Agriculture News : पुणे जिल्ह्यातील भोर (Bhor) तालुक्यातील वरवे खुर्द धरणातून (Varve Khurd Dam) अनेक वर्षांपासून बंद असलेला शेतीसाठीचा पाणी पुरवठा सुरु व्हावा. धरणातील अतिक्रमण हटवावे यासह इतर मागण्यांसाठी शेतकरी संघटना आणि स्वतंत्र भारत पार्टी आक्रमक झाली आहे. शेतकऱ्यांच्या मागण्यांसाठी शेतकरी संघटनेच्या वतीनं जलसंधारण कार्यालयासमोर उपोषण सुरु केलं होतं. मात्र, वरवे खुर्द धरणातून शेतीसाठी पुन्हा पाणी देण्याचे लेखी आश्वासन दिल्यानं शेतकरी संघटनेचं उपोषण स्थगित झालं आहे.
जलसंधारण कार्यालयासमोर सुरू केले होते. उपमुख्य अभियंता के. एस. पाटील यांच्या मध्यस्तीने जिल्हा जलसंधारण कार्याल्याकडून आश्वासन दिल्यानंतर उपोषण मागे घेण्यात आले असल्याची माहिती उपोषणकर्ते आणि पुणे जिल्हा शेतकरी संघटनेचे जिल्हाध्यक्ष लक्ष्मण रांजणे यांनी दिली आहे.
अर्धवट काम झाल्यामुळं काही वर्षातच पाणीपुरवठा बंद
वरवे गावातील शेतकऱ्यांच्या शेतीला पाणी मिळावे यासाठी धरण बांधण्यात आले आहे. गावातील पाणीवाटप संस्थेने शेतकऱ्यांच्या जमिनीवर कर्ज काढून पाणीपुरवठा पाईपलाईन केली. मात्र, निकृष्ट कामाचा दर्जा आणि अर्धवट काम झाल्यामुळं काही वर्षातच पाणीपुरवठा बंद पडला. पाणीवाटप संस्थेच्या गलथान कारभारामुळं शेतकऱ्यांवर कर्ज झाले पण पाणी मिळत नव्हते, म्हणून शेतकरी संघटना आक्रमक झाली होती.
अनेक वर्षे पाठपुरावा करुनही जलसंधारण विभागाची कार्यवाही नाही
शेतकरी संघटनेचे जिल्हाध्यक्ष लक्ष्मण रांजणे आणि युवा आघाडीचे अध्यक्ष दिलीप भोरडे यांनी अनेक वर्षे पाठपुरावा करुनही जलसंधारण विभाग कार्यवाही करत नव्हते. त्यामुळे येरवडा येथील जिल्हा जलसंधारण अधिकारी, मृद व जलसंधारण विभाग पुणे यांच्या कार्यालयासमोर आमरण उपोषण सुरु केले होतं. त्यानंतर मृद व जलसंधारण विभागाचे सहाय्यक मुख्य अभियंता के. एस. पाटील यांनी उपोषणकर्ते व जिल्हा जलसंधारण अधिकारी यांची चर्चा घडवून आणली. तीन महिन्यात धरण व पाणीपुरवठा योजनेचे फेर सर्वेक्षण करून नव्याने आराखडा तयार करून निधीसाठी शासनाकडे प्रस्ताव सादर करण्यात येणार आहे. तलावाच्या हद्दीच्या खुणा करून अतिक्रमण निश्चित करण्यात येईल. दोषी पाणी वाटप संस्थेकडून तलाव हस्तांतरित करून काढून घेण्यात येईल आदी लेखी आश्वासने देण्यात आली. चर्चेमध्ये स्वतंत्र भारत पार्टीचे राष्ट्रीय अध्यक्ष अनिल घनवट, शेतकरी संघटनेच्या प. महाराष्ट्राच्या महिला आघाडी अध्यक्षा सीमा नरोडे, वरवेचे सरपंच निलेश भोरडे उपस्थित होते.
महत्त्वाच्या बातम्या: