ उघडा आणि ई-केवायसी स्थिती तपासा. जर ते "नाही" म्हणत असेल, तर e-KYC निवडा आणि चेहरा स्कॅन करण्यासाठी सूचनांचे अनुसरण करा.

सुकाळातल्या जागा बिनविरोध कशा झाल्या? कार्यकर्त्यांनी विरोधात लढायचं आणि नेत्यांनी सत्तेची भाकरी एकत्र बसून खायची, खोतांचा हल्लाबोल, म्हणाले, गोपीचंद पडळकर विस्थापितांचा आवाज

गणेश लटके — Thu, 22 Oct 2026 22:28:11 +0530

Sadabhau Khot : सांगली जिल्हा मध्यवर्ती सहकारी बँकेच्या निवडणुकीत जवळपास पंधरा जागा बिनविरोध होण्याचं चित्र पाहायला मिळत आहे. निवडणुकीच्या काळात एकमेकांवर भ्रष्टाचाराचे आरोप करायचे, विकासाच्या मुद्द्यावरून संघर्ष करायचा; पण संचालकपदाच्या वाटणीची वेळ आली की सगळ्यांनी एकत्र यायचं! हे चित्र पाहून सामान्य शेतकऱ्याला प्रश्न पडतो, नेत्यांचं भांडण जनतेच्या प्रश्नांसाठी आहे की खुर्चीच्या वाटणीसाठी? असा सवाल आणदार सदाभाऊ खोत यांनी केला आहे.

दुष्काळाच्या नावाखाली एकीकडं बिनविरोधाची भाषा, तर दुसरीकडं काही जागांवर निवडणुकीचा संघर्ष का?

गावातल्या कार्यकर्त्यांनी एकमेकांच्या विरोधात लढायचं आणि नेत्यांनी मात्र सत्तेची भाकरी एकत्र बसून खायची, हा कसला न्याय? मग या राजकारणात सामान्य कार्यकर्त्याच्या आणि शेतकऱ्याच्या वाट्याला नेमकं काय येतं? दुष्काळाचं कारण पुढं, पण राजकारणाची गणितं वेगळी असल्याचे खोत म्हणाले. यंदा दुष्काळ असल्यामुळे निवडणूक बिनविरोध करत असल्याची भूमिका मांडली जात आहे. दुष्काळात नेत्यांनी एकत्र येणं चांगली गोष्ट आहे. पण मग सुकाळातल्या जागा बिनविरोध कशा झाल्या? आणि दुष्काळाच्या नावाखाली एकीकडं बिनविरोधाची भाषा, तर दुसरीकडं काही जागांवर निवडणुकीचा संघर्ष का? असा सवाल खोतांनी केला. विशेषतः आमदार गोपीचंद पडळकर यांच्या विरोधात निवडणूक होत असताना हा प्रश्न अधिक महत्त्वाचा ठरतो. दुष्काळ सगळ्यांसाठी सारखाच असेल, तर निवडणुकीची भूमिका मात्र वेगवेगळी का? हा सवाल आज गावागावांतल्या सामान्य माणसाच्या मनात आहे.

शेतकऱ्याला राजकारणातील डावपेच कळत नाहीत, असं समजू नका. तो काळ्या मातीतून सोनं पिकवतो. पावसाचा अंदाज ओळखतो, बाजारभावाचे चटके सहन करतो आणि कर्जाच्या ओझ्याखाली संसार चालवतो. त्यामुळे कोण कशासाठी एकत्र आलंय, हे समजायला त्याला वेळ लागत नाही. प्रस्थापितांना सोयरे चालतात; बरोबरीचा माणूस नको! आज प्रस्थापितांची मानसिकता अशी झाली आहे की, सत्ता आमच्याच हातात असावी, संस्था आमच्याच ताब्यात असाव्यात आणि बाकीच्यांनी आमच्या दरबारात मुजरे करावेत. आम्ही टाकलेल्या उष्ट्या पत्रावळीवर जेवायला घालू; पण आमच्या शेजारी खुर्ची टाकून बसण्याची हिंमत करू नये! पण गावगाड्यातला माणूस उष्ट्या पत्रावळीवरचं जेवण मागत नाही. त्याला आपल्या कष्टाच्या भाकरीचा मान हवा आहे. कुणाच्या मेहरबानीवर जगायचं नाही, तर स्वतःच्या कर्तृत्वावर उभं राहायचं आहे. प्रस्थापितांना विरोधक चालतात; पण आपल्या बरोबरीने बसणारं नवं नेतृत्व चालत नाही, हीच लोकशाहीची खरी शोकांतिका आहे असे खोत म्हणाले.

गोपीचंद पडळकरांचा संघर्ष एका जागेपुरता नाही

गोपीचंद पडळकरांचा संघर्ष एका जागेपुरता नाही. आज आमदार गोपीचंद पडळकर या निवडणुकीच्या मैदानात उभे आहेत, ते केवळ एका संचालकपदासाठी नाही, तर प्रस्थापितांच्या वर्तुळाबाहेर राहिलेल्या माणसाच्या प्रतिनिधित्वाचा प्रश्न घेऊन ही एक विस्थापितांची लढाई आहे, अशी आमची भावना आहे. माझ्यासारख्या शेतकरी चळवळीत काम करणाऱ्या कार्यकर्त्याला याचा सार्थ अभिमान आहे. कारण वर्षानुवर्षं सत्तेच्या वर्तुळाबाहेर राहिलेल्या माणसाला स्वतःचा आवाज उठवण्याची संधी मिळाली पाहिजे. वाघ कळपाच्या आधारावर नव्हे, तर स्वतःच्या ताकदीवर ओळखला जातो. तसंच, राजकारणात माणूस किती मोठ्या घराण्याच्या पुण्याई मागे उभा आहे, यापेक्षा तो कोणासाठी लढतो, हे महत्त्वाचं आहे. गोपीचंद पडळकर यांचा हा संघर्ष बहुजन समाजातील, शेतकरी समाजातील आणि व्यवस्थेत आपला वाटा शोधणाऱ्या विस्थापितांचा आवाज बनावा, हीच अपेक्षा आहे असे खोत म्हणाले.

जिल्हा मध्यवर्ती सहकारी बँक ही एखाद्या राजकीय घराण्याची खासगी मालमत्ता नाही

बँक शेतकऱ्याच्या उपयोगाची झाली पाहिजे. जिल्हा मध्यवर्ती सहकारी बँक ही एखाद्या राजकीय घराण्याची खासगी मालमत्ता नाही. ती शेतकऱ्याच्या घामातून उभी राहिलेली संस्था आहे. या बँकेतून वेळेवर पीककर्ज मिळालं पाहिजे, ग्रामीण भागात उद्योग उभे राहिले पाहिजेत, तरुणांना रोजगार मिळाला पाहिजे आणि सर्वसामान्य माणसाला आर्थिक आधार मिळाला पाहिजे. बँकेत कोण बसलं, यापेक्षा त्या माणसानं शेतकऱ्यासाठी काय केलं, हा खरा हिशेब आहे.
सहकार म्हणजे नेत्यांनी एकत्र येऊन खुर्च्या वाटून घेणं नव्हे; सहकार म्हणजे संकटात शेतकऱ्याच्या पाठीशी उभं राहणं! आज कोण बिनविरोध झालं, कोण संचालक झालं, याची चर्चा काही दिवस चालेल. पण प्रस्थापितांच्या वर्चस्वाला कुणी आव्हान दिलं आणि विस्थापितांच्या प्रतिनिधित्वासाठी कोण मैदानात उभं राहिलं, याची नोंद मात्र इतिहासात राहील. आमदार गोपीचंद पडळकर यांचा हा संघर्ष शेतकऱ्यांच्या प्रश्नांना न्याय देणारा आणि सामान्य माणसाला सहकारात सन्मानाचं स्थान मिळवून देणारा ठरावा, हीच अपेक्षा.

आजचा लढा एका खुर्चीचा नाही; तो गावगाड्यातल्या माणसाच्या स्वाभिमानाचा, शेतकऱ्याच्या हक्काचा

आजचा लढा एका खुर्चीचा नाही; तो गावगाड्यातल्या माणसाच्या स्वाभिमानाचा, शेतकऱ्याच्या हक्काचा आणि विस्थापितांच्या प्रतिनिधित्वाचा आहे! प्रस्थापितांची सोयरिक सत्तेसाठी असेल, तर गावगाड्यातल्या माणसाची एकजूट स्वाभिमानासाठी असली पाहिजे. कारण शेवटी सहकार कुणाचा, बँक कुणासाठी आणि शेतकऱ्याच्या पदरात न्याय किती, हेच या सगळ्या राजकारणाचं खरं मोजमाप ठरणार आहे असे खोत म्हणाले.

मका काढण्याच्या मशीनमध्ये अडकून शेतकऱ्याचा दुर्दैवी मृत्यू, तीन मुलांचं पितृछत्र हरपलं, जळगावच्या जामनेर तालुक्यातील घटना

चंद्रशेखर नेवे, एबीपी माझा, जळगाव — Thu, 22 Oct 2026 16:41:25 +0530

Jalgaon : जळगाव (Jalgaon) जिल्ह्यात धक्कादायक घटना घडली आहे. जामनेर तालुक्यात मका काढण्याच्या मशीनमध्ये अडकून 37 वर्षीय शेतकऱ्याचा दुर्दैवी मृत्यू (Farmers death) झाला आहे. योगेश भावालाल पाटील असं मृत शेतकऱ्याचं नाव आहे. जामनेर तालुक्यातील भागदरा शिवारात ही घटना घडली आहे. शेतकऱ्याचा मृत्यू झाल्यानं तीन मुलांचे पितृछत्र हरपले आहे. दरम्यान, या घटनेमुळं परिसरात हळहळ व्यक्त केली जात आहे.

Jalgaon : या घटनेमुळं परिसरात हळहळ व्यक्त केली जात आहे

शेतकरी दिनेश महाजन यांच्या शेतात मका काढण्याचं काम सुरू असताना हा अपघात झाला. योगेश पाटील हे शेतीकामासोबतच मका काढण्याचं मशीन चालवून कुटुंबाचा उदरनिर्वाह करत होते. त्यांच्या निधनामुळे तीन मुलांच्या डोक्यावरील वडिलांचं छत्र हरपलं आहे. या घटनेमुळं परिसरात हळहळ व्यक्त केली जात आहे. या प्रकरणी जामनेर पोलिसांत आकस्मात मृत्यूची नोंद करण्यात आली आहे. दरम्यान, शेतकऱ्यांनी शेतीची कामे करताना काळजी घेणं गरजेचं आहे. विशेषत: मशीनच्या कामासंदर्भात जास्त काजी घेणं गरजेचे आहे. थोडे जरी दुर्लक्ष झाले तरी त धोक्याचे ठरु शकते. त्यामुळं शेतीचं कोणतंही काम करताना सावधगिरी बाळगणं गरजेचं आहे.

पोहण्याचा मोह चिमुरड्यांच्या जीवावर बेतला, दोन अल्पवयीन मुलांचा मृत्यू

ठाणे जिल्ह्यात देखील एक धक्कादायक घटना घडली आहे. दोन अल्पवयीनं मुलांचा दुर्दैवी अंत झाल्याची गटना घडली आहे. पोहण्याचा मोह दोन चिमुरड्यांच्या जीवावर बेतला असल्याची अत्यंत मन हेलावून टाकणारी दुर्घटना बुधवारी सकाळी कोपरी परिसरात घडली. तलावात उतरलेल्या दोन अल्पवयीन मुलांना खोलीचा अंदाज न आल्याने पाण्यात बुडून प्राण गमवावे लागले. गणेश गुप्ता (वय 9) आणि गोलू मन्सुरी (वय 10, दोघेही रा. कोपरी गाव) अशी या दुर्दैवी बालकांची नावे आहेत. या घटनेमुळे कोपरी परिसरात मोठी शोककळा पसरली आहे. बुधवारी सकाळी गणेश आणि गोलू हे दोघे कोपरी येथील तलावाच्या परिसरात गेले होते. दरम्यान, दोघांनाही पोहता येत नसतानाही ते तलावाच्या पाण्यात उतरले. पाण्याचा अंदाज न आल्याने ते पाण्यात बुडू लागले. मुले बुडत असल्याचे लक्षात आल्यानंतर एका स्थानिक नागरिकाने त्यांना वाचवण्यासाठी तातडीने पाण्यात धाव घेतली आणि शर्थीचे प्रयत्न केले. मात्र, तोपर्यंत पाण्याचा प्रवाह आणि खोलीमुळे दोन्ही मुले पाण्यात पूर्णपणे बुडाली होती. अग्निशमन दलाने दोन्ही मुलांचे मृतदेह बाहेर काढले आहेत.

वर्षावर गेल्यास कारवाई! मग काय करायचे ? आझाद मैदानावर ओरडून ओरडून मरायचे? अजित नवलेंचा सरकारला सवाल

गणेश लटके — Wed, 21 Oct 2026 22:36:22 +0530

अहिल्यानगर : दुष्काळग्रस्त शेतकरी श्रमिकांच्या विविध मागण्यांसाठी अकोले येथे राज्यव्यापी महामुक्काम सत्याग्रह सुरु करण्यात आले आहे. किसान सभेसह अन्य संघटना देखील यामध्ये सहभागी झाल्या आहेत. मागण्या मान्य न झाल्यास 26 ऑक्टोबरपासून अकोले ते मुंबई वाहनांचा भव्य लॉंग मार्च काढण्यात येणार असल्याची माहिती किसासन सभेचे नेते डॉ. अजित नवले यांनी दिली आहे. तसेच मुख्यमंत्री देवेंद्र फडणवीस यांच्या वर्षा बंगल्यापर्यंत आंदोलन नेण्याचा निर्धार केल्याचे नवले म्हणाले. दरम्यान, यानंतर पोलीस निरीक्षक कार्यालय मलबार हिल यांच्याकडून अजित नवले यांनी नोटीस आली आहे. वर्षावर गेल्यास कारवाई करण्यात येणार असल्याचा उल्लेख नोटीसमध्य करण्यात आला आहे. मग काय करायचे ? आझाद मैदानवर ओरडून ओरडून मरायचे ?
काय गोळ्या घालायच्या घाला. आम्ही लोकशाही मार्गाने लढणार असल्याचे नवले म्हणाले.

नेमक्या काय आहेत मागण्या?

दुष्काळग्रस्त शेतकऱ्यांना योग्य नुकसानभरपाई द्यावी, नियमित कर्जफेड करणाऱ्या शेतकऱ्यांना दोन लाख रुपयांचे प्रोत्साहन अनुदान द्यावे, वनजमीन, देवस्थान जमीन, गायरान जमीन आणि घरांच्या तळजमिनी कसणाऱ्यांच्या नावे कराव्यात, नमो शेतकरी सन्मान योजनेचे थकीत दोन हप्ते तातडीने अदा करावेत आणि पीक विमा योजनेतील विविध ट्रिगर लागू करून शेतकऱ्यांना नुकसानभरपाई द्यावी, तसेच केवायसी प्रक्रिया बंद असल्याने योजनेतून वगळण्यात आलेल्या ८१ लाख लाडक्या बहिणींना पुन्हा योजनेत समाविष्ट करून केवायसी प्रक्रिया सुरू ठेवावी, या मागण्यांसाठी अखिल भारतीय किसान सभा, सेंटर ऑफ इंडियन ट्रेड युनियन्स (CITU), अखिल भारतीय जनवादी महिला संघटना (AIDWA) आणि डेमोक्रॅटिक युथ फेडरेशन ऑफ इंडिया (DYFI) यांच्या वतीने अहिल्यानगर जिल्ह्यातील अकोले येथे राज्यव्यापी महामुक्काम सत्याग्रह सुरू करण्यात आला आहे. तहसील कार्यालयासमोर सुरू असलेल्या या आंदोलनातून राज्यभरातील शेतकरी, कामगार, महिला आणि श्रमिकांच्या प्रश्नांना न्याय मिळवून देण्यासाठी निर्धार व्यक्त करण्यात आला.

आंदोलनाची व्याप्ती वाढवण्यासाठी उद्या, 22 ऑक्टोबर रोजी अकोले येथे भारताचा कम्युनिस्ट पक्ष (मार्क्सवादी) यांच्या ज्येष्ठ नेत्या वृंदा करात, पक्षाच्या पॉलिट ब्युरोचे सदस्य डॉ. अशोक ढवळे, माजी आमदार जीवा पांडू गावित, आमदार विनोद निकोले आणि डॉ. अजित नवले यांच्या प्रमुख उपस्थितीत भव्य जाहीर सभा आयोजित करण्यात आली आहे. या सभेतून राज्यभरातील शेतकरी, कामगार, महिला आणि श्रमिकांच्या मागण्यांचा आवाज सरकारपर्यंत पोहोचवण्यात येणार आहे.

मागण्या मान्य न झाल्यास अकोले ते मुंबई लॉंग मार्च!

सरकारने मागण्यांची तातडीने दखल घेऊन त्यांची अंमलबजावणी करावी, यासाठी २१ ते २६ ऑक्टोबरदरम्यान महामुक्काम सत्याग्रह सुरू ठेवण्यात येणार आहे. सरकारने मागण्या मान्य न केल्यास आणि त्यांची ठोस अंमलबजावणी न झाल्यास २६ ऑक्टोबर रोजी महाराष्ट्रातील २१ जिल्ह्यांमधील हजारो शेतकरी ट्रॅक्टर, पिकअप आणि अन्य वाहनांसह अकोले येथे दाखल होणार आहेत. तेथून अकोले ते मुंबई असा वाहनांचा भव्य लॉंग मार्च काढण्यात येणार आहे.

मुख्यमंत्र्यांच्या वर्षा बंगल्यापर्यंत आंदोलन नेण्याचा निर्धार!

आंदोलनांच्या वेळी आंदोलकांशी चर्चा करण्यासाठी अनेकदा मंत्र्यांची समिती नेमली जाते. या समितीमार्फत काही मागण्या मान्य केल्याचे जाहीर केले जाते. मात्र, प्रत्यक्ष अंमलबजावणीची वेळ येताच संबंधित मंत्री, ‘आमच्या हातात काही नाही; मुख्यमंत्रीच याबाबत निर्णय घेतील,’ अशी भूमिका घेतात. त्यामुळे यावेळी आंदोलन थेट राज्याचे मुख्यमंत्री यांचे शासकीय निवासस्थान असलेल्या ‘वर्षा’ बंगल्यापर्यंत नेण्याचा निर्णय किसान सभेच्या राज्यस्तरीय बैठकीत घेण्यात आला आहे. शेतकरी, कामगार, महिला आणि श्रमिकांच्या मागण्यांबाबत सरकारला ठोस निर्णय घेण्यास भाग पाडण्याचा निर्धार आंदोलनकर्त्यांनी व्यक्त केला आहे.

८१ लाख लाडक्या बहिणींना योजनेत पुन्हा समाविष्ट करा!

लाडकी बहीण योजनेची केवायसी प्रक्रिया बंद असल्यामुळे सुमारे ८१ लाख महिलांना योजनेतून वगळण्यात आल्याचा प्रश्न आंदोलनात उपस्थित करण्यात येत आहे. या महिलांना पुन्हा योजनेत समाविष्ट करावे, केवायसी प्रक्रिया नियमितपणे सुरू ठेवावी आणि पात्र महिलांचे थकीत मानधन तातडीने जमा करावे, अशी मागणी करण्यात येत आहे. महिलांना मिळणाऱ्या आर्थिक मदतीत खंड पडू नये आणि तांत्रिक प्रक्रियेच्या अडचणींमुळे पात्र महिलांना योजनेच्या लाभापासून वंचित ठेवू नये, यासाठी सरकारने तातडीने हस्तक्षेप करावा, अशी भूमिका अखिल भारतीय जनवादी महिला संघटनेने घेतली आहे.

राज्यभरातील शेतकऱ्यांना लॉंग मार्च मध्ये सहभागी होण्याचे आवाहन

दुष्काळी मदत, कर्जमाफी, नियमित कर्जदारांना प्रोत्साहन अनुदान, पीक विमा भरपाई, कसणाऱ्यांच्या जमिनींचे हक्क आणि लाडकी बहीण योजनेतील पात्र महिलांचे प्रश्न हे राज्यातील शेतकरी, कामगार आणि महिलांच्या जीवनाशी निगडित महत्त्वाचे प्रश्न आहेत. त्यामुळे महाराष्ट्रभरातील शेतकरी, कामगार आणि महिलांनी २६ ऑक्टोबर रोजी अकोले येथे मोठ्या संख्येने जमून अकोले ते मुंबई लॉंग मार्चमध्ये सहभागी व्हावे आणि आपल्या न्याय्य मागण्यांसाठी पूर्ण ताकदीने संघर्षात उतरावे, असे आवाहन डॉ. अशोक ढवळे, माजी आमदार जीवा पांडू गावीत, आमदार विनोद निकोले, डॉ. अजित नवले, यशवंत झाडे, उमेश देशमुख आदींनी केले आहे.

तहसील कार्यालयासमोर मुक्काम ठोकून संघर्ष सुरू ठेवणार!

महामुक्काम सत्याग्रह यशस्वी करण्यासाठी सदाशिव साबळे, नामदेव भांगरे, ज्ञानेश्वर काकड, ताराचंद विघे, मथुराबाई बर्डे, शिवराम लहामटे, राजू गंभीरे, गणेश ताजणे, एकनाथ मेंगाळ, संगीता साळवे, हेमलता शेळके, सुमन विरणक, काळू मेंगाळ, जुलेखा गोडे, कुसुम डोके, आदी कार्यकर्ते मेहनत घेत आहेत. मागण्या मान्य होईपर्यंत तहसील कार्यालयासमोरच मुक्काम ठोकून संघर्ष सुरू ठेवण्याचा संकल्प आंदोलकांनी व्यक्त केला आहे.

शेतकऱ्यांसाठी महत्वाची बातमी! लवकरच खात्यावर जमा होणार 2000 रुपये, किती शेतकऱ्यांना मिळणार लाभ?

गणेश लटके — Wed, 21 Oct 2026 21:05:51 +0530

Pradhan Mantri Kisan Samman Nidhi : शेतकऱ्यांसाठी एक महत्वाची बातमी समोर आली आहे. प्रधानमंत्री किसान सन्मान निधी (पीएम-किसान) योजनेचा 24 वा हफ्ता कधी मिळणार? असा सवाल उपस्थित केला जात आहे. तर लवकरच शेतकऱ्यांच्या खात्यात 2000 रुपये जमा होणार आहेत. दिवाळीपूर्वी पंतप्रधान किसान सन्मान निधी योजनेचा 24 वा हप्ता शेतकऱ्यांना मिळणार असल्याचं बोललं जात आहे. हा हप्ता देशातील 9 कोटी 30 लाख शेतकऱ्यांना मिळणार असल्याची माहिती देण्यात आली आहे.

रब्बी पिकांची पेरणी, बियाणे आणि खते खरेदी करण्यासाठी ही रक्कम शेतकऱ्यांसाठी अत्यंत महत्त्वाची आहे. त्यामुळे, जर हा हप्ता ऑक्टोबरमध्ये आला, तर मोठा दिलासा मिळेल. सर्वांना आशा आहे की ही 2000 रुपयांची रक्कम ऑक्टोबरमध्येच त्यांच्या खात्यात जमा होईल. ही रक्कम दसऱ्यानंतर आणि दिवाळीपूर्वी येण्याची शक्यता आहे. सरकारने अद्याप याची अधिकृत घोषणा केली नसली तरी, तुमचा हप्ता रखडू नये यासाठी तुम्ही त्यापूर्वी या पायऱ्या पूर्ण कराव्यात.

पीएम किसान सन्मान निधी योजना

पीएम किसान सन्मान निधीचा 23 वा हप्ता जून 2026 मध्ये वितरित करण्यात आला होता. आता, ऑक्टोबरमध्ये, शेवटच्या हप्त्याला चार महिने उलटले आहेत. पीएम-किसान योजनेअंतर्गत शेतकऱ्यांना दिली जाणारी 2000 रुपयांची मदत सहसा पंतप्रधानांच्या हस्ते एखाद्या मोठ्या सार्वजनिक कार्यक्रमादरम्यान एका क्लिकवर त्यांच्या खात्यात जमा केली जाते. यावेळीही असेच होण्याची शक्यता आहे. पीएम किसानच्या 24 व्या हप्त्याबद्दलच्या अद्ययावत माहितीसाठी पोर्टलवर लक्ष ठेवा.

पीएम किसानचा 24 वा हप्ता दिवाळीपूर्वी येणार का?

पंतप्रधान किसान सन्मान निधी योजना मोदी सरकारने 24 फेब्रुवारी 2019 रोजी सुरू केली होती. तेव्हापासून, दरवर्षी तीन हप्त्यांमध्ये शेतकऱ्यांच्या खात्यात 6000 रुपये जमा केले जातात. लवकरच पीएम किसान योजनेचा 24 वा हप्ता देखील शेतकऱ्यांना मिळणार आहे. पीएम किसानचा हप्ता दिवाळीपूर्वी वितरित होण्याची शक्यता आहे. लाभार्थ्यांनी त्यांचे बँक खाते केवायसी (KYC) अद्ययावत असल्याची खात्री करणे आवश्यक आहे. मागील पीएम किसान हप्ता मिळण्यास विलंब झाला असल्यास, त्यांनी आपले बँक खाते त्वरित सक्रिय करावे. पीएम किसानची स्थिती तपासण्यासाठी काय करावे?

पीएम किसान हप्ता अपडेट

पीएम किसान योजना पोर्टलवर (pmkisan.gov.in) जा.
पोर्टलवर "तुमची स्थिती जाणून घ्या" (Know Your Status) हा पर्याय निवडा.
लाभार्थ्याचे नाव, ओळखपत्र (ID) आणि इतर माहिती भरा.
त्यानंतर तुमचा अर्ज आणि पेमेंटची माहिती तपासा.
तुमच्या स्थितीमध्ये काही समस्या असल्यास, कृषी विभागाच्या अधिकाऱ्याशी संपर्क साधा.

पीएम किसान हप्ता मिळण्यापूर्वी या गोष्टी तपासा

अलीकडेच मोठ्या संख्येने अपात्र लाभार्थ्यांना पीएम किसानमधून वगळण्यात आले आहे. जमिनीची संयुक्त मालकी असल्यास पीएम किसानशी संबंधित समस्या उद्भवू शकतात. बँक खाती, शेतजमीन किंवा कागदपत्रांमधील चुकांमुळे शेतकऱ्यांच्या हप्त्यांना विलंब होऊ शकतो. शेतकऱ्यांनी पुढील पीएम किसान हप्ता मिळण्यापूर्वी या गोष्टी दुरुस्त कराव्यात.

तुमच्या बँक खात्याचे ई-केवायसी (e-KYC) अद्ययावत (update) केल्याची खात्री करा.

तुमचे आधार आणि बँक खाते लिंक करण्यात काही समस्या आहेत का ते तपासा.

जमीन आणि महसुली कागदपत्रांमध्ये कोणत्याही चुका किंवा अपूर्ण माहिती नसावी.

पीएम किसान योजनेतील घोटाळे कसे टाळावेत?

पीएम किसानशी संबंधित कोणत्याही माहितीसाठी, जसे की तुमच्या बँक खात्याचे केवायसी (KYC) अद्ययावत करण्यासाठी, थेट तुमच्या बँकेशी संपर्क साधा. जर तुम्हाला ऑनलाइन केवायसीबद्दल कॉल आला, तर त्याला बळी पडू नका. तुमच्या पीएम किसान हप्त्याची रक्कम तुमच्या खात्यात हस्तांतरित करण्यासाठी लिंकवर क्लिक करण्यास सांगणारे कॉल किंवा संदेशांकडे दुर्लक्ष करा. जर महसूल विभाग, कृषी विभाग किंवा इतर कोणताही कर्मचारी तुमच्याकडे पैशांची मागणी करत असेल, तर संबंधित विभागाकडे तक्रार करा.a